Mekem ol joes tru insperesen

Insaed long Blong Ol Yut Oli kam Strong, bae yu faenem ol tijing blong Jisas Kraes mo ol profet blong Hem. Wetem ol trutok ia olsem gaed blong yu, yu save mekem ol joes tru long Mekem ol joes tru insperesen we bae i blesem yu nao ia mo blong taem we i no save finis.

Jisas Kraes i rod blong glad we i no save finis. Taem yu yusum fridom blong jus blong folem Jisas Kraes, yu stap long rod we i lid i go long glad we i no save finis. Mekem Jisas Kraes i standed blong yu, strong fandesen ston blong yu. Bildim laef blong yu long tijing blong Hem, mo skelem ol joes blong yu tru long olgeta. Ol kavenan we yu mekem long baptaes, long taem blong sakramen, mo insaed long tempol i ol brikis blong fandesen blong yu long Kraes. Bambae yu gohed blong fesem ol hadtaem mo temtesen be Papa long Heven mo Sevya bae i helpem yu go tru evriwan.

Yu yu wan spirit pikinini blong God we Hem i lavem yu tumas. Plan blong hapines blong Hem i mekem i posibol blong yu kam antap long saed blong spirit mo developem tabu paoa blong yu. hem ia from wanem Hem i sendem Jisas Kraes blong kam Sevya blong Yu.

Papa blong yu we i stap long Heven i trastem yu. Hem i givim yu ol bigfala blesing, we i tekem tu gospel ia we i fulwan mo ol tabu odinens mo ol kavenan we i fasem yu wetem Hem mo i karem paoa blong Hem i kam insaed long laef blong yu. Wetem ol blesing ia, oli ademap moa responsabiliti. Hem i save se yu save mekem wan samting i defren long wol, mo hem ia i nidim long plante wei, blong stap defren long wol. Lukaotem help long Papa blong yu long Heven taem yu mekem ol joes. Bae Hem i blesem yu wetem insperesen we i kam long Tabu Spirit.

Stamba tingting blong Blong Ol Yut oli Kam Strong i no blong givim wan “yes” o “no” long evri joes we bae i kam we yu save fesem. Be, Lod i stap invaetem yu blong laef long wan hae mo tabu wei—wei blong Hem. Gaed ia bae i tijim yu abaot wei blong Hem. hem ia i eksplenem ol trutok we Hem i soemaot. Mekem ol trutok ia oli ol help blong yu blong mekem ol joes—ol bigfala joes olsem stap mekem ol kavenan insaed long tempol mo stap givim seves long wan fultaem misin, mo tu ol evri dei joes, olsem wanem blong tritim ol man o olsem wanem blong spendem taem blong yu.

Ol narawan oli save helpem yu, be blong kam antap long saed blong spirit hem i stap long yuwan hem ia i stap bitwin yu mo Lod Hem i save hat blong yu, mo Hem nomo i save jajem yu. Mekem bes blong yu blong kam gud evri dei, kipim ol komanmen blong God mo onarem ol kavenan blong yu, mo helpem ol narawan blong kam kolosap long Sevya.

Luk long Mosaea 4:29–30 (ol wei blong sin oli plante tumas, be yumi wajem yumiwan); Hileman 5:12 (bildim fandesen blong yu long Kraes); Ol Doktrin mo Kavenan 45:57 (yusum Tabu Spirit blong i lidim yu); 82:15 (yu i joen long Lod tru long ol kavenan).

Olsem wanem oli oganaesem gaed buk ia

Wanwan topik i gat tri pat:

1. Trutok we i no save finis, o doktrin blong gospel blong Jisas Kraes we i kambak

2. Invitesen blong folem ol trutok ia

3. Ol promes blesing we Lod i givim long olgeta we oli laef folem ol tijing blong Hem