ʻE tokoniʻi koe ʻe Sīsū Kalaisi

Saame 147:3

Ko Sīsū Kalaisi ho mālohingá. Kuó Ne fai ʻa e meʻa kotoa pē ʻoku fie maʻu ke ke fiefia ai ʻi he moʻuí ni mo e taʻengatá. ʻI hoʻo fili Ia mo ʻEne ongoongoleleí, ʻokú ke fili ai ʻa e fiefia taʻengatá.

Naʻa mo e taimi ʻokú ke feinga ai ke fai ho lelei tahá ke fai e ngaahi fili ʻoku leleí, ʻe ʻi ai pē taimi te ke fai ai ha ngaahi fehalaaki. Te ke fakahoko ha ngaahi meʻa ʻokú ke fakaʻamu naʻe ʻikai ke ke fakahoko. ʻOku pehē ʻa e tokotaha kotoa pē. ʻI he taimi ʻe hoko ai ʻení, ʻoku faingofua ke ke ongoʻi loto-foʻi pe fifili pe te ke toe lelei feʻunga nai. Ka ʻoku ʻi ai ha ongoongo —fakafiefia, fakaofo mo ʻamanaki lelei. Koeʻuhí ʻoku ʻofa ʻa e ʻOtuá ʻiate koe, naʻá Ne fekauʻi mai Hono ʻAlo ko Sīsū Kalaisí, ʻa ia naʻá Ne toʻo kiate Ia hoʻo ngaahi angahalá koeʻuhí ke ke lava ʻo fakatomala mo fakalakalaka.

Ngaahi moʻoni taʻengatá

ʻE lava ke fakamālohia koe ʻe Sīsū Kalaisi. Te Ne lava ʻo tokoniʻi koe ke liliu hoʻo ngaahi holí, ngaahi fakakaukaú, mo hoʻo ngaahi tōʻongá. ʻI he taimi ʻokú ke hohaʻa, ilifia, pe faingataʻaʻia ai ʻi ha faʻahinga founga pē, te Ne fakafiemālieʻi koe. Te Ne tokoniʻi koe ʻi he tapa kotoa pē ʻo hoʻo moʻuí.

Ko e fakatomalá ʻoku ʻikai ko ha tautea ia ʻo e angahalá; ka ko e founga ia ʻoku fakatauʻatāinaʻi ai kitautolu ʻe he Fakamoʻuí mei he angahalá. ʻOku ʻuhinga ʻa e fakatomalá ke liliu—ke tafoki mei he angahalá [kae hanga] ki he ʻOtuá. ʻOku ʻuhinga ia ke fakalakalaka pea maʻu ʻa e fakamolemolé. Ko e faʻahinga liliu ko ʻení ʻoku ʻikai ko ha meʻa ia ʻoku hoko tā tuʻo taha pē; [ka] ko ha founga ia ʻoku hokohoko atu.

Ngaahi Fakaafé

Fakatomala. Tafoki ki he ʻEikí mo ha holi ke fakalakalaka. ʻI he taimi kuó ke fai ai ha meʻa hala, fakahā totonu ia ʻi he ʻao ʻo e ʻOtuá pea, ʻo ka fie maʻu, ki hoʻo pīsopé mo ha taha pē kuó ke fakalaveaʻi. Fai ho lelei tahá ke fakatonutonu e ngaahi meʻá.

Fiefia ʻi he meʻaʻofa ke fai lelei ange pea hoko ʻo toe lelei ange. Naʻa mo e taimi ʻoku ʻikai faingofua ai pea fuoloa ange ʻi he meʻa naʻá ke loto ki aí, ʻoua naʻa tuku hoʻo feingá. Hokohoko atu hoʻo ngāue mo e falala ki he ʻEikí. ʻE tokoniʻi koe ʻe he Fakamoʻuí ʻi he foʻi laka kotoa pē ʻo hoʻo moʻuí.

Ngaahi tāpuaki kuo talaʻofa maí

ʻE fakamolemoleʻi mo fakamoʻui koe ʻe Sīsū Kalaisi ʻi hoʻo fakatomalá. Te Ne fetongi hoʻo ongoʻi halaiá ʻaki ʻa e fiemālié mo e fiefiá. He ʻikai ke Ne toe manatuʻi hoʻo ngaahi angahalá. ʻE tupulaki hoʻo holi ke tauhi ʻEne ngaahi fekaú ʻi Hono mālohí.

Te Ne liliu ho lotó mo hoʻo moʻuí. Te ke tupulaki māmālie pea hoko ʻo hangē ange ko Iá. ʻE ʻomi ʻe hoʻo fuakava mo Iá ha faingamālie lahi ange ki Hono mālohí.

Ngaahi fehuʻí mo e ngaahi talí

Te u ʻilo fēfē nai kuo fakamolemoleʻi au ʻe he ʻEikí? ʻOku talaʻofa mai ʻa e ʻOtuá te Ne fakamolemoleʻi ʻa kinautolu ʻoku fakatomalá. ʻI he taimi ʻokú ke ongoʻi fiemālie ai mei he Laumālié, te ke lava ʻo ʻiloʻi ʻoku ngāue ʻa e mālohi fakalelei ʻo e Fakamoʻuí ʻi hoʻo moʻuí.

Ko e fē ha taimi te u fie maʻu ai e tokoni ʻa e pīsopé ke fakatomalá? ʻOku maʻu ʻe hoʻo pīsopé ʻa e ngaahi kī ʻo e lakanga fakataulaʻeikí mo e ngaahi meʻafoaki fakalaumālié ke tokoniʻi koe ke ke fakatomala. Te ke lava ʻo fekumi ki heʻene tokoní mo e akonakí ʻi ha faʻahinga taimi pē. Kapau kuó ke fai ha ngaahi fehalaaki mamafa, hangē ko hono maumauʻi e fono ʻo e angamaʻá, talanoa mo hoʻo pīsopé. He ʻikai ke Ne fakahalaiaʻi koe. Ko ha fakafofonga ia ʻo Sīsū Kalaisi pea te ne tokoniʻi koe ke ke ʻiloʻi ʻa e founga ke fakatomala kakato ai mo maʻu ʻa e mālohi faifakamoʻui mo fakamālohia ʻo e Fakamoʻuí.

ʻOku ou feinga ke fakatomala, ka ʻoku ou kei fai pē ʻa e ngaahi fehalaaki tatau. Ko e hā ʻoku totonu ke u fai he taimi ní? ʻOku fie maʻu ha taimi ke fakatupulaki ai ha ngaahi tōʻonga moʻui ʻoku leleí pea motuhi ʻa e ngaahi ʻulungaanga koví, ko ia ʻoua naʻá ke foʻi. Tafoki kia Kalaisi. ʻOku feʻunga ‘a ʻEne ʻaloʻofá. Toe feinga pē. ʻOku ʻikai ke ke teitei tuenoa ʻi hoʻo feinga ke fakalakalaká. ʻOku ʻiate koe maʻu pē ʻa Sīsū Kalaisi.

Vakai, ʻĪnosi 1:6 (ʻe lava ke matafi atu ʻa e ongoʻi halaiá); Mōsaia 4:3 (ʻoku ʻai ʻe he ʻOtuá ke ke ʻiloʻi kuo fakamolemoleʻi koe, ʻo fakafou ʻi he Laumālie Māʻoniʻoní); 26:30 (ʻoku fakamolemoleʻi kitautolu ʻe he Fakamoʻuí ʻo fakatatau ki heʻetau toutou fakatomalá); ʻEta 12:27 (ʻe lava ke fakamālohia ʻe he ʻaloʻofa ʻa e Fakamoʻuí ʻa e ngaahi meʻa ʻoku vaivaí); Molonai 6:8 (ʻoku fakamolemoleʻi ʻa kinautolu ʻoku fakatomalá); 10:32 (hoko ʻo haohaoa ʻia Kalaisi); Tokāteline mo e Ngaahi Fuakava 1:32 (ʻoku fakamolemoleʻi ʻe he ʻEikí ʻa kinautolu ʻoku fakatomalá); 58:42–43 (ʻoku kau ʻi he fakatomalá ʻa hono vete mo siʻaki e faiangahalá).

Ngaahi fehuʻi lekomeni temipalé

ʻOku ʻi ai nai haʻo tui mo ha fakamoʻoni ki he ʻOtua, ko e Tamai Taʻengatá; ki Hono ʻAlo ko Sīsū Kalaisí; pea mo e Laumālie Māʻoniʻoní?

ʻOku ʻi ai nai haʻo fakamoʻoni ki he Fakalelei ʻa Sīsū Kalaisí mo Hono tufakanga ko ho Fakamoʻui mo e Huhuʻí?