Japta 17
Alma mo Ol Pipol blong Hem Oli Ronwe
Wan dei taem we Alma mo ol pipol blong hem oli stap wok long garen blong olgeta, wan ol ami blong Ol Man blong Leman i krosem boda i kam long graon blong olgeta.
Ol Man blong Nifae oli fraet mo oli ron i go insaed long taon blong olgeta blong stap sef. Alma i talem long olgeta blong tingbaot God mo bae Hem i helpem olgeta. Ol Man blong Nifae oli stat blong prea.
Lod i bin mekem hat blong Ol Man blong Leman i sofsof, mo oli no bin kilimded Ol Man blong Nifae. Ol Man blong Leman ia oli bin lus taem oli stap traem blong faenem ol pipol blong King Limhae.
Ol Man blong Leman oli talem long Alma se bae oli no mekem wan samting long ol pipol blong hem sapos hem i soem rod long olgeta blong oli gobak long graon blong olgeta. Alma i soem long olgeta wei.
Be Ol Man blong Leman oli no kipim promes blong olgeta. Oli putum ol gad raon long lan ia, mo Alma mo ol pipol blong hem oli nomo fri.
King blong Ol Man blong Leman i bin mekem Amulon i kam rula ova long ol pipol blong Alma. Amulon hem i bin wan Ol Man blong Nifae mo wan nogud pris blong King Noa.
Amulon i mekem ol pipol blong Alma i wok had tumas. Oli prea from help, be Amulon i talem se sapos i faenem eni wan we i stap prea bae i kilim hem i ded. Ol pipol oli gohed blong prea long hat blong olgeta.
God i harem prea blong olgeta mo i givim moa paoa long olgeta mekem se wok blong olgeta i isi smol. Ol pipol ia oli glad mo gat fasin blong save wet long taem.
God i glad blong luk se ol pipol oli stap fetful. Hem i talem long Alma se Hem bae i helpem olgeta blong oli ronwe long Ol Man blong Leman.
Long naet ol pipol ia oli tekem tugeta ol kaekae mo ol animol blong olgeta. Long nekis moning God i mekem Ol Man blong Leman oli slip ded taem ol pipol blong Alma oli lego taon ia.
Afta we oli travel blong 12 dei, ol pipol oli kasem Sarahemla, long ples ia nao King Mosaea i welkamem olgeta.