O le a fesoasoani Iesu Keriso ia oe

Salamo 147:3

O Iesu Keriso o lou malosi lea. Ua Ia faia mea uma e tatau ai mo oe e maua ai le olioli i lenei olaga ma le faavavau. O le filifilia o Ia ma Lana talalelei, ua e filifili ai le olioli e faavavau.

E tusa lava pe e te taumafai e fai le mea sili e fai ai filifiliga lelei, o nisi taimi o le a e faia ai ni mea sese. O le a e faia mea e te moomoo maimau pe ana e le faia. E faapena tagata uma. A tupu lena mea, e faigofie ona lagona le lotovaivai po o le mafaufau pe o le a lava lou lelei. Ae o loo i ai se tala fiafia—tala matagofie, ma le faamoemoe! Ona e alofa le Atua ia te oe, na Ia auina mai ai Lona Alo, o Iesu Keriso, o le na tauaveina i Ona lava luga au agasala ina ia mafai ai ona e salamo ma faaauau pea ona alualu i luma.

Upumoni e faavavau

E mafai e Iesu Keriso ona faamalosia oe. E mafai ona Ia fesoasoani ia te oe e suia ou manaoga, ou mafaufauga, ma au amioga. Pe a e popole, fefe, pe tauivi i soo se auala, o le a Ia faamafanafanaina oe. O le a Ia fesoasoani ia te oe i vaega uma o lou olaga.

O le salamo e le o se faasalaga mo le agasala; o le ala lea e faasaoloto ai i tatou e le Faaola mai le agasala. O le salamo o lona uiga o le suia—ia liliu ese mai le agasala ma agai atu i le Atua. O lona uiga o le faaleleia ma maua le faamagaloga. O lenei ituaiga o suiga e le o se mea e tasi le taimi e tupu ai; o se faagasologa faifai pea.

Valaaulia

Salamo. Liliu atu i le Alii ma le manao ia faaleleia atili. Pe a e faia se mea sese, ioe ma le faamaoni i luma o le Atua ma, pe a manaomia, i lou epikopo ma soo se tasi atonu na afaina ia oe. Fai le mea sili e faasa’o ai mea uma.

Olioli i le meaalofa ina ia faia ia lelei atili ma sili atu. E tusa lava pe le faigofie ma umi atu se taimi e alu ai nai lo le mea e te manao ai, aua lava nei taofia le taumafai. Galue pea ma faalagolago i le Alii. O le a fesoasoani le Faaola ia te oe i laasaga uma o le ala.

Faamanuiaga folafolaina

O le a faamagalo ma faamalolo oe e Iesu Keriso pe a e salamo. O le a Ia suia lou tausalaina i le filemu ma le olioli. O le a Ia le toe manatuaina au agasala. I Lona malosi, o le a faateleina lou naunau e tausi Ana poloaiga.

O le a Ia suia lou loto ma lou olaga. O sina mea itiiti i lea mea itiiti, o le a e tuputupu ae ai ma avea atili e faapei o Ia. O lau sootaga faalefeagaiga ma Ia o le a aumaia ia te oe le avanoa sili atu i Lona mana.

Fesili ma tali

E mafai faapefea ona ou iloa ua faamagaloina A’u e le Atua? Ua folafola mai e le Atua o le a Ia faamagaloina i latou o e salamo. Pe a e lagonaina le mafanafana mai le Agaga, e mafai ona e iloa o loo galue le mana togiola o le Faaola i lou olaga.

O afea ou te manaomia ai le fesoasoani a le epikopo ia salamo? O lou epikopo e umia ki o le perisitua ma meaalofa faaleagaga e fesoasoani ia te oe ia salamo. E mafai ona e sailia lana fesoasoani ma fautuaga i soo se taimi. Afai na e faia ni mea sese matuia, e pei o le solia o le tulafono o le legavia, feiloai ma lou epikopo. Na te le tausalaina oe. O ia o se sui o Iesu Keriso ma o le a fesoasoani ia te oe ia iloa le ala e salamo atoatoa ai ma maua le mana faamalolo ma le mana faamalosiau o le Faaola.

O loo ou taumafai e salamo, ae ou te faia pea ia mea sese e tasi. O le a le mea e tatau ona ou faia nei? E alu le taimi e atiae ai ni mausa lelei ma gauia ai ni mausa leaga, o lea aua le fiu. Liliu atu ia Keriso. Ua lava ma totoe Lona alofa tunoa. Toe taumafai. E le o tuua na o oe i au taumafaiga e alualu ai i luma. E i ai Iesu Keriso faatasi ma oe i taimi uma.

Tagai i le Enosa 1:6 (e mafai ona tafiese le tausalaina); Mosaea 4:3 (e ala i le Agaga Paia, e ta’u atu ai e le Atua ia te oe ua faamagaloina oe); 26:30 (e faamagalo e le Faaola i taimi uma tatou te salamo ai); Eteru 12:27 (o le alofa tunoa o le Faaola e mafai ona faamalosia ai mea vaivai); Moronae 6:8 (e faamagaloina i latou o e salamo); 10:32 (ia faaatoatoaina ia Keriso); Mataupu Faavae ma Feagaiga 1:32 (e faamagalo e le Alii i latou o e salamo); 58:42–43 (o le salamo e aofia ai le ta’uta’u atu ma le lafoaia o le agasala).

Fesili o le faatalanoaga o pepa faataga o le malumalu

E i ai sou faatuatua ma sau molimau i le Atua, le Tama Faavavau; o Lona Alo, o Iesu Keriso; ma le Agaga Paia?

E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola?