Japta 6
Drim blong Lihae
Lihae i talem long famli blong hem abaot wan impoten visen we hem i bin luk long wan drim. Drim blong Lihae i mekem hem i glad long Nifae mo Sam be i mekem hem i harem nogud from Leman mo Lemyul.
Long drim blong hem Lihae i luk wan man we i werem wan waet klos we i talem long Lihae blong folem hem. Lihae i folem man ia i go long ples we i tudak long ples we i nogat man long hem.
Afta we oli travel blong plante aoa long tudak, Lihae i prea from help.
Mo hem i bin luk wan tri wei gat ol frut we i waet. Frut ia i swit we i mekem olgeta we i kakae long hem i glad.
Lihae i kakae frut ia mo i mekem hem i fulap wetem glad. Hem i wantem famli blong hem blong testem frut ia from hem i save se bae i mekem olgeta i glad tu.
Lihae i luk wan reva we i stap ron kolosap long tri ia. Long hed blong reva ia hem i bin luk Saraea, Sam, mo Nifae.
Lihae i singaot long woman mo ol boe blong hem blong kam mo testem frut ia. Saraea, Sam, mo Nifae i bin go mo testem frut ia, be Leman mo Lemyul tufala i no wantem.
Lihae i luk tu wan aean rod mo wan stret mo smol rod we i lid i go long tri.
Hem i luk plante pipol oli stap wokbaot long mo stret i go long rod ia. From we i gat fulap dak klaod, samfala oli bin aot long rod ia mo oli bin lus.
Ol narafalawan oli holem taet strong aean rod ia mo i mekem se oli go tru long tudak mo oli kasem tri. Oli bin testem frut.
Ol pipol long wan bigfala bilding narasaed long reva ia oli stap laf mo jikim olgeta we i stap kakae frut ia. Samfala we oli bin kakae frut ia oli stat blong sem mo i mekem se oli lego tri.
Lihae i luk plante pipol long drim blong hem. Samfala i holem taet strong aean rod ia mo oli travel tru long tudak mo oli kasem tri. Oli bin testem frut. Ol narafala oli bin go long bigfala flas bilding ia o oli draon long reva mo oli lus. Leman mo Lemyul tufala i no wantem blong kakae long frut ia. Lihae i bin wari long tufala mo i bin traem blong helpem tufala blong obei long ol komanmen blong God.