Fakalahi ki he Tohí

Ko e founga ʻe taha ke vakaiʻi ai hoʻo fakalakalaka ʻi he hala ʻo e fuakavá ko hoʻo fakalaulauloto ki he ngaahi fehuʻi ʻi laló. Ko ha ngaahi fehuʻi ia ʻoku fai atu ʻi he taimi ʻoku ʻinitaviu ai koe ke maʻu ha lekomeni temipalé, kae ʻoua ʻe tatali ki ha ʻinitaviu. Fakahoko hoʻo vakaiʻi fakalaumālie fakataautahá. ʻE lava foki ke hoko e Kaveinga ʻo e Kau Finemuí, Kaveinga ʻo e Kōlomu ʻo e Lakanga Taulaʻeiki Faka-ʻĒloné mo e Fekau ʻe Hongofulú ko ha meʻangāue ʻaonga ʻi hoʻo vakaiʻi fakataautaha pē koé.

Ngaahi fehuʻi lekomeni temipale maʻá e toʻu tupú

ʻOku ʻi ai nai haʻo tui mo ha fakamoʻoni ki he ʻOtua, ko e Tamai Taʻengatá; ki Hono ʻAlo ko Sīsū Kalaisí; pea mo e Laumālie Māʻoniʻoní?

ʻOku ʻi ai nai haʻo fakamoʻoni ki he Fakalelei ʻa Sīsū Kalaisí mo Hono tufakanga ko ho Fakamoʻui mo e Huhuʻí?

ʻOku ʻi ai nai haʻo fakamoʻoni ki hono Fakafoki Mai ʻo e ongoongolelei ʻo Sīsū Kalaisí?

ʻOkú ke poupouʻi nai ʻa e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e palōfita, tangata kikite, mo e tangata maʻu fakahā pea ko e tangata pē ia ʻe taha ʻi he māmaní ʻoku fakamafaiʻi ke ne ngāue ʻaki ʻa e ngaahi kī kotoa ʻo e lakanga fakataulaʻeikí? ʻOkú ke poupouʻi nai ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā? ʻOkú ke poupouʻi nai mo e kau Taki Māʻolunga kehé pea mo e kau taki fakalotofonua ʻo e Siasí?

Kuo ʻosi folofola ʻa e ʻEikí ke “fai ʻa e meʻa kotoa pē ʻi he maʻa” ʻi Hono ʻaó (Tokāteline mo e Ngaahi Fuakava 42:41). ʻOkú ke feinga nai ke moʻui maʻa ʻi hoʻo ngaahi fakakaukaú mo e tōʻongá? ʻOkú ke talangofua nai ki he fono ʻo e angamaʻá?

ʻOkú ke muimui nai ki he ngaahi akonaki ʻo e Siasi ʻo Sīsū Kalaisí ʻi hoʻo tōʻonga fakafoʻituituí pea ʻi hoʻo tōʻonga he kakaí mo e kau mēmipa ho fāmilí mo e niʻihi kehé?

ʻOkú ke poupouʻi nai pe taukaveʻi ha faʻahinga akonaki, angafai, pe tokāteline ʻoku fehangahangai mo ia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

ʻOkú ke feinga nai ke tauhi ʻa e ʻaho Sāpaté ke māʻoniʻoni, ʻi ʻapi pea mo e lotú fakatouʻosi; ʻalu ki hoʻomou ngaahi fakatahá; teuteu pea maʻu ʻi he tuʻunga taau ʻo e sākalamēnití; pea moʻui ʻo fakatatau mo e ngaahi fono mo e ngaahi fekau ʻo e ongoongoleleí?

ʻOkú ke feinga nai ke faitotonu ʻi he ngaahi meʻa kotoa ʻokú ke fakahokó?

ʻOkú ke totongi vahehongofulu kakato nai?

ʻOku mahino nai kiate koe pea ʻokú ke tauhi ʻa e Lea ʻo e Potó?

ʻOku ʻi ai nai ha faʻahinga angahala mamafa ʻi hoʻo moʻuí ʻoku fie maʻu ke fakaleleiʻi mo e kau maʻu mafai ʻo e lakanga fakataulaʻeikí ko ha konga ia ʻo hoʻo fakatomalá?

ʻOkú ke pehē ʻokú ke taau nai ke hū ki he fale ʻo e ʻEikí mo kau ʻi hono fakahoko ʻo e ngaahi ouau fakatemipalé?

Kaveinga ʻo e Kau Finemuí

Ko ha ʻofefine ʻofeina au ʻo ha ongomātuʻa fakalangi, ʻoku ʻi ai hoku natula faka-ʻOtua mo e ikuʻanga taʻengata.

ʻI heʻeku hoko ko ha ākonga ʻa Sīsū Kalaisí, ʻoku ou fāifeinga ke hoko ʻo hangē ko Iá. ʻOku ou fekumi pea ngāueʻi e fakahā fakatāutahá pea ngāue fakaetauhi ki he niʻihi kehé ʻi Hono huafa māʻoniʻoní.

Te u tuʻu ko ha fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē pea ʻi he feituʻu kotoa pē.

ʻI heʻeku fāifeinga ke taau mo e hākeakiʻí, ʻoku ou mataʻikoloa ʻaki e meʻaʻofa ʻo e fakatomalá mo feinga ke fakalakalaka ʻi he ʻaho takitaha. Te u fakamālohia hoku ʻapí mo e fāmilí, fakahoko mo tauhi e ngaahi fuakava toputapú, pea maʻu e ngaahi ouau mo e ngaahi tāpuaki ʻo e temipale māʻoniʻoní ʻi he tui.

Kaveinga ʻo e Kōlomu ʻo e Lakanga Taulaʻeiki Faka-ʻĒloné

Ko ha foha ʻofeina au ʻo e ʻOtuá, pea ʻoku ʻi ai Haʻane ngāue ke u fakahoko.

Te u ʻofa ki he ʻOtuá ʻaki hoku lotó, iví, ʻatamaí mo e mālohi kotoa pea tauhi ʻeku ngaahi fuakavá, pea fakaʻaongaʻi Hono lakanga fakataulaʻeikí ke tokoniʻi e niʻihi kehé, ʻo kamata ʻi hoku ʻapi ʻoʻokú.

ʻI heʻeku fāifeinga ke tokoni, ngāue ʻi he tuí, fakatomala pea fakalakalaka ʻi he ʻaho kotoá, te u feʻunga ai ke maʻu ʻa e ngaahi tāpuaki ʻo e temipalé pea mo e fiefia tuʻuloa ʻo e ongoongoleleí.

Te u teuteu ke hoko ko ha faifekau faivelenga, husepāniti mateaki mo ha tamai angaʻofa ʻi heʻeku hoko ko ha ākonga moʻoni ʻa Sīsū Kalaisí.

Te u tokoni ki hono teuteu ʻo e māmaní ki he toe hāʻele mai ʻa e Fakamoʻuí ʻaki hono fakaafeʻi e tokotaha kotoa ke haʻu kia Kalaisi pea maʻu e ngaahi tāpuaki ʻo ʻEne Fakaleleí.

Ko e Ngaahi Fekau ʻe Hongofulú

ʻOua naʻá ke maʻu mo au ha ʻotua kehe ʻi hoku ʻaó.

ʻOua naʻá ke ngaohi kiate koe ha fakatātā.

ʻOua naʻá ke takuanoa ʻa e huafa ʻo e [ʻEikí] ko ho ʻOtuá.

Manatu ki he ʻaho sāpaté, ke tauhi ia ke māʻoniʻoni.

Fakaʻapaʻapa ki hoʻo tamaí mo hoʻo faʻeé.

ʻOua naʻá ke fakapō.

ʻOua naʻá ke tono fefine.

ʻOua naʻá ke kaihaʻa.

ʻOua naʻá ke tukuakiʻi ʻa ho kaungāʻapí.

ʻOua naʻá ke mānumanu.

Vakai, ʻEkesōtosi 20:3–17.