Fai ni filifiliga musuia

I le Mo Le Malosi o le Autalavou, o le a e maua ai aoaoga a Iesu Keriso ma Ana perofeta. Faatasi ai ma nei upumoni e fai ma ou taiala, e mafai ona e faia ni filifiliga musuia o le a faamanuiaina ai oe i le taimi nei ma le faavavau atoa.

O Iesu Keriso o le ala i le olioli e faavavau. A o e faaaogaina lou saolotoga e filifili ai e mulimuli ia Iesu Keriso, ua e i ai i luga o le ala lea e tau atu i le fiafia e faavavau. Ia avea Iesu Keriso ma ou tulaga faatonuina, lou faavae mausali. Fausia lou olaga i Ana aoaoga, ma fua au filifiliga e ala i na aoaoga. O feagaiga e te osia i le papatisoga, i le taimi o le faamanatuga, ma i totonu o le malumalu o poloka ia e fausia ai lou faavae mausali ia Keriso. O le a e feagai pea ma tauiviga ma faaosoosoga, ae o le a fesoasoani le Tama Faalelagi ma le Faaola ia te oe i na mea uma.

O oe o se atalii/afafine faapelepele o le Atua. O Lana fuafuaga sili o le fiafia ua mafai ai e oe ona tuputupu ae faaleagaga ma atiina ae lou gafatia paia. O le mafuaaga lea na Ia auina mai ai Iesu Keriso e avea ma ou Faaola.

E faatuatuaina oe e lou Tama oi le Lagi. Ua Ia tuuina atu ia te oe faamanuiaga silisili, e aofia ai le atoaga o le talalelei ma sauniga ma feagaiga paia e fusia ai oe ia te Ia ma aumaia ai Lona mana i lou olaga. Faatasi ai ma na faamanuiaga e oo mai ai le tiutetauave faaopoopo. Na te silafia e mafai ona e faia se eseesega i le lalolagi, ma e manaomia ai, i le tele o tulaga, le ese mai le lalolagi. Saili le taitaiga a lou Tama Faalelagi a o e faia filifiliga. O le a Ia faamanuiaina oe i uunaiga e ala i le Agaga Paia.

O le faamoemoega o le Mo le Malosi o le Autalavou e le o le tuuina atu ia te oe o se “ioe” po o le “leai” e uiga i filifiliga uma e ono feagai ma oe. Nai lo lena, o loo valaaulia oe e le Alii ia ola i se ala maualuga atu ma paia atu—Lana ala. O lenei taiala o le a aoao ai oe e uiga i Lana ala. O loo faamalamalama mai ai upumoni ua Ia faaalia mai. Ia avea nei upumoni ma ou taiala mo le faia o filifiliga—filifiliga tetele, e pei o le osia o feagaiga i le malumalu ma le auauna atu i se misiona, faapea foi filifiliga i aso taitasi, e pei o le auala e taulima ai tagata po o le auala e faaalu ai lou taimi.

E ui e mafai ona fesoasoani isi ia te oe, ae o lou tuputupu ae faaleagaga e patino ia te oe lava. E i le va o oe ma le Alii. Na te silafia lou loto, ma e na o Ia lava e mafai ona avea ma Faamasino sili. Fai le mea sili e te mafaia e faaleleia atili ai i aso taitasi, tausi poloaiga a le Atua ma faamamalu au feagaiga, ma fesoasoani i isi ia faalatalata atili atu i le Faaola.

Tagai Mosaea 4:29–30 (o auala e agasala ai e le mafaitaulia, o lea e tatau ai ona tatou vaavaaia i tatou lava); Helamana 5:12 (fausia lou faavae i luga o Keriso); Mataupu Faavae ma Feagaiga 45:57 (ave le Agaga Paia mo lou taiala); 82:15 (fusia oe lava i le Alii e ala i feagaiga).

Auala o loo faatulaga ai le taiala lenei

O autu taitasi e tolu ona vaega:

1. O upumoni e faavavau, po o aoaoga faavae o le talalelei toefuataiina a Iesu Keriso

2. Valaaulia tagata aoga e faatino na upumoni

3. Faamanuiaga folafolaina ua ofoina mai e le Alii ia i latou o e ola i Ana aoaoga