Lavem God, lavem neba blong yu

Matiu 22:37–40

Blong helpem yu mekem ol gud joes, God i givim ol komanmen. Hem i mekem hem ia from se Hem i lavem yu. Mo bes risen blong obei ol komanmen blong God i blong lavem Hem. Lav i stap long hat blong ol komanmen blong God.

Trutok we i no save finis

God i lavem yu. Hem i Papa blong yu. Lav blong Hem we i stret evriwan i save givim insperesen long yu blong lavem Hem. Taem lav blong yu long Papa long Heven i moa impoten tingting long laef blong yu, fulap desisen oli kam moa isi.

Tu bigfala komanmen, Jisas i tijim i blong lavem God mo lavem neba blong yu. ?Mo huia i neba blong yu? !Evriwan! Evri samting we ol skripja mo ol profet i tijim oli konek i go long tufala komanmen ia.

Evri man mo woman oli ol brata mo sista blong yu—mo yes i tekem tu, ol man we oli defren long yu o no agri long yu. Papa long Heven i wantem ol pikinini blong Hem blong oli lavem wanwan long olgeta. Taem yu givim seves long ol pikinini blong Hem, yu stap givim seves long Hem.

Ol Invitesen

Soem lav long God taem yu stap holem ol komanmen blong Hem. Eksampol, taem yu kipim sabat dei i tabu we i tekem tu blong stap rere blong mo tekpat long sakramen, yu soem long God se yu wiling blong givim wan dei blong wan wik i go long Hem. Taem yu livim kakae mo pem ol taeting mo fast ofring, yu soem long God se wok blong Hem i moa impoten long yu long ol samting long saed blong bodi. Taem yu yusum ol nem blong God mo Kraes wetem respek, be i no blong nating o olsem nomo, yu soem glad mo tangkyu long evri samting we Tufala i mekem long yu.

Mekem long evriwan olsem wan pikinini blong God. Olsem wan disaepol blong Jisas Kraes, yu save lidimaot ol man blong evri kaen kala mo relijin mo ol narafala grup wetem lav, respek, mo tugeta—speseli olgeta we samtaem oli ol viktim blong ol strong toktok mo aksen. Go aot mo go lukluk olgeta we oli filim se oli stap olgetawan, oli sore, o oli no gat help. Helpem olgeta blong filim lav blong Papa long Heven tru long yu.

Mekem sua se lanwis blong yu i soem lav blong God mo ol narawan—nomata yu stap lukluk man mo toktok o tru long media olsem fon kol. Talem ol samting we blong leftemap tingting—i no samting we blong mekem hat i trabol, i strong o harem nogud iven blong mekem fani. Ol toktok blong yu i save gat paoa. Letem ol toktok ia oli gat paoa blong mekem gud samting.

Blong stap lavem ol pikinini, i stat long hom. Mekem pat blong yu blong mekem hom blong yu wan ples we evriwan i save filim lav blong Sevya.

Ol promes blesing

Rilesensip blong yu wetem God bae i develop taem yu soem lav blong yu blong stap obei ol komanmen blong Hem mo holem ol kavenan blong yu wetem Hem.

Rilesensip blong yu wetem ol narawan bae i develop taem yu soem lav blong yu tru long seves ia we i olsem blong Kraes. Bae yu faenem glad taem yu stap mekem wol i kam wan moa gud ples.

Ol kwestin mo ansa

?Olsem wanem nao mi save filim lav blong God? Lav blong Papa long heven i oltaem stap ia. Toktok plante long Hem tru long prea. Serem ol filing blong yu wetem Hem, mo lisin long ol strong tingting mo filing we bae i kam long Hem. Ridim ol toktok blong Hem long ol skripja. Tingting long wanem we Hem i bin mekem blong yu. Spendem taem long ol ples mo ol aktiviti we spirit blong Hem i stap long hem.

?I tru we Lod i wantem blong mi lavem evriwan, nomata se olgeta we oli mekem i nogud long mi? Lod i wantem yu blong lavem ol enemi blong yu mo prea from olgeta we oli mekem i nogud long yu. Be hem ia i no minim se yu mas stap long wan situesen we bae i mekem yu sore, long saed blong bodi mo long saed blong spirit. Putum ol helti baondri blong mekem yuwan yu sef. Sapos oli stap tok jikim yu o abiusum yu—o sapos yu save hem ia i stap hapen long wan—toktok long wan adalt we yu trastem hem.

?Wetaem mo olsem wanem bae mi save kam blong save ol memba blong ol nara seks? Bes wei blong kam blong save ol narawan hem i tru long ol kaen frensip. Taem yu yang, bildim gud frensip wetem plante pipol. Long sam kalja, ol yut oli kam blong save ol memba blong nara seks tru long ol grup aktiviti. Blong ol filing blong tingting mo hat mo long saed blong spirit blong divelopmen blong yu mo sefti, ol aktiviti blong stap go aot wanwan wetem nara memba blong seks i mas kanselem kasem taem yu bigwan— 16 yia i wan gud gaedlaen. Sidaon wetem papa mo mama mo ol lida blong yu mo toktok long olgeta. Holem taem series rilesensip blong taem we yu kam adalt. Spendem taem wetem olgeta we oli helpem yu blong holem ol komitmen blong yu long Jisas Kraes.

?Wanem nao mi save mekem sapos hom blong mi i no wan ples blong lav? Sevya blong yu i save situesen blong yu mo Hem i lavem yu. Gat fasin blong save wet longtaem, gohed blong holem ol komanmen mo stap wan gud eksampol long famli blong yu. Bildim rilesensip insaed long wod famli blong yu. Rere naoia blong bildim famli blong yuwan we i stanap long ol tijing blong Jisas Kraes.

Luk long Aesea 58:3–11 (Stamba tingting blong livim kakae); 58:13–14 (blesing blong stap givim ona long sabat dei); Malakae 3:8–10 (ol blesing blong stap pem taeting); Luk 6:27–28 (lavem ol enemi blong yu); 10:25–37 (?Huia i neba blong mi?); Jon 3:16–17 (God lavem yumi, I sendem pikinini blong Hem); 14:15 (Yumi folem ol komanmen from we yumi lavem God); 1 Jon 4:19 (yumi lavem God from we Hem i lavem yumi); Mosaea 2:17 (taem yumi givim seves long ol narawan, yumi stap givim seves long God).

Ol kwestin blong tempol rekomen

?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?

?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?

?Yu yu stap pem ful taeting?