« សេចក្តីពិតនឹងធ្វើឲ្យអ្នកមានសេរីភាព » ដើម្បីកម្លាំងនៃយុវជន ៖ ជាសេចក្តីណែនាំដើម្បីធ្វើការជ្រើសរើស ( ឆ្នាំ ២០២២ )
« សេចក្តីពិតនឹងធ្វើឲ្យអ្នកមានសេរីភាព » ដើម្បីកម្លាំងនៃយុវជន
សេចក្តីពិតនឹងធ្វើឲ្យអ្នកមានសេរីភាព
យ៉ូហាន ៨:៣២
ព្រះវរបិតាសួគ៌របស់អ្នកគឺជាព្រះនៃសេចក្តីពិត ។ ទ្រង់ជ្រាបអ្វីៗទាំងអស់ ។ សេចក្តីពិតទាំងអស់មកពីទ្រង់ និងដឹកនាំទៅរកទ្រង់ ។ អ្នកបង្ហាញថា អ្នកឲ្យតម្លៃលើសេចក្តីពិត កាលអ្នកខិតខំរៀនសូត្រ រស់នៅជាមួយភាពស្មោះត្រង់ ហើយឈរយ៉ាងក្លាហានចំពោះអ្វីដែលអ្នកដឹងថាត្រឹមត្រូវ—បើទោះបីជាអ្នកត្រូវឈរតែម្នាក់ឯងក៏ដោយ ។
សេចក្តីពិតដ៏អស់កល្បជានិច្ច
ព្រះវរបិតាសួគ៌មានព្រះទ័យចង់ឲ្យបុត្រី និងបុត្រារបស់ទ្រង់រៀនសូត្រជានិច្ច ។ អ្នកមានហេតុផលទាំងខាងសាច់ឈាម និងខាងវិញ្ញាណក្នុងការស្វែងរក និងការស្រឡាញ់ការរៀនសូត្រ ។ ការអប់រំមិនមែនតែអំពីការរកប្រាក់ប៉ុណ្ណោះនោះទេ ។ ការអប់រំគឺជាផ្នែកមួយនៃគោលដៅដ៏អស់កល្បរបស់អ្នកដើម្បីប្រែក្លាយកាន់តែដូចជាព្រះវរបិតាសួគ៌ ។
ការរស់នៅដោយទៀងត្រង់មានន័យថា អ្នកស្រឡាញ់សេចក្តីពិតអស់ពីចិត្ត—ច្រើនជាងអ្នកស្រឡាញ់ការលួងលោមផ្ទាល់ខ្លួន ប្រជាប្រិយភាព ឬភាពងាយស្រួល ។ វាមានន័យថាធ្វើអ្វីដែលត្រឹមត្រូវ ព្រោះវាត្រឹមត្រូវ ។
អ្នកមានអ្វីមួយដែលមានតម្លៃដើម្បីចែករំលែក ។ ដំណឹងល្អនៃព្រះយេស៊ូវគ្រីស្ទមានចម្លើយចំពោះសំណួរនៃជីវិត ។ វាគឺជាផ្លូវទៅរកសេចក្តីសុខសាន្ត និងសុភមង្គល ។ អ្នកប្រហែលជាមិនដឹងគ្រប់យ៉ាងទេ ប៉ុន្តែអ្នកដឹងគ្រប់គ្រាន់ក្នុងការជួយអ្នកដទៃឲ្យយល់ និងឲ្យតម្លៃគោលការណ៍ដ៏ពិត ដែលអស់កល្បជានិច្ច ។
ការអញ្ជើញ
សូមធ្វើជាមនុស្សរៀនសូត្រជានិច្ច ។ សូមស្វែងរកឱកាសដើម្បីពង្រីកគំនិត និងជំនាញរបស់អ្នក ។ ឱកាសទាំងនេះអាចរួមបញ្ចូលការអប់រំផ្លូវការនៅសាលា ឬការបណ្តុះបណ្តាលវិជ្ជាជីវៈ ក៏ដូចជាការរៀនក្រៅផ្លូវការពីប្រភពដែលអ្នកទុកចិត្តផងដែរ ។ សូមរាប់បញ្ចូលព្រះអម្ចាស់នៅក្នុងការខិតខំរបស់អ្នក ហើយទ្រង់នឹងដឹកនាំអ្នក ។ នៅពេលអ្នករៀនអំពីពិភពលោកជុំវិញអ្នក សូមរៀនផងដែរអំពីព្រះអង្គសង្គ្រោះ ដែលបានបង្កើតពិភពលោកនេះ ។ សូមសិក្សាពីព្រះជន្ម និងការបង្រៀនរបស់ទ្រង់ ។ សូមធ្វើឲ្យថ្នាក់សិក្ខាសាលា ថ្នាក់វិទ្យាស្ថាន និងការសិក្សាដំណឹងល្អផ្ទាល់ខ្លួនក្លាយជាផ្នែកមួយនៃការសិក្សាពេញមួយជីវិតរបស់អ្នក ។
ស្រឡាញ់សេចក្តីពិត ឲ្យបានច្រើនដែលធ្វើឲ្យអ្នកមិនចង់លួច កុហក បន្លំ ឬបោកបញ្ឆោតតាមគ្រប់មធ្យោបាយទាំងនៅសាលា កន្លែងធ្វើការ តាមអនឡាញ និង គ្រប់ទីកន្លែងទាំងអស់ ។ សូមធ្វើជាអ្នកដើរតាមព្រះយេស៊ូវគ្រីស្ទដ៏ស្មោះត្រង់ដូចគ្នាទាំងនៅទីសាធារណៈ និងទីឯកជន ។
សូមធ្វើជាពន្លឺដល់អ្នកដទៃ ។ សូមឲ្យពាក្យសំដី និងសកម្មភាពរបស់អ្នកឆ្លុះបញ្ចាំងពីសេចក្តីជំនឿរបស់អ្នកនៅលើព្រះយេស៊ូវគ្រីស្ទ ។ សូមរៀបចំខ្លួនឥឡូវនេះសម្រាប់ឱកាសនាពេលអនាគតដើម្បីចែកចាយដំណឹងល្អដ៏រុងរឿងរបស់ទ្រង់ ក្នុងនាមជាអ្នកផ្សព្វផ្សាយសាសនា និងពេញមួយជីវិតរបស់អ្នក ។ ហើយសូមត្រៀមខ្លួនប្រាប់អ្នកណាម្នាក់ដែលសួរអ្នកអំពីក្តីសង្ឃឹម និងសុភមង្គលដែលអ្នកដឹង ។
ពរជ័យដែលបានសន្យា
ការអប់រំបង្កើនសមត្ថភាពរបស់អ្នកដើម្បីបម្រើព្រះអម្ចាស់ ។ វាផ្តល់អំណាចឲ្យអ្នកក្នុងការប្រទានពរដល់អ្នកដទៃ ជាពិសេសគ្រួសាររបស់អ្នក ។ អ្នករៀនកាន់តែច្រើន នោះអ្នកក៏កាន់តែអាចជួយស្ថាបនានគររបស់ព្រះ និងមានឥទ្ធិពលលើពិភពលោកសម្រាប់ការល្អផងដែរ ។
ភាពស្មោះត្រង់នាំមកនូវសេចក្តីសុខសាន្ត និងការគោរពចំពោះខ្លួនឯង ។ នៅពេលពាក្យសម្ដី និងសកម្មភាពរបស់អ្នកស្របនឹងសេចក្ដីពិត នោះអ្នកបង្ហាញថាអ្នកជាមនុស្សអាចទុកចិត្តបាន—ពីមនុស្សដទៃ និងដោយព្រះអម្ចាស់ ។
នៅពេលអ្នកក្រោកឈរឡើងការពារការបង្រៀនរបស់ព្រះយេស៊ូវគ្រីស្ទ នោះទ្រង់ឈរជាមួយអ្នក ។ អ្នកផ្សេងទៀតប្រហែលជាមិនយល់ស្របជាមួយអ្នកទេ ប៉ុន្តែភាពក្លាហាន និងភាពស្មោះត្រង់របស់អ្នកនឹងត្រូវបានកត់សម្គាល់ ។ មិនថាអ្នកផ្សេងទៀតធ្វើតាមគំរូរបស់អ្នកឬអត់នោះទេ ទីបន្ទាល់ ទំនុកចិត្ត និងជំនឿលើព្រះគ្រីស្ទរបស់អ្នកនឹងរីកចម្រើនឡើង ។
