Mauaina o le olioli ia Keriso

E taua filifiliga. O filifiliga e faavae i aoaoga o le talalelei o laasaga ia e taitai atu ai oe ia latalata atili i lou Tama Faalelagi ma Iesu Keriso. Mo lenei mafuaaga na fetalai ai le Faaola, “Ua ou fai atu nei mea ia te outou, … ia atoatoa foi lo outou olioli” (Ioane 15:11). Faatasi ai ma laa taitasi agai atu ia te Ia, o le a e lagona ai le latalata atili atu i le Agaga ma o le a atili malosi ai lau sootaga faalefeagaiga ma le Atua.

Ae e le faapea ai la o le a saoloto ai le ala. Ma talu ai e leai se tasi e savalia se laina sa’o atoatoa, ia siaki e le aunoa lau taitaiga ma faamamalu i poloaiga a le Atua. Tausi au feagaiga ma le Atua, ma saunia e osia nisi mea. O feagaiga e fesootai atu ai oe i le Tama Faalelagi ma le Faaola. Latou te faateleina le mana o le Atua i lou olaga ma saunia oe ia maua le ola e faavavau.

Mai filifiliga uma e mafai ona i ai, o le filifiliga e sili ona taua o le filifiliga lea e mulimuli ia Iesu Keriso. O Ia o le malosi o le autalavou. O Lana talalelei o le auala fiafia lea e toe foi atu ai i lou Tama Faalelagi.