Japta 22

Misin blong Alma mo Amulek i go long Amonaeha

Alma i stap wari from ol nogud fasin blong Ol Man blong Nifae, mekem se hem i tingting blong spenem ful taem blong hem blong prijim gospel. Hem i bin jusum Nifaeha blong tekem ples blong hem olsem jif jaj.

Alma 4:7, 18–19

Alma i tijim gospel truaot long lan ia. Taem hem i stap traem blong tij long Amonaeha, ol pipol oli no wantem blong lisin. Oli bin sakem hem aot long taon ia.

Alma 5:1; 8:8–9, 11, 13

Alma i bin sore tumas from we ol pipol blong Amonaeha oli rabis tumas. Hem i bin lego taon ia mo i go long wan narafala taon.

Alma 8:13–14

Wan enjel i bin kamaot mo i leftemap tingting blong Alma. Enjel ia i talem long hem blong gobak long Amonaeha mo prij bakegen. Alma i hariap i gobak.

Alma 8:15–16, 18

Alma i bin hanggri tumas. Taem hem i go insaed long taon ia, hem i askem kaekae long wan man. Wan enjel i bin talem long man ia se Alma bae i kam, mo we Alma i wan profet blong God.

Alma 8:19–20

Man ia Amulek i bin tekem Alma i go long haos blong hem mo i givim kaekae long hem. Alma i stap wetem Amulek mo famli blong hem blong plante dei. Hem i talem tangkyu long God from famli blong Amulek mo i blesem olgeta.

Alma 8:21–22, 27

Alma i talem long Amulek abaot koling blong hem blong tijim ol pipol blong Amonaeha. Amulek i bin go wetem Alma blong tijim olgeta pipol ia. Tabu Spirit i helpem olgeta.

Alma 8:24–25, 30

Alma i talem long ol pipol blong oli sakem sin sapos no bae God i spolem olgeta. Hem i talem se Jisas Kraes bae i kam mo sevem olgeta we oli gat fet long hem mo oli sakem sin.

Alma 9:12, 26–27

Ol pipol blong Babel oli bildim wan taoa. Ol pipol oli kros tumas mo oli traem blong kilim hem, be Lod i bin protektem hem.

Alma 9:31–33

Mo Amulek i stat blong tij. Plante long ol pipol i save Amulek; hem i no wan strenja olsem Alma. Hem i talem long olgeta abaot enjel ia we hem i bin luk.

Alma 9:34; 10:4, 7

Amulek i talem se Alma i wan profet blong God mo hem i stap talem trutok. Ol pipol oli sapraes tumas blong harem testemoni blong Amulek.

Alma 10:9-10, 12

Samfala man i kam blong kros, speseli wan long ol nogud man we nem blong hem Siesrom. Oli traem blong trikim Amulek wetem ol kwestin, be hem i talem long olgeta se, hem i save long ol plan blong olgeta.

Alma 10:13–17, 31

Siesrom i wantem blong spolem evri samting we i gud. Hem i wantem blong mekem problem, mo ol pipol bae i givim mane long hem blong stretem ol problem we hem i bin mekem.

Alma 11:20–21

Siesrom i no save trikim Amulek, mekem se hem i givim mane long hem blong mekem se hem i save talem se i no gat God. Amulek i save se God i stap laef mo i talem se Siesrom i save tu be hem i lavem mane moa bitim God.

Alma 11:22, 24, 27

Mo Amulek i tijim Siesrom abaot Jisas Kraes mo abaot Fasin blong laef bakegen long ded mo Laef we i no save finis. Ol pipol oli glad Siesrom i stat blong seksek wetem fraet.

Alma 11:40–46

Siesrom i save se Alma mo Amulek tufala i gat paoa blong God from se oli save ol tingting blong hem. Siesrom i askem ol kwestin mo i lisin taem Alma i tijim hem abaot gospel.

Alma 12:1, 7-9

Samfala pipol oli biliv long Alma mo Amulek mo oli stat blong sakem sin mo stadi long ol skripja.

Alma 14:1

Be plante long ol pipol i wantem blong kilim Alma mo Amulek. Oli fasem tufala man ia mo tekem tufala i go long jif jaj.

Alma 14:2–4

Siesrom i sore tumas from se hem i bin wan man nogud mo i bin tijim ol pipol ol giaman samting. Hem i askem strong long ol pipol blong lego Alma mo Amulek i go.

Alma 14:6–7

Siesrom mo ol narafala man we oli bin biliv long ol tijing blong Alma mo Amulek oli bin sakemaot tufala long taon. Ol nogud man oli sakem ston long olgeta.

Alma 14:7

Mo ol nogud man oli tekem tugeta ol woman mo ol pikinini we oli biliv mo oli sakemaot olgeta, wetem ol skripja blong olgeta, i go long faea.

Alma 14:8

Oli bin fosem Alma mo Amulek blong lukluk ol woman mo ol pikinini i bon long faea. Amulek i wantem blong yusum paoa blong God blong sevem olgeta.

Alma 14:9–10

Be Alma i talem long Amulek se bae hem i no mas stopem ol faet blong kilimded ol man ia from se ol pipol ia we oli ded long faea ia bae i no long taem oli stap wetem God mo ol nogud man ia bae oli kasem panis.

Alma 14:11

Jif jaj i bin slapem Alma mo Amulek long taem ia mo i jikim tufala from se tufala i no bin sevem ol woman mo ol pikinini. Mo i bin sakem tufala i go long kalabus

Alma 14:14–17

Ol narafala nogud man i bin kam long kalabus mo spolem Alma mo Amulek long plante wei olsem, mekem tufala i hanggri mo stap spet long tufala.

Alma 14:18–22

Jif jaj i talem se sapos Alma mo Amulek i yusum paoa blong God blong mekem tufala i go fri tufala wan, bae hem i biliv. Hem i slapem tufala bakegen.

Alma 14:24

Alma mo Amulek i stanap. Alma i prea mo askem God blong mekem tufala i strong from fet blong tufala long Kraes.

Alma 14:25–26

Paoa blong God i fulumap Alma mo Amulek, mo oli brekem ol rop we i fasem tufala. Ol man nogud oli fraet mo oli traem blong ron be oli foldaon.

Alma 14:25–27

Graon i stap seksek, mo ol wol blong kalabus i folfoldaon long ol rabis man. Lod i bin protektem Alma mo Amulek, mo tufala i no bin kasem kil.

Alma 14:27–28

Ol pipol blong Amonaeha oli kam blong luk wanem i stap hapen. Taem oli luk Alma mo Amulek tufala i stap wokbaot aot long brokbrok kalabus ia, oli fraet tumas mo oli ronwe.

Alma 14:28–29

Lod i talem long Alma mo Amulek blong go long Saedom. Long ples ia oli faenem ol man we oli stret mo gud. Siesrom tu i bin stap long ples ia mo hem sik tumas.

Alma 15:1–3

Siesrom i glad tumas blong luk Alma mo Amulek. Hem i bin wari se oli bin kilim tufala from wanem we hem i bin mekem. Hem i askem long olgeta blong oli hilim hem.

Alma 15:4–5

Siesrom i bin biliv long Jisas Kraes mo i sakem ol sin blong hem. Taem Alma i prea long hem, Siesrom i kasem hiling long semtaem.

Alma 15:10–11

Siesrom i kasem baptaes mo i stat blong prijim gospel. Plante narafala tu oli bin kasem baptaes.

Alma 15:12, 14

Wan ami blong Ol Man blong Leman i bin kilim ded ol nogud man blong Amonaeha, olsem we Alma i bin profesae long hem.

Alma 10:23; 16:2, 9