សំណួរ និង ចម្លើយ
តើវាខុសទេដែលមានសំណួរអំពីសាសនាចក្រ ? តើខ្ញុំអាចរកឃើញចម្លើយដោយរបៀបណា ? ការមានសំណួរគឺមិនមែនជាសញ្ញានៃភាពទន់ខ្សោយ ឬខ្វះសេចក្តីជំនឿនោះទេ ។ តាមពិតទៅ ការសួរសំណួរអាចជួយស្ថាបនាសេចក្តីជំនឿបាន ។ ការស្តារឡើងវិញនៃដំណឹងល្អបានចាប់ផ្តើមនៅពេលយ៉ូសែប ស្ម៊ីធដែលមានវ័យ ១៤ ឆ្នាំ បានសួរសំណួរដោយសេចក្តីជំនឿ ។ សូមស្វែងរកចម្លើយនៅក្នុងព្រះគម្ពីរ ក្នុងប្រសាសន៍របស់ព្យាការីរបស់ព្រះ ពីថ្នាក់ដឹកនាំ និងឪពុកម្តាយដ៏ស្មោះត្រង់របស់អ្នក និងពីព្រះអង្គផ្ទាល់ ។ ប្រសិនបើចម្លើយមិនមកភ្លាមៗទេ សូមទុកចិត្តថាអ្នកនឹងរៀនមួយបន្ទាត់ម្តងៗ ។ សូមបន្តរស់នៅតាមអ្វីដែលអ្នកដឹងរួចហើយ ហើយបន្តស្វែងរកការពិត ។
តើខ្ញុំអាចក្រោកឈរឡើងការពារអ្វីដែលត្រឹមត្រូវដោយមិនធ្វើឲ្យអ្នកដែលមានជំនឿផ្សេងអាក់អន់ចិត្តដោយរបៀបណា ? សូមចាប់ផ្តើមដោយធ្វើឲ្យប្រាកដថាពាក្យសម្ដី និងសកម្មភាពរបស់អ្នកត្រូវបានបំផុសគំនិតដោយសេចក្ដីស្រឡាញ់ចំពោះព្រះ និងកូនចៅរបស់ទ្រង់ ។ ការចែកចាយដំណឹងល្អមិនគួរធ្វើឡើងក្នុងវិញ្ញាណនៃការទាស់ទែងនោះទេ ប៉ុន្តែដោយភាពច្បាស់លាស់ ស្លូតបូត និងសប្បុរសវិញ ។ អ្នកអាចស្រលាញ់អ្នកដទៃ ទោះបីអ្នកមិនយល់ស្របនឹងទស្សនៈរបស់ពួកគេក៏ដោយ ។
សូមមើល ម៉ាថាយ ៥:១៤–១៦ ( សូមឲ្យពន្លឺអ្នកបានភ្លឺឡើង ); យ៉ូហាន ១៤:៦ ( ព្រះយេស៊ូវគឺជាសេចក្តីពិត ); ពេត្រុស ទី១ ៣:១៥ ( សូមត្រៀមខ្លួនដើម្បីចែកចាយក្តីសង្ឃឹមរបស់អ្នកលើព្រះគ្រីស្ទជានិច្ច ); គោលលទ្ធិ និងសេចក្តីសញ្ញា ៨៨:៧៧–៨០ ( អ្វីៗដែលព្រះអម្ចាស់ចង់ឲ្យយើងរៀន ); ៩៣:៣៦ ( សិរីល្អរបស់ព្រះគឺជាបញ្ញា ); ១២៤:១៥ ( សេចក្តីទៀងត្រង់មានន័យថាស្រឡាញ់អ្វីដែលត្រឹមត្រូវ ); ១៣០:១៨ ( បញ្ញារបស់យើងរះឡើងជាមួយយើង នៅពេលយើងរស់ឡើងវិញ ) ។
សំណួរសម្រាប់ទទួលប័ណ្ណចូលព្រះវិហារបរិសុទ្ធ
តើអ្នកព្យាយាមមានភាពស្មោះត្រង់នៅគ្រប់កិច្ចការដែលអ្នកធ្វើដែរឬទេ ?