Tangira te Atua, tangira kaain rarikim

Mataio 22:37–40

Ni buokiko ni karaoi rinerine aika eti, te Atua e anga tuua. E karaoa aei ibukina E tangiriko. Ao tamaroan nanon te ongeaaba n ana tua te Atua ko na Tangiria. Te tangira bon moan kakawakin ana tua te Atua.

Koaua aika akea tokiia

Te Atua e tangiriko. Bon Tamam ni koaua. Ana tangira ni koaua e kona ni kaungaa nanom bwa kona Tangiria. Ngkana am tangira ibukin Tamam are i Karawa bon moan te kakawaki ni kakairi inanon maium, am babaire aika mwaiti ana riki ni bebete.

Uoua tuua aika korakora iaoia, e reirei Iesu, bon tangira te Atua ao tangira kaain rarikim. Ao antai kaain rarikim? Ni kabane! Bwaai ni kabane ake a taekinaki inanon koroboki aika tabu ao mairouia burabeti a bon toma nakon tuua aika uoua aikai.

Ni kabane aomata bon tarim ao mwanem—ikotaki, eng ma, aomata ake a kaokoro ma ngkoe ke aaki boraraoi ma ngkoe. Te Tama are i Karawa e tangiriia natina bwa a na itangitangiri imarenaia. Ngkana ko beku ibukiia Natina, ko bon beku Ibukina.

Kakao

Kaotan te tangira ibukin te Atua man kawakinan Ana tua. Ibukin te katooto, man kawakinan te Tabati n tabuia, n ikotaki man kakaonimaki n tauraoi ibukin anaakin te toa, ni kaotia nakon te Atua bwa ko kukurei n anga teuana te bong n te wiiki Nakoina. Ngkana ko aki mamatam ao kabwaka am angamane n aki mamatam ao kabwianibwai, ko kaota nakon te Atua bwa Ana mwakuri bon moan kakawaki nakoim nakon bwain nako te aonnaba. Ngkana ko kabongana aran te Atua ao Kristo ma te rau, n akean te kainano ke kawai aika aki baireaki, ko kaota am kakaitau ibukin bwaai ni kabane ake A tia ni karaoi ibukim.

Akoiia ni kabane ngkai bon natin te Atua. Ngkai ana reirei Iesu Kristo ngkoe, ko kona ni kaotaa nako akoaia aomata ni kabane aika kaokoro aia reeti ao aia aaro ao tabeua kurubu nako ma te tangira, karinerine, ao mwaneakiia—riki koraki ake n tabetai a rootaki n te taetae n aki akaka ao mwakuri. Karoko nakoia naake a namakina te maroa, kararoaki, ke akean konabwaia. Buokiia n namakina ana tangira Tamara are i Karawa mairoum.

Kakoaua raoi bwa oin am taetae e na katerea ana tangira te Atua ao tabeman—tao ko taetae boni ngkoe ke itiakim. Taekin taeka aika kaunganano—akea are e na riki bwa ana kaokoroaki, kamarakaki, ke kaunuunaki, riki te manikangare. Am taeka a kona n riki ni korakora. A na riki ni korakora n akea tokina.

Tangiraia ni kabane natin te Atua e moanaki man te mweenga. Karaoa tibangam ni katea te mweenga bwa te tabo ike ni kabane a na kona n namakina ana tangira te Tia Kamaiu.

Berita aika beritanaki

Am reitaki ma te Atua e na nano ngkai ko kaota am tangira man ongeabam n Ana tua ao ni kawakin am berita aika tabu ma Ngaia.

Am reitaki ma tabeman e na nano ngkai ko kaota am tangira rinanon ana mwakuri n ibuobuoki Kristo. Ko na kunea te kimwareirei ni karaoa te aonaaba bwa te tabo ae raka te tatangira iai.

Titiraki ao kaekaaia

N na kanga n namakina ana tangira te Atua? Ana tangira Tamara are i Karawa e tatauraoi n taainako. Taetae Nakoina ni katoa tai rinanon te tataro. Tibwaua am namakin ma Ngaia, ao ongora ibukin taian namakin mai Irouna. Wareka Ana taeka inanon koroboki aika tabu. Iangoi bwaai ni kabane ake E a tia ni karaoia ibukim. Kabanea am tai n taabo ao waaki ni kakukurei ike Tamneina e mena iai.

E kantaningaai te Uea n tangiriia aomata ni kabane, e ngae ngkana koraki ake a karaoa ae buakaka nakoiu? Te Uea e kantaningaiko n tangiriia am kairiribai ao n tataro ibukiia koraki ake a bwainikiriniko. Ma, anne e aki nanonaki bwa ko riai n tiku n arom anne are e karika te namakin, rabwata, ke uruakin te maiu n tamnei. Katea tianakin marurungim ni kawakina kamanoan rabwatam. Ngkana e karaoaki te mwakuri n iowawa ke bwainikirinakim—ke ngkana ko ata aei ae tia n riki nakon temanna—marooro nakon te ikawai ae onimakinaki.

Ningai ao e kanga ae N na kinaia membwa ake kaitaraau te mwaane ke te aine? Te kawai ae tamaroa n ataakiia tabeman bon rinanon te iraorao ni koaua. Ngkai ko bon kairake, katea te iraorao ae tamaroa ma aomata aika mwaiti. N tabeua katei, kairake a kinaia membwa ake kaitaraaia te mwaane ke te aine rinanon tamaroan waaki ni kakukurei n te kurubu. Ibukin am namakin ao karikirakean ao kamanoan maium n tamnei, te waaki ni marooro temanna imwin temanna e riai n taonaki ni karokoa te tai are ko a tau—n ririki ae 16 bon te kainibaire ae tamaroa. Marooro ma am karo ao taan kairiiri. Taua moa te aki iraorao bukina ngkana ko a bon ikawai. Kabanea te tai ma koraki ake a buokiko ni kawakin am motinnano nakon Iesu Kristo.

Tera ae N na kona ni karaoia ngkana mweengau akea nnen te tangira iai? Am Tia Kamaiu e ataa aroarom, ao E tangiriko. Taotaona nanom, reitinako kawakin ana tua te Atua, ao kaota te banna ni katooto nakoia am utu. Katea te iraorao ma am utu n te uoote. Katauraoi ngkai ni katea oin am utu ni kuneaki iaon ana reirei Iesu Kristo.

Taraa Itaia 58:3–11 (bukin te aki mamatam); 58:13–14 (kakabwaia ni kawakinan te Tabati); Maraki 3:8–10 (kakabwaia ni kabwakaan kabwianibwai); Ruka 6:27–28 (tangiriia am kairiribai); 10:25–37 (antai kain rarikiu); Ioane 3:16–17 (E tangiriira te Atua, n te aro are E anga Natina); 14:15 (ti kawakin tuua ibukina ti tangira te Atua); 1 Ioane 4:19 (ti tangira te Atua ibukina E tangiriira); Motiaea 2:17 (ngkana ti beku ibukiia tabeman, ti beku naba ibukin te Atua).

Titiraki ibukin beeba ni kariaia nakon te tembora

Ko iriira ana reirei ana Ekaretia Iesu Kristo n anuam aika aki noraki ao aika noraki ma am utu ao tabeman?

Ko kekeiaki ni kawakina te bong ae te Tabati n tabuia, ni mweengam ao n te taromauri, ni kaakaei am bootaki, ni katauraoiko nakon ao ni kororaoi n anaa te toa; ao ni maiuakina maium ni kabooraoia ma tuua ao tuan te euangkerio?

Ko kakabwaka am kabwianibwai n ae e bwanin?