Japta 34

Hileman mo 2,000 Yang Soldia

Ol pipol blong Amon oli bin promes long God se bae oli neva save faet bakegen. Oli bin stap laef kolosap long Ol Man blong Nifae mo Ol Man blong Nifae oli protektem olgeta.

Alma 53:10–12

Taem ol enemi blong ol pipol blong Amon oli atakem Ol Man blong Nifae, ol pipol blong Amon oli wantem brekem ol promes blong olgeta mo helpem Ol Man blong Nifae blong faet.

Alma 53:13

Hileman mo ol narafala lida blong Ol Man blong Nifae oli no wantem ol pipol blong Amon blong brekem ol promes blong olgeta long God.

Alma 53:14–15

Ol yang boe blong ol pipol blong Amon oli no bin mekem promes. Oli wantem blong helpem ami blong Ol Man blong Nifae blong faet from fridom blong olgeta.

Alma 53:16–17

Tu taosen long ol yangfala man ia, oli jusum olgeta blong difendem kantri blong olgeta. Oli askem Hileman blong kam lida blong olgeta.

Alma 53:18–19

Ol yangfala man ia, oli ol strong man, oli gat strong paoa long tingting, mo oli gat strong bodi. Oli stap ones tu, mo oli wantem se man i save trastem olgeta, mo oli stap obei ol komanmen blong God.

Alma 53:20–21

Hileman i lidim 2000 yang soldia blong hem i go long faet. Hem i singaotem olgeta ol boe blong hem, mo olgeta oli singaotem hem, papa blong olgeta.

Alma 53:22; 56:46

I nomata se ol boe blong Hileman oli neva faet, be oli no fraet. Ol mama blong olgeta oli bin tijim olgeta blong gat fet long God mo blong oli save se Lod bae i helpem olgeta.

Alma 56:47

Hileman mo ol ami blong hem oli bin faet long samfala faet agensem Ol Man blong Leman. Ol yangfala man ia oli stap obei long evri oda we Hileman i givim.

Alma 57:19–21

Oli no fraet blong faet, mo oli help blong ronem ol enemi oli go longwe. Afta long faet Hileman i faenemaot se evri boe blong hem oli kasem kil, be i no gat wan long olgeta i bin ded.

Alma 57:22, 25

I bin wan merikel. Hileman i glad tumas. Hem i save se ol yangfala man ia oli bin kasem proteksen from bigfala fet we oli gat.

Alma 57:26–27