Alofa i le Atua, alofa i lou tuaoi

Mataio 22:37–40

Ina ia fesoasoani ia te oe e faia filifiliga lelei, e tuuina mai e le Atua poloaiga. Ua Ia faia lenei mea ona e alofa o Ia ia te oe. Ma o le mafuaaga sili e usitaia ai poloaiga a le Atua o lou alofa lea ia te Ia. O le alofa o loo i le ogatotonu/fatu o poloaiga a le Atua.

Upumoni e faavavau

E alofa le Atua ia te oe. O Ia o lou Tama. O Lona alofa atoatoa e mafai ona musuia ai oe e alofa ia te Ia. Afai o lou alofa mo le Tama Faalelagi o le faatosinaga aupito sili lea ona taua i lou olaga, e tele filifiliga o le a faigofie atu.

O poloaiga sili e lua o poloaiga uma, na aoao mai e Iesu, o le alofa lea i le Atua ma alofa i lou tuaoi. Ma o ai lou tuaoi? Tagata Uma! O isi mea uma o loo aoao mai i tusitusiga paia ma e ala i perofeta e fesootai i nei poloaiga e lua.

O tagata uma lava o ou uso ma tuafafine—e aofia ai, ioe, o tagata e ese mai ia te oe pe le malilie faatasi ma oe. E finagalo le Tama Faalelagi i Lana fanau ia alofa le tasi le isi. Pe a e auauna atu i Ana fanau, o loo e auauna atu ia te Ia.

Valaaulia

Faaalia lou alofa mo le Atua i le tausia o Ana poloaiga. Mo se faataitaiga, e ala i le tausia o le paia o le aso Sapati, e aofia ai le saunia ma le faamaoni mo ma ai ma inu i le faamanatuga, ua e faaali atu ai i le Atua ua e naunau e tuuto atu se aso se tasi o le vaiaso ia te Ia. A o e anapogi ma totogi sefuluai ma taulaga, ua e faaali atu i le Atua o Lana galuega e sili atu ona taua ia te oe nai lo mea faaletino. Pe a e faaaogaina suafa o le Atua ma Keriso ma le migao, e le faia lava i se auala le aoga pe faasamasamanoa, ua e faaali atu lou lotofaafetai mo mea uma ua La faia mo oe.

Taulimaina tagata uma o se atalii/afafine o le Atua. I le avea ai ma se soo o Iesu Keriso, e mafai ona e taimua i le taulimaina o tagata o ituaiga uma ma tapuaiga ma soo se isi lava vaega i le alofa, faaaloalo, ma le faaaofiaina—aemaise i latou o e e sauaina i nisi taimi i upu ma amioga faatiga. Aapa atu ia i latou o e lagonaina le tuuatoatasi, vavaeesea, po o le leai o se faamoemoe. Fesoasoani ia latou lagonaina le alofa o le Tama Faalelagi e ala atu ia te oe.

Ia mautinoa o lau gagana e atagia ai le alofa i le Atua ma isi—pe o e fesootai faaletagata pe faatekinolosi. Fai atu mea e faagaeetia—leai se mea e ono fevaevaeai, faatiga, pe faaita ai, e tusa lava pe o se tala malie. E mafai ona mamana au upu. Ia avea o ni upu mamana mo le lelei.

O le alofa i fanau uma a le Atua e amata i le aiga. Fai lau vaega e fai ai lou fale o se nofoaga e mafai ai e tagata uma ona lagonaina le alofa o le Faaola.

Faamanuiaga folafolaina

O le a faalolotoina lou sootaga ma le Atua a o e faailoa atu lou alofa e ala i le usiusitai i Ana poloaiga ma tausia au feagaiga ma Ia.

O le a faalolotoina lou sootaga ma isi a o e faailoa atu lou alofa e ala i auaunaga faaKeriso. O le a e maua le olioli i le faia o le lalolagi o se nofoaga e sili atu ona agaalofa.

Fesili ma tali

E faapefea ona e lagonaina le alofa o le Atua? O loo avanoa pea le alofa o le Tama Faalelagi. Talanoa soo ia te Ia e ala i le tatalo. Faasoa atu ou lagona ia te Ia, ma faalogo mo uunaiga mai ia te Ia. Faitau Ana upu i tusitusiga paia. Mafaufau i mea uma na Ia faia mo oe. Faaalu se taimi i nofoaga ma gaoioiga e i ai Lona Agaga.

Pe o faamoemoe mai ea le Alii ia ou alofa i tagata uma, e oo lava ia i latou o e agaleaga mai ia te a’u? Ua faamoemoe mai le Alii ia e alofa atu i ou fili ma tatalo mo i latou o e agaleaga ia te oe. Peitai, e le faapea ai la e tatau ona e tumau i se tulaga e afua ai ona e afaina faalelagona, faaletino, pe faaleagaga. Faatulaga ni tuaoi maloloina ina ia saogalemu ai oe lava. Afai o loo faafefeina oe pe sauaina—pe afai foi e te iloa o loo tupu lenei mea i se isi tagata—talanoa i se tagata matua faatuatuaina.

O afea ma e faapefea ona ou iloa tagata o le isi itupa? O le auala sili e faamasani ai i isi e ala lea i faigauo faamaoni. A o e talavou, fausia ni faauooga lelei ma le toatele o tagata. I nisi o aganuu, e iloa ai e le autalavou tagata o le itupa faafeagai e ala i gaoioiga lelei faalevaega. Mo lou tuputupu ae faalelagona ma faaleagaga ma le saogalemu, e tatau ona tolopoina gaoioiga e o tai-toa-tasi seia oo ina e matua—o le 16 tausaga o se taiala lelei. Fefautuaai ma ou matua ma taitai. Sefe sootaga loloto mo le taimi e te matua ai. Faaalu se taimi ma i latou o e fesoasoani ia te oe e tausia au tautinoga ia Iesu Keriso.

O le a se mea e mafai ona ou faia pe afai o lo’u aiga e le o se nofoaga o le alofa? E silafia e lou Faaola lou tulaga, ma e alofa o Ia ia te oe. Ia onosai, faaauau pea ona tausia poloaiga a le Atua, ma avea o se faataitaiga lelei i lou aiga. Fausia ni sootaga i totonu o lou aiga faaleuarota. Saunia nei e fausia lou lava aiga e faavae i aoaoga a Iesu Keriso.

Tagai i le Isaia 58:3–11 (faamoemoega o le anapogi); 58:13–14 (faamanuiaga o le faamamaluina o le Sapati); Malaki 3:8–10 (faamanuiaga o le totogiina o le sefuluai); Luka 6:27–28 (alofa i o outou fili); 10:25–37 (o ai lo’u tuaoi?); Ioane 3:16–17 (Na alofa le Atua ia i tatou, o lea na Ia auina mai ai Lona Alo); 14:15 (tatou te tausia poloaiga ona ua tatou alolofa i le Atua); 1 Ioane 4:19 (tatou te alolofa i le Atua aua e alofa o Ia ia i tatou); Mosaea 2:17 (pe a tatou auauna atu i isi, ua tatou auauna atu i le Atua).

Fesili o le faatalanoaga o pepa faataga o le malumalu

O e mulimuli i aoaoga a le Ekalesia a Iesu Keriso i au amioga faalilolilo ma amioga i nofoaga faitele i tagata o lou aiga ma isi?

O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma agavaa e taumafa i le faamanatuga; ma soifua i lou olaga ia ogatusa ma tulafono ma poloaiga o le talalelei?

Pe o oe o se tagata e totogi atoa le sefuluai?