Xtiqb’al li aatin

Naru nakak’e reetal b’ar wankat sa’ xb’ehil li sumwank naq nakak’oxlaheb’ li patz’om rub’el a’in. Patz’b’ileb’ aawe naq natz’ilman aawix re xk’ulb’al jun recomendacion re ok sa’ li santil ochoch, a’b’an mat-oyb’enin toj reetal naq taatz’ile’q aawix. Tz’il aawix aajunes sa’ musiq’ej. Li ch’ol aatin reheb’ li Saaj Ixq, li ch’ol aatin reheb’ li molam sa’ li Tijonelil re Aaron, ut li Lajeeb’ chi Taqlahom naru ajwi’ tate’xtenq’a chixtz’ilb’al aawix.

Eb’ li patz’om re li recomendacion choq’ reheb’ li saaj re ok sa’ li santil ochoch

Ma wan aapaab’aal ut xnawom aach’ool chirix li Dios, li Junelik Yuwa’b’ej, li Jesukristo li Ralal, ut li Santil Musiq’ej?

Ma wan xnawom aach’ool chirix lix tojb’al rix li maak xb’aan li Jesukristo, ut chirix lix k’anjel a’an jo’ aj Kolol aawe ut aj Tojol aawix?

Ma wan xnawom aach’ool chirix naq k’ojob’anb’il wi’chik lix evangelio li Jesukristo?

Ma nakaxaqab’ xwankil li Awa’b’ej re lix Iglees li Jesukristo reheb’ laj Santil Paab’anel sa’ Roso’jikeb’ li Kutan jo’ li profeet, aj ilol na’leb’, ut aj k’utb’esinel, ut jo’ li jun chi winq sa’ ruchich’och’ li k’eeb’il xwankil re xk’anjelankil chixjunileb’ lix laawil li tijonelil? Ma nakaxaqabeb’ xwankil eb’ lix komonil li Xb’eenil Awa’b’ejil ut li Molam reheb’ li Kab’laju chi Apostol jo’ profeet, aj ilol na’leb’, ut aj k’utb’esineleb’? Ma nakaxaqab’eb’ xwankil li jun siir chik chi jolomil aj b’eresinel re li Iglees, ut eb’ laj b’eresinel sa’ li wankat wi’?

Li Qaawa’ xye naq chixjunil li k’a’aq re ru tento taab’aanumanq “chi ch’ajch’o” chiru a’an (Tzol’leb’ ut Sumwank 42:41). Ma nakayal aaq’e re naq saqaq ru aak’oxlahom ut aab’aanuhom? Ma nakapaab’ li chaq’rab’ re li saq ru ch’oolej?

Ma nakataaqe li k’a’ru k’utb’il sa’ lix Iglees li Jesukristo sa’ laa b’aanuhom sa’ k’utk’u ut sa’ muqmu rik’ineb’ li komon sa’ laa junkab’al ut rik’in anihaq chik?

Ma nakaxaqab’ xwankil malaj nakawaklesi yalaq k’utum, b’aanuhom, malaj tzol’leb’ li moko naxk’am ta rib’ rik’in li k’utb’il sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan?

Ma nakayal aaq’e chixk’uulankil chi sant li hilob’aal kutan, sa’ kab’l jo’ ajwi’ sa’ iglees, chi wulak sa’eb’ aach’utam, chixkawresinkil aawib’ ut chixk’ulb’al chi tiik li loq’laj wa’ak, ut chi wank sa’ aayu’am jo’ chanruheb’ li chaq’rab’ ut li taqlahom re li evangelio?

Ma nakayal aaq’e re naq maak’a’aq li b’alaq’ sa’ chixjunil li nakab’aanu?

Ma nakatoj li lajetqil chi tzʼaqal?

Ma nakataw ru ut ma nakat-ab’ink chiru li Aatin re Chaab’il Na’leb’?

Ma wankeb’ li nimla maak sa’ aayu’am li tento raj xtuqub’ankil rik’ineb’ li wankeb’ xwankil sa’ li tijonelil re taaruuq taajal aak’a’uxl?

Ma nakaweek’a naq k’ulub’ejat chi ok sa’ rochoch li Qaawa’ ut chi tz’aqonk sa’eb’ li k’ojob’anb’il k’anjel re li santil ochoch?

Li ch’ol aatin choq’ reheb’ li Saaj Ixq

Laa’in jun raarookil xrab’in li choxahil na’b’ej yuwa’b’ej, ut wan inchoxahilal ut lin junelikil eechanihom.

Jo’ xtzolom li Jesukristo, ninyal inq’e chi wulak jo’ a’an. Ninsik’ ut nink’anjela li k’utb’esinb’il na’leb’ nak’eeman we ut nink’anjelak chiruheb’ li was wiitz’in sa’ lix santil k’ab’a’ a’an.

Tinxaqliiq joʼ aj yehol nawom chirix li Dios saʼ chixjunil hoonal, ut saʼ chixjunil li kʼaʼaq re ru, ut saʼ chixjunil li naʼajej.

Naq yooqin chixyalb’al inq’e re naq k’ulub’ejaqin choq’ re li taqenaqil loq’al, nink’e xloq’al li maatan re li jalb’a-k’a’uxlej ut ninyal chaab’ilo’k rajal kutan. Rik’in paab’aal, tinkawob’resi li wochoch ut lin junkab’al, tinb’aanuheb’ ut tinpaab’eb’ li loq’laj sumwank, ut tink’uleb’ li k’ojob’anb’il k’anjel ut eb’ li rosob’tesihom li santil ochoch.

Li ch’ol aatin choq’ reheb’ li molam sa’ li Tijonelil re Aaron

Laa’in jun ralal li Dios raab’ilin xb’aan, ut a’an wan xk’anjel choq’ we.

Chi anchal inch’ool, inmetz’ew, ink’a’uxl, ut inkawilal tinra li Dios, tinpaab’eb’ lin sumwank, ut tinwoksi lix tijonelil a’an re k’anjelak chiru li was wiitz’in, xb’een wa sa’ li wochoch.

Naq tinyal inq’e chi k’anjelak chiruheb’ jalan, chi paab’ank, chixjalb’al ink’a’uxl, ut chi chaab’ilo’k rajlal kutan, k’ulub’ejaqin chi osob’tesiik xb’aan li santil ochoch ut chixk’ulb’al li sahil ch’oolejil re li evangelio.

Tinkawresi wib’ chi wank choq’ jun chaab’il misioneer, b’eelomej, ut yuwa’b’ej rik’in xb’eresinkil wib’ jo’ tz’aqal xtzolom li Jesukristo.

Tintenq’anq sa’ xkawresinkil li ruchich’och’ choq’ re xkab’ xk’ulunik li Kolonel rik’in xb’oqb’al chixjunileb’ li was wiitz’in chi chalk rik’in li Kristo ut chi osob’tesiik xb’aan lix tojb’al rix li maak.

Eb’ li Lajeeb’ chi Taqlahom

Maajun chik Dios taawanq aawikʼin chiwu laaʼin.

Maapech’ chi moko taayiib’ xjalam u junaq k’a’ re ru.

Maapatzʼ xkʼabʼaʼ li Qaawaʼ laa Dios chi maakʼaʼ xyaalal.

Chijultikