Karaoi rinerine aika a kaungaaki

Inanon Ibukin Kakorakoraia Kairake, ko na kunea ana reirei Iesu Kristo ao Ana burabeti. Ma koaua aikai ake a riki bwa kairam, ko kona ni karaoi rinerine aika kaungaaki are e na kakabwaiako ibukin ngkai ao n aki tokina.

Iesu Kristo bon te kawai nakon te kimwareirei ae akea tokina. Ngkai ko kabongana inaomatam n rinerine ni iriira Iesu Kristo, ko a mena iaon te kawai are kairi nakon te kakukurei. Karika Iesu Kristo bwa am kainibaire, te atiibu ae matoatoa bwa aam. Katea maium iaon Ana reirei, ao katinei am rinerine mai iai. Berita aika tabu ake ko karaoi n te bwabetito, inanon te toa, ao inanon te tembora bon taian atiibu ni kateitei man aam ae matoa iroun Kristo. Ko na teimatoa n rinanon ikakorakora ma kariiriaki, ma Tamara are i Karawa ao te Tia Kamaiu a na buokiko n rinanoia ni kabane.

Ngkoe natin te Atua n tamnei ae bati n tangiraki. Ana babaire ni kakukurei ae korakora e kangaraoia ibukim bwa ko na rikirake n te maiu n tamnei ao karikirakea am konabwai mai ieta. Aio bukina E kanakoa Iesu Kristo n riki bwa am Tia Kamaiu.

Tamara are i Karawa e onimakiniko. E a tia n anganiko te kakabwaia aika a korakora, n ikotaki ma bwaninin te euangkerio ao otenanti aika tabu ao berita are e kabaeko Nakoina ao ni uoti Mwaakana inanon maium. Ma kakabwaia akanne a roko ni karakai mwiokoara. E ataia ae ko kona ni karaoa te kaokoro n te aonaaba, ao are e kainanoaki, n arona aika mwaiti, n riki ni kaokoro man te aonaaba. Ukora ana kairi Tamam are i Karawa ngkai ko karaoa am rinerine. E na kakabwaiako ma te kaunganano rinanon te Tamnei ae Raoiroi.

Te kantaninga Ibukin Kakorakoraia Kairaki tiaki bwa e na anganiko te “eng” ke “tiaki” iaon angaraoia ni kabane rinerine ake ko na kaaitarai. Onean mwina, te Uea e kaoko ni maiu inanon te rietaata ma mimitongin te kawai—Ana kawai. Te kairi aei e na reireiniko taekan Ana kawai. E kabwarabwarai koaua are E a tia ni kaotia. Karaoi koaua aikai bwa kairi ibukin karaoan rinerine—rinerine aika bubura, n aron karaoan berita aika tabu n te tembora ao mwakuri ni mitinare, ti te arona naba ma rinerine ni katoa bong, n aron bwa ko na kanga n akoiia aomata ke ko na kanga ni baronga raoi am tai.

Ngkai tabeman a kona ni ibuobuoki, rikirakem n te maiu n tamnei e bon nakoim. Bon ti imarenam ma te Uea. E ataa nanom, ao bon tii Ngaia are e kona n riki bwa te kaitira n Tia Moti. Karaoa tamaroam ni katamaroa am bong nako, kawakin ana tua te Atua ao kawakin am berita, ao buokiia tabeman ni kaan nakon te Tia Kamaiu.

Taraa Motiaea 4:29–30 (a rang mwaiti kawain te bure, ngaia are ti riai n tarataraira); Ereman 5:12 (katea aami iroun Kristo); Reirei ao Berita aika Tabu 45:57 (anaa te Tamnei ae Raoiroi ibukin kairaia); 82:15 (kabaeingkami n te berita ae tabu nakon te Uea).

E kanga te kairi aei ni barongaaki

Taobiki n tatabeua iai teniua mwakorona:

1. Koaua aika akea tokiia, ke reirei man ana euangkerio Iesu Kristo ae kaokaki

2. Kakao ni mwakuri iaon koaua akanne

3. Beritanakin kakabwaia are te Uea e anga nakoia koraki ake a maiuakina Ana reirei