Japta 30
Alma I Givim Kaonsel long Ol Boe blong Hem
Alma harem nogud blong luk hamas Ol Man blong Nifae oli bin kam nogud. Hem i toktok long wanwan long ol boe blong hem blong livim wan laef we i stret mo gud.
Alma i talem long Hileman, fasbon boe blong hem, blong trastem God. Hem i talem long hem abaot enjel ia we God i bin sendem blong talem long Alma blong i stop blong spolem Jos.
Blong tri dei Alma i bin safa from ol samting nogud we i bin mekem. Mo i bin tingbaot ol tijing blong papa blong hem abaot Jisas, mo hem i save se hem i save kasem fogivnes long ol sin blong hem.
Alma i prea from fogivnes, mo bigfala glad i kam long hat blong hem i tekem ples blong ol harem nogud long sol blong hem. Hem i kasem fogivnes from we hem i gat fet long Jisas Kraes mo hem i bin sakem sin.
Stat long taem ia i go Alma i bin stap tijim ol pipol abaot gospel blong mekem se olgeta tu i save filim semfala glad ia olsem we hem i bin filim. God i bin blesem Alma from tras blong hem long God.
Alma i givim ol tabu rekod long Hileman mo i talem long hem blong i gohed blong raetem ol histri blong ol pipol blong olgeta.
Alma i talem long hem se sapos hem i kipim olgeta komanmen, God bae i blesem hem mo helpem hem blong protektem ol rekod ia.
Alma i talem long Hileman tu blong prea evri moning mo naet mo blong toktok wetem God abaot evri samting we hem i stap mekem blong mekem se God i save help blong givim daereksen long hem.
Alma hem i glad long boe blong hem Siblon, we i bin wan gudfala misinari long Ol Man blong Soram. Siblon i bin stap fetful iven long taem we oli bin stonem hem.
Alma i rimaenem Siblon se wan wei nomo we man i save sef i tru long Jisas Kraes. Alma i gohed blong leftemap tingting blong ol boe blong hem blong gohed blong tijim gospel.
Boe blong Alma Korianton i no bin kipim olgeta komanmen. Hem i no bin wan fetful misinari taem hem i stap tijim Ol Man blong Soram.
From wanem we Korianton i bin mekem, Ol Man blong Soram oli no wantem biliv long ol tijing blong Alma.
Alma i talem long Korianton se ol pipol i no save haedem ol sin blong olgeta long God mo tu se Korianton i nid blong sakem sin.
Alma i tijim boe blong hem se evri wan bae i laef bakegen long ded be olgeta nomo we i stret mo gud bae i laef wetem God.
Laef ia i taem blong rere blong mitim God, Alma i talem.
Rimaenem Korianton se oli bin singaotem hem blong kam wan misinari, Alma i talem long hem blong kambak long Ol Man blong Soram mo tijim ol pipol blong sakem sin.
Alma mo ol boe blong hem oli gohed blong tijim gospel. Oli tij wetem paoa blong prishud.