Japta 39
Nifae I Kasem Bigfala Paoa
Nifae i wokbaot i go long hom blong hem, mo i stap tingting abaot wanem we Lod i bin soem long hem mo abaot ol nogud fasin blong Ol Man blong Nifae. Hem i harem nogud from ol nogud fasin blong olgeta.
Lod i toktok long Nifae mo i presem hem from hem i bin stap obei mo i stap wok had blong tijim gospel.
Nifae i kasem paoa blong mekem eni samting. Lod i save se hem bae i yusum paoa ia long wan fasin we i stret mo gud wei.
Lod i talem long Nifae blong givim woning long Ol Man blong Nifae se sapos oli no sakem sin, bae wan samting i spolem olgeta. Nifae i go stret mo i givim woning ia long ol pipol ia.
Ol Man blong Nifae oli no bin bilif long Nifae. Oli traem blong sakem hem i go long kalabus, be paoa blong God i protektem hem.
Nifae i talemaot toktok blong God i go long evri Ol Man blong Nifae.
Be ol pipol oli kam moa nogud mo oli bin stat blong faetem wanwan long olgeta.
Nifae i prea from wan taem we bae i drae tumas mekem bae i no gat kakae, mo i stap tingting se ating bae wantaem olsem nao bae i mekem Ol Man blong Nifae i kam blong gat tingting we i stap daon mo helpem olgeta blong sakem sin.
Taem ia we i drae mo i no gat kakae i kam. I no gat ren, mo graon i bin drae tumas mo ol kakae oli no save gro gud. Ol pipol oli stop blong faet.
Ol Man blong Nifae oli hangre tumas mo plante long olgeta i bin ded. Olgeta we oli laef oli stat blong tingbaot Lod mo wanem we Nifae i bin tijim olgeta.
Ol pipol oli sakem ol sin blong olgeta mo askem strong long ol jaj blong olgeta blong talem long Nifae blong stopem drae taem ia. Ol jaj oli go long Nifae.
Taem Nifae i luk se ol pipol ia oli bin kam blong gat tingting we i stap daon mo oli bin sakem sin, hem i askem Lod blong stopem drae taem ia.
Lod i ansarem prea blong Nifae, mo ren i stat blong foldaon. Mo afta ol kakae oli stat blong gro bakegen. Ol pipol oli givim glori long God mo oli save se Nifae hem i wan profet.
Plante long Ol Man blong Nifae oli bin joenem Jos. Oli bin rij tumas, mo ol taon blong olgeta oli bin gro bigwan. I bin gat pis long lan ia.
Ol Man blong Nifae we oli bin joenem Ol Man blong Leman fastaem oli atakem Ol Man blong Nifae.
Ol Man blong Nifae oli traem blong faetem ol enemi blong olgeta, we oli bin kam ol stil man blong Gadianton, be oli no save mekem fom we olgeta tu oli bin kam nogud bakegen.
Taem Ol Man blong Nifae oli kam ol stret mo gud man, Lod i blesem olgeta. Taem we oli flas mo fogetem Lod, Hem i givim ol problem long olgeta blong mekem olgeta oli tingbaot hem.