Japta 46

Jisas Kraes I Tij mo I Prea wetem Ol Man blong Nifae

Ol Man blong Nifae we oli luk Jisas Kraes oli talem long ol fren blong olgeta se bae Hem i kam bak long nekis dei. Plante pipol oli wok had tumas blong go kasem ples ia we Jisas i stap long hem.

3 Nifae 19:2–3

Long nekis moning Nifae mo ol nara disaepol oli tijim grup ia we i bin kam tugeta. Ol disaepol oli bin prea se bae oli save kasem Tabu Spirit.

3 Nifae 19:6–9

Nifae i go insaed long wota mo i kasem baptaes. Mo i baptaesem ol narafala disaepol.

3 Nifae 19:11–12

Afta oli bin kasem baptaes, ol disaepol oli kasem Tabu Spirit. Faea i go raonem olgeta, mo ol enjel oli kam daon long heven mo oli givhan long olgeta.

3 Nifae 19:13–14

Taem ol enjel oli stap wetem ol disaepol, Jisas i kam mo stanap long medel blong olgeta.

3 Nifae 19:15

Kraes i talem long evri Ol Man blong Nifae blong oli nildaon i go long graon. Hem i talem long ol disaepol blong Hem blong prea.

3 Nifae 19:16–17

Taem oli stap prea, Jisas i wokbaot i go aot smol long ol pipol mo i nildaon mo i prea long Papa long Heven.

3 Nifae 19:18–20

Jisas i talem tangkyu long Papa long Heven from we Hem i givim Tabu Spirit long ol disaepol blong Hem. Mo Hem i askem blong Tabu Spirit oli save givim long eni wan we i biliv long ol toktok blong ol disaepol.

3 Nifae 19:20–21

Jisas i blesem ol disaepol blong Hem taem oli stap prea. Hem i smael long olgeta, mo oli kam waet olsem fes blong Hem mo klos blong Hem.

3 Nifae 19:25

Jisas i prea bakegen from ol disaepol blong Hem. Hem i glad tumas from bigfala fet blong olgeta.

3 Nifae 19:29, 35

Kraes i talem long ol pipol blong oli stop blong prea be oli mas gohed blong prea long hat blong olgeta. Mo i givim sakramen long olgeta.

3 Nifae 20:1–5

I no gat i bin karem i kam bred mo waen, be Sevya i bin provaedem long wan merikel.

2 Nifae 20:6–7

Jisas Kraes i talem long Ol Man blong Nifae se gospel blong Hem bae i kambak long wol ia long ol las dei.

3 Nifae 21: 1, 3, 7, 9

Hem i talem long olgeta blong oli stadi long ol skripja, mo Hem i mekem Nifae i raetem long ol rekod wei we ol profesi blong Samuel we i wan Man blong Leman bae oli kamtru.

3 Nifae 23:1, 9–13

Mo Jisas i tijim ol pipol long skripja. Hem i tijim long olgeta wanwan ol olgeta ol samting we hem i bin tijim long olgeta.

3 Nifae 23:14

Jisas i go bak long heven, mo ol disaepol oli tijim ol pipol. Olgeta we oli biliv oli kasem baptaes mo oli kasem Tabu Spirit.

3 Nifae 26:15, 17

Ol Man blong Nifae oli stat blong obei long ol komanmen.

3 Nifae 26:20