Pōpoaki mei he Kau Palesitenisī ʻUluakí

Siʻomau kāinga ʻofeina kei talavou,

ʻOku mau ʻofa mo falala atu kiate kimoutolu. ʻOku mou kau moʻoni ʻi he ngaahi laumālie fili ʻa e Tamai Hēvaní, ne ʻomi ki māmani he taimi ko ʻení ke fakahoko ha ngaahi meʻa mahuʻinga.

ʻE ʻi ai pē ha ngaahi taimi he ʻikai te mou ongoʻi mālohi pe lavameʻa ai. Ko ha meʻa angamaheni pē ia. Tafoki ki he Fakamoʻuí, kae tautautefito ki he ngaahi momeniti ko iá. Ko e Ia ʻa e “mālohinga ʻo e toʻu tupú.”

ʻE tokoni atu ʻa e fakahinohino ko ʻení ke mou langa ha makatuʻunga mālohi ki hono fakahoko ha ngaahi fili ke nofo maʻu ʻi he hala ʻo e fuakavá. ʻE tokoni atu ia ke mou teuteu ke fakahoko e ngaahi fuakava toputapu ʻi he temipalé, teuteu ke ngāue fakafaifekau, pea fiefia ʻi he muimui kia Sīsū Kalaisí ʻi he kotoa hoʻomou moʻuí. ʻOku mau fakatauange ʻoku mou ongoʻi ʻoku mou kau ki he Siasi ʻo e Fakamoʻuí mo maʻu ʻa e mālohi meiate Ia ke fakahoko ʻEne ngaahi taumuʻa maʻamoutolú.

ʻOku mau ʻilo ʻoku moʻui ʻa e ʻOtuá. Ko ʻemau lotú ia ke mou nofo maʻu ʻi he hala ʻo e fuakavá ʻa ia te mou foki ai ki hoʻomou Tamai ʻi Hēvaní. ʻI hoʻomou fai iá, te mou hoko ko ha ivi tākiekina ki he leleí, ʻi hono vahevahe fiefia e ongoongoleleí mo teuteuʻi e māmaní ki he Hāʻele ʻAnga Ua Mai ʻa e Fakamoʻuí.

Ko e Kau Palesitenisī ʻUluakí