Maʻu ʻa e Fiefiá ʻia Kalaisi

ʻOku mahuʻinga e ngaahi filí. Ko e ngaahi fili ʻoku fakatefito ʻi he ngaahi akonaki ʻo e ongoongoleleí ko ha ngaahi sitepu ia te nau tataki koe ke ke ofi ange ai ki hoʻo Tamai Hēvaní mo Sīsū Kalaisi. Naʻe folofola ʻa Sīsū ʻo pehē, “Kuó u lea ʻaki ʻa e ngaahi meʻá ni kiate kimoutolu, … pea ke kakato ai hoʻomou fiefiá” (Sione 15:11). ʻI he sitepu kotoa pē kiate Ia, te ke ongoʻi ofi ange ai ki he Laumālié pea ʻe toe mālohi ange ho vā fetuʻutaki fuakava mo e ʻOtuá.

Ka ʻoku ʻikai ʻuhinga ia he ʻikai ke ʻi ai ha palopalema ʻi he hala fonongá. Pea koeʻuhí ʻoku ʻikai lue ha taha ʻi ha laine hangatonu moʻoni, vakaiʻi maʻu pē ʻalungá mo fakaʻapaʻapaʻi e ngaahi fekau ʻa e ʻOtuá. Tauhi hoʻo ngaahi fuakava mo e ʻOtuá, pea teuteu ke fakahoko ha meʻa lahi ange. ʻOku fakafehokotaki koe ʻe he ngaahi fuakavá ki he Tamai Hēvaní mo e Fakamoʻuí. ʻOku nau fakatupulaki e mālohi ʻo e ʻOtuá ʻi hoʻo moʻuí mo teuteuʻi koe ke maʻu ʻa e moʻui taʻengatá.

ʻI he ngaahi fili kotoa pē ʻoku malavá, ko e meʻa ʻoku mahuʻinga tahá ko e fili ko ia ke muimui ʻia Sīsū Kalaisí. Ko Ia ʻa e mālohinga ʻo e toʻu tupú. Ko ʻEne ongoongoleleí ʻa e founga fakafiefia taha ke foki ai ki hoʻo Tamai Hēvaní.