Japta 21

Ol MAN BLONG AMLISAE

Amlisae hem i wan kleva, wan nogud man we i wantem blong kam king blong ol Ol Man blong Nifae. Hem i gat plante man we oli stap folem hem.

Alma 2:1–2

Ol Man blong Nifae we oli stret mo gud oli no wantem Amlisae blong i kam king blong olgeta. Oli save se hem i wantem blong spolem Jos blong God.

Alma 2:3–4

Ol Man blong Nifae oli kam tugeta long ol grup blong oli disaed sapos Amlisae i sapos blong kam king blong olgeta. Plante long ol pipol oli vot agensem Amlisae, mo hem i no bin kam king.

Alma 2:5–7

Amlisae mo ol man blong hem oli kros. Oli lego Ol Man blong Nifae, oli mekem Amlisae i kam king blong olgeta, mo oli singaotem olgeta wan Ol Man blong Amlisae. Amlisae i givim oda long olgeta blong faetem Ol Man blong Nifae.

Alma 2:8–11

Ol Man blong Nifae we oli stret mo gud oli stap priperem olgetawan blong difendem olgetawan wetem ol aro, ol naef, mo ol narafala tul blong faet.

Alma 2:12

Ol Man blong Amlisae oli atak, mo Ol Man blong Nifae, we Alma i lidim olgeta mo oli kasem paoa long Lod, oli kilim plante long ol Ol Man blong Amlisae. Mo evri narafala Ol Man blong Amlisae oli ronwe

Alma 2:15–19

Alma i sendem ol spae blong lukluk Ol Man blong Amlisae. Ol spae ia oli luk olgeta oli joenem wan bigfala ami blong Ol Man blong Leman, mo oli atakem Ol Man blong Nifae we oli stap laef kolosap long Sarahemla.

Alma 2:21, 24–25

Ol Man blong Nifae oli prea mo God i helpem olgeta bakegen. Oli kilimded plante soldia blong Leman-mo Amlisae ami.

Alma 2:28

Alma mo Amlisae tufala i faet wetem ol naet blong faet. Alma i prea se laef blong hem bae God i protektem, mo God i givim paoa long hem blong kilimded Amlisae.

Alma 2:29–31

Ol Man blong Nifae oli ronem Ol Man blong Leman mo Ol Man blong Amlisae i go long waelples. Plante long olgeta we oli kasem kil bigwan, oli ded long ples ia, mo ol wael animol oli kakae olgeta.

Alma 2:36–38

Olsem Ol Man blong Leman, Ol Man blong Amlisae oli makem ol fored blong olgeta i red, we i fulfilim wan profesi Ol Man blong Amlisae oli bin seperetem olgeta wetem ol blesing blong gospel.

Alma 3:4, 14, 18-19