Japta 28

Ol Man blong Soram mo Ramiamtam

Long wan taem Ol Man blong Soram oli bin stap long Jos blong God be oli bin kam nogud mo oli stap wosipim ol aedol.

Alma 31:1, 8–9

Ol Man blong Nifae oli wantem blong mekem Ol Man blong Soram blong oli no joenem Ol Man blong Leman, mekem se Alma i bin go wetem samfala misinari blong prijim toktok blong God long Ol Man blong Soram.

Alma 31:4, 11

Ol misinari ia oli sapraes mo oli harem nogud long olsem wanem Ol Man blong Soram oli stap wosip long ol jos blong olgeta, we oli singaotem ol saenagog.

Alma 31:12

Long medel blong jos blong olgeta, Ol Man blong Soram oli bin bildim wan flat ples we i hae antap we oli singaotem Ramiamtam. I gat rum blong wan man nomo blong stanap long top blong hem.

Alma 31:13, 21

Ol Man blong Soram oli stap go stanap antap ia, wan afta wan, mo putum han i go long heven mo oli stap talem wan sem prea nomo mo voes blong olgeta i antap olgeta.

Alma 31:14, 20

Long prea ia, Ol Man blong Soram oli talem se God i no gat bodi; hem i wan spirit nomo. Oli bin stap talem tu se bae i no gat Kraes.

Alma 31:15–16

Ol Man blong Soram oli ting se God i jusum olgeta nomo blong oli sef long kingdom blong heven. Oli stap talem tangkyu from se olgeta nao i ol pipol we Hem i laekem tumas.

Alma 31:17–18

Afta we wanwan long Ol Man blong Soram oli bin prea, oli gohom mo oli nomo prea o tokbaot God bakegen blong wan ful wik.

Alma 31:12, 23

Ol rij Man blong Soram man oli laekem gol mo silva, mo oli ting hae tumas long ol samting blong wol we oli gat. Alma harem nogud blong luk hamas oli bin kam nogud.

Alma 31:24–25

Alma i prea from hem mo ol misinari blong hem blong oli gat paoa, kamfot, mo sakses long wok blong olgeta.

Alma 31:26, 32–33

Afta we hem i prea blong kasem help blong tekembak Ol Man blong Soram i kambak long trutok, Alma mo ol narafala misinari oli bin fulap wetem Tabu Spirit.

Alma 31:34–36

Ol misinari oli bin go long ol seperet daereksen blong prij. God i blesem olgeta wetem kakae mo klos mo i leftemap tingting blong olgeta long wok blong olgeta.

Alma 31:37–38

Ol Man blong Soram we oli pua oli no gat raet blong go insaed long ol jos. Ol pipol ia oli stat blong lisin long ol misinari.

Alma 32:2–3

Plante oli askem Alma wanem oli mas mekem. Alma i talem long olgeta se oli no nid blong stap insaed long wan jos blong prea o blong wosipim God.

Alma 32:5, 10–11

Hem i talem long olgeta blong gat fet long God. Mo Amulek i tijim olgeta abaot Jisas Kraes mo abaot plan blong God blong ol pikinini blong Hem.

Alma 32:17–21; 34:8–9

Ol misinari oli aot, mo Ol Man blong Soram we oli bin biliv long olgeta oli bin sakemaot olgeta long taon. Olgeta we oli biliv oli go mo stap long lan blong Jeson wetem ol pipol blong Amon.

Alma 35:1–2, 6

I nomata se ol nogud Man blong Soram oli tritim nogud ol pipol blong Amon, ol pipol blong Amon oli helpem ol stret mo gud Man blong Soram mo oli givim kaekae, klos mo graon long olgeta.

Alma 35:8–9