Japta 20
Alma mo Nihor
Bifo King Mosaea i ded, Ol Man blong Nifae oli jusum ol jaj blong oli lidim olgeta. Yangfala Alma i bin kam fasfala jif jaj. Hem i bin stap tu olsem lida blong Jos.
Wan bigfala strong man we nem blong hem Nihor i stat blong tijim ol giaman samting. Hem i talem se evriwan bae i sef i nomata se oli nogud o oli gud. Plante pipol oli bin biliv long Nihor.
Nihor i prij agensem Jos blong God, be wan stret mo gud man we nem blong hem Gidion i difendem hem. Nihor i bin rao wetem Gidion, be Gidion i bin toktok wetem toktok blong God.
Nihor i kros tumas mo i sakem naef blong faet blong hem mo i kilimded Gidion.
Oli bin tekem Nihor i go long Alma blong i jajem hem. Nihor i bin strong blong difendem hemwan.
Be Alma i talem se Nihor hem i rong mo i gilti from hem i bin tijim ol pipol blong oli kam nogud mo i bin kilim Gidion.
Alma i talem se Nihor i mas kasem panis from we i kilim Gidion. Folem loa, Nihor i mas ded.
Oli bin tekem Nihor i go long wan hil kolosap mo oli bin kilim hem i ded. Bifo hem i ded hem i talem se evri samting hem i tijim oli rong evri wan. Be plante pipol oli stil biliv long ol rabis tijing blong Nihor.
Ol pipol oli lavem ol samting blong wol mo oli no wantem obei long ol komanmen blong God. Oli bin stap laf long ol memba blong Jos mo oli bin raorao mo faet wetem olgeta.
Ol stret mo gud man oli gohed blong kipim ol komanmen mo oli no bin komplen i nomata se ol man we oli stap folem Nihor i stap mekem olgeta oli harem nogud.
Ol memba blong Jos oli serem evri samting we oli gat wetem ol man we oli pua, mo oli tekem kea long ol sikman Oli obei long ol komanmen mo God i bin blesem olgeta.