“Bodi blong yu i tabu,” Blong Ol Yut Oli Kam Strong: Wan Gaed blong Stap Mekem Ol Joes (2022)
“Bodi blong yu i tabu,” Blong Ol Yut Oli Kam Strong
Bodi blong yu i tabu.
1 Korin 6:18–20
Bodi blong yu i wan naes presen we i kam long Papa long Heven. Hem i givim long yu blong helpem yu kam moa olsem Hem. Blong gat wan bodi, i givim long yu bigfala paoa blong yusum fridom blong mekem joes blong yuwan. Gospel blong Jisas Kraes we i kambak i save helpem yu blong yu tingting long bodi blong yu long wei we God i tingting long yu. Mo hem ia i mekem wan bigfala defren long ol joes blong yu abaot wanem blong mekem wetem bodi blong yu mo olsem wanem blong lukaotem gud.
Ol trutok we i no save finis
Bodi blong yu i tekem pikja blong God—glori blong Hem i bigwan mo i gat ol paoa long yunives. Ol skripja oli komperem bodi blong yumi long wan tabu tempol, wan ples we Spirit i save stap long hem. I tru we bodi blong yu i no stret evriwan nao ia. Be eksperiens we yu stap gat wetem bodi blong yu i save helpem yu rere blong kasem wan dei wan we i stret evriwan, we i laef bakegen, bodi we i naes tumas.
Sol blong yu i mekem aot long bodi mo spirit blong yu. From risen ia, helt long saed blong bodi mo spirit i konek tugeta. Sevya i talemaot se Tok blong Waes i blong tijim ol prinsipol blong stap lukaotem gud bodi blong yu—mo i promesem ol blesing long saed blong bodi mo spirit.
Ol Filing blong seks ol i wan impoten pat long plan blong God blong krietem ol hapi mared mo famli we i no save finis. Ol filing ia oli no sin—oli tabu. From ol filing blong seks oli tabu tumas mo oli gat paoa, God i givim yu loa blong jastiti blong rere yu blong yusum ol filing ia olsem we Hem i tijim long plan blong Hem. Loa blong jastiti i tijim se God i apruvum aktiviti blong seks nomo bitwin wan man mo wan woman we tufala i mared. Plante long wol oli no wantem save o iven jikim loa blong God, be Lod i invaetem yumi blong stap ol disaepol blong Hem mo laef long wan standet we i hae moa long hem ia blong wol.
Ol Invitesen
Tritim bodi blo yu—mo ol bodi blong ol nara wan—wetem respek. Taem yu mekem desisen blong yu abaot ol klos, staelem ea mo olsem wanem bae yu luk, askem yuwan “Mi mi stap ona long bodi blong mi olsem wan tabu presen we i kam long God?” Papa long Heven i wantem yumi lukluk wanwan long yumi blong huia yumi: be i no olsem wan bodi long saed blong mit mo bun be ol pikinini blong Hem wetem wan tabu fiuja. No mekem ol stael we save o pulum ol lukluk we i no stret long bodi blong yu nomata huia yu olsem wan pikinini blong God wetem wan fiuja we i no save finis. Letem klin fasin mo lav blong God i lidim ol joes blong yu. Lukaotem kaonsel long ol papa mo mama blong yu.
Mekem ol samting we bae i mekem bodi blong yu i kam strong—be no ol samting blong mekem i harem nogud o spolem. Enjoem wetem hat we i fulap long tangkyu ol gud samting we God i givim. Be tingbaot se alkohol, tabak, ti mo ol narafala strong drag mo ol meresin we oli no givim raet long hem oli no blong bodi mo spirit blong yu. Iven ol meresin we i save helpem man, olsem hem ia we oli givim raet long yu from, i save spolem yu sapos yu no yusum long stret wei.
Kipim seks mo ol filing blong seks i tabu. Oli no mas stap olsem topik blong mekem fani o mekem samting we oli pulum tingting. Bifo mared bitwin wan man mo wan woman, hem i no stret blong tajem praevet, tabu pat blong bodi blong nara man nomata we hem i werem klos. Long ol joes blong yu abaot wanem yu mekem, lukluk long hem, tingting long hem, postem o teksem, no mekem eni samting we i save givim filing blong seks long ol narafala man o long yuwan. Hem ia i tekem tu, eni kaen blong ponografi. Sapos yu faenem ol situesen o ol aktiviti ia we i mekem temtesen i kam strong moa, no go pat insaed. Yu save wanem ol situesen mo aktiviti ia. Mo sapos yu no sua long olgeta, Spirit, papa mo mama blong yu mo ol lida blong yu i save helpem yu blong save. Soem long Papa blong yu long Heven se yu ona mo respektem tabu paoa blong krietem laef.
Ol promes blesing
Respek blong yu long yuwan mo long ol nara wan bae i kam antap moa taem yu ona long bodi blong yu tru long aksen blong yu, hao man i luk yu mo fasin blong dresap.
Lod i promesem wan save we rij long olgeta we oli holem loa blong Tok blong Waes. Wan bodi we i helti, fri long adiksen, i helpem yu blong kam antap moa long fasin blong kasem ol revelesen blong yuwan, tingting klia, mo givim seves long Lod.
Laef folem loa blong jastiti i tekem apruvol blong God mo fasin blong gat paoa long saed blong spirit blong yuwan. Taem yu mared, loa ia bae i givim bigfala lav, tras mo yuniti long mared blong yu. Blong stap obei long loa ia bae i mekem i posibol long yu blong gro oltaem mo kam moa olsem Papa blong yu long Heven. Fasin blong gat strong tingting blong yu bae i gro taem yu laef olsem wan disaepol blong Jisas Kraes.
Ol kwestin mo ol ansa
?Wanem nao mak blong Lod long fasin blong stap dresap, fasin blong stap mekem gud yuwan, ol tatu mo ol smol hol long bodi? Mak blong Lod long yu blong onarem tabu bodi blong yu iven taem hem ia i minim blong stap defren aot long wol. Letem trutok ia mo Spirit i gaed blong yu taem yu mekem ol desisen—speseli ol desisen we oli gat ol paoa long bodi blong yu. Stap waes mo gat fet, mo lukaotem kaonsel long papa mo papa blong yu mo ol lida.
?Hao nao mi ova kam o pasem ol temtesen mo ol nogud fasin? Papa long Heven mo Jisas Kraes, Tufala i gat paoa blong helpem yu. Fulumap laef blong yu wetem ol samting we i invaetem paoa ia long laef blong yu olsem prea, stadi skripja mo givim seves long ol nara man. Lukluk long Jisas Kraes mo gospel blong Hem mo bae yu faenem se ol samting we oli no strong oli save kam strong. Lukaotem help long ol papa mo mama, ol lida mo ol ol kaonsela we oli skul gud olsem we i nid. Long olgeta we oli safa long adiksen, Jos i stap gat wan program blong olgeta we oli stap fesem ol adiksen blong kam gud bakegen. hem ia ol blesing we Jos blong Sevya i givim blong helpem yu kasem bak kontrol long laef blong yu. Bae i tekem taem, from hemia, gat fasin blong save wet longtaem mo no givap.
Mi mi gat filing long ol pipol we mifala i gat semmak jenda. ?Olsem wanem nao mi save yusum ol standed ia? Gat filing long wan we i semmak seks i no wan sin. Spos yu gat ol filing ia mo no folem o mekem, yu stap laef folem tabu loa blong jastiti blong God. Yu yu wan pikinini blong God we Hem i lavem tumas mo wan disaepol blong Jisas Kraes. Tingbaot se Sevya i andastanem evri samting yu eksperiensem. Tru long kavenan blong yu we i konek wetem Hem, bae yu faenem paoa blong obei ol komanmen blong God mo kasem ol blesing we Hem i promesem. Trastem Hem mo gospel blong Hem.
Mi mi bin wan viktim blong abius mo mi filim sem. ?Mi mi mekem sin? Blong kam wan viktim blong eni abius o fosem yu, i no mekem yu sin. Plis, no harem nogud o sem. Lod i lavem yu. Hem i wantem helpem yu, hilim yu mo givim yu pis. Ol profesenol kaonsela, famli memba blong yu mo ol lida blong yu tu oli save help.
Luk long Jenesis 1:27 (God i krietem yumi folem pikja blong Hem); Jon 14:18 (Sevya i promesem kamfot); Filipae 4:7 (pis blong God i givim andastaning); Doktrin mo Ol Kavenan 88:15 (spirit mo bodi oli ol sol); 89 (Tok blong Waes); 121:45 (klin tingting i lid i go long fasin blong gat strong tingting i kam antap).
Ol kwestin blong tempol rekomen
Lod i bin talem se evri samting, oli mas mekem “long klin fasin” long fored blong Hem (Doktrin mo Ol Kavenan 42:41). ?Yu yu traehad blong stap laef long klin fasin long ol tingting mo long ol aksen blong yu? ?Yu yu stap obei long loa blong jastiti?
?Yu yu andastanem mo stap obei long Tok blong Waes?