Japta 10

Jekob mo Serem

Bifo Nifae i ded, hem i bin givim ol buk i go long yangfala brata blong hem Jekob blong hem i gohed blong raet long olgeta. Jekob i gat stret mo gud fasin.

Jekob 1:1–2, 8

Nifae i talem long Jekob blong raetem ol samting we i save helpem ol pipol blong oli bilif long Kraes.

Jekob 1:4–6

Nifae i givim paoa long Jekob blong kam olsem wan pris insaed long Jos mo blong tijim Ol Man blong Nifae long ol toktok blong God.

Jekob 2:28

Afta we Nifae i ded, plante long Ol Man blong Nifae oli bin kam nogud. Jekob i bin tijim ol pipol mo talem long olgeta blong oli sakem sin from ol nogud samting we oli stap mekem.

Jekob 1:15–17

Wan nogud man we nem blong hem Serem i go long medel blong Ol Man blong Nifae, mo i stap tijim olgeta blong oli no bilif long Jisas Kraes.

Jekob 7:1–2

Serem i bin talem long ol pipol se bae i no gat Kraes. Plante pipol oli bin bilif long Serem.

Jekob 7:2–3

Jekob i tijim ol pipol blong bilif long Kraes. Serem i wantem blong rao wetem Jekob blong winim hem blong mekem se hem tu bae i bilif se bae i no gat Kraes.

Jekob 7:6

Fet blong Jekob long Jisas Kraes i no bin save muv. Hem i bin luk ol enjel mo i bin harem voes blong Lod. Hem i save se Jisas bae i kam.

Jekob 7:5.

Tabu Spirit i bin stap wetem Jekob taem hem i serem testemoni blong hem abaot Jisas Kraes long Serem.

Jekob 7:8–12

Serem i askem blong luk wan saen. Hem i wantem blong Jekob i mas pruvum se i gat wan God. Hem i wantem luk wan merikel.

Jekob 7:13

Jekob i no bin wantem blong askem God from wan saen. Hem i talem se Serem i bin save finis se wanem we Jekob i bin tijim i tru.

Jekob7:14

Jekob i talem se sapos God i kilim Serem, hem ia bae i wan saen blong paoa blong God.

Jekob 7:14

Serem i foldaon long sem taem. Hem i no save girap blong plante dei.

Jekob 7:15

Serem i wik mo i save se bae hem i ded. Hem i singaotem ol pipol oli kam tugeta.

Jekob 7:16

Hem i talem long olgeta se hem i bin giaman. Hem i talem se oli mas bilif long Jisas Kraes.

Jekob 7:17–19

Afta we Serem i finis blong toktok long ol pipol, hem i ded. Ol pipol oli filim paoa blong God, mo oli foldaon i go long graon.

Jekob 7:20–21

Ol pipol oli stat blong sakem sin mo ridim ol skripja. Oli bin laef wetem pis mo lav. Jekob i glad mo i save se God i bin ansarem prea blong hem.

Jekob 7:22–23