Jisas Kraes bae i helpem yu

Ol Sam 147:3

Jisas Kraes i paoa blong yu. Hem i mekem evri samting we i impoten blong yu blong kasem glad long laef ia mo blong oltaem. Taem yu jusum Hem mo gospel blong Hem, yu stap jusum glad ia we i no save finis.

Nomata taem yu traem blong mekem bes blong yu blong mekem ol gud joes, samtaem bae yu save mekem ol mistek. Bae yu mekem ol samting we yu sapos blong no mekem.Evriwan i mekem. Taem hem ia i hapen, hem i isi blong harem nogud o gat tingting sapos bae yu kam gud bakegen. !Be i gat wan gud nius—i gud tumas, nius we i gat hop! From we God i lavem yu, Hem i sendem pikinini boe blong Hem Jisas Kraes, we i tekem long Hemwan sin blong yu blong yu save sakem sin mo gohed blong stap gro.

Trutok we i no save finis

Jisas Kraes i save mekem yu strong. Hem i save helpem yu jensem ol tingting blong hat, tingting blong maen, mo ol aksen blong yu. Taem yu wari, fraet, o stap harem nogud long eni wei, bae Hem i kamfotem yu. Bae Hem i helpem yu long evri saed long laef blong yu.

Fasin blong sakem sin i no wan panismen; hem i wei ia nao we Sevya i mekem yumi kam fri long sin. Blong sakem sin i minim blong jenis—blong tanem yu go we long sin mo tanem i go long God. I minim blong kam moa gud mo kasem fogivnes. Kaen jenis ia i no wan wan-taem iven; be i wan taem we i gogohed.

Ol Invitesen

Sakem sin. Stap dipen long Lod wetem tru tingting blong kam moa gud. Taem yu mekem samting we i no stret, ones blong talemaot long God mo sapos i nid talem long bisop blong yu mo eniwan we yu mekem nogud long hem. Mekem bes blong yu blong mekem samting i kam gud.

Stap glad long presen ia blong mekem gud mo kam gud. Nomata sapos i no isi mo i tekem taem, no stop blong stap traem. Gohed blong stap wok mo gat tras long Lod. Sevya bae i helpem yu long evri step blong wei.

Ol promes blesing

Jisas Kraes bae i fogivim mo hilim yu taem yu sakem sin. Bae Hem i putum bak pis mo glad blong tekem ples blong harem nogud blong yu. Bae Hem i nomo tingbaot ol sin blong yu. Long paoa blong Hem, tingting blong wantem tumas blong yu blong folem ol komanmen blong Hem bae i kam moa antap.

Bae Hem i jenisim hat blong yu mo laef blong yu. Sloslo bae yu gro mo kam moa olsem Hem. Koneksen kavenan blong yu wetem Hem bae i givim yu bigfala akses long paoa blong Hem.

Ol kwestin mo ansa

?Olsem wanem nao mi save sapos God i bin fogivim mi? God i promes blong fogivim olgeta we oli sakem sin. Taem yu filim kamfot we i kam long tabu spirit, yu save se paoa blong atonmen blong Sevya i stap wok long laef blong yu.

?Wetaem mi nidim help blong bisop blong sakem sin? Bisop blong yu i holem ol prishud ki mo ol presen blong spirit blong helpem yu sakem sin. Yu save lukaotem help blong hem mo kaonsel long eni taem. Sapos yu mekem ol mistek we i series olsem foldaon long loa blong jastiti, go luk bisop blong yu. Bae hem i no jajem yu. Hem i wan ripresentativ blong Jisas Kraes mo bae hem i helpem yu save olsem wanem blong sakem sin fulwan mo kasem hiling blong Sevya mo paoa blong kam strong.

Mi traem blong sakem sin be mi gohed blong mekem ol semmak mistek. ?Wanem nao bae mi mekem? I tekem taem blong developem ol gud fasin mo nomo mekem ol nogud fasin, be yu no givap. Lukluk long Kraes. Gladhat blong Hem i inaf. Traem bakegen. Yumi neva stap yuwan long ol hadwok blong yu blong stap gro. Jisas Kraes i oltaem stap wetem yu.

Luk long Inos 1:6 (Harem nogud i save go we); Mosaea 4:3 (tru long tabu spirit, God letem yu save se Hem i fogivim yu); 26:30 (Sevya i fogivim yumi taem yumi stap sakem sin); Ita 12:27 (Gladhat blong Sevya i save mekem ol samting we i no strong i kam strong); Moronae 6:8 (Olgeta we oli sakem sin oli kasem fogivnes); 10:32 (kam stret evriwan tru Kraes); Ol Doktrin mo Kavenan 1:32 (Lod i fogivim olgeta we oli sakem sin); 58:42–43 (fasin blong sakem sin i tekem tu fasin blong talemaot mo lego sin).

Ol kwestin blong tempol rekomen

?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?

?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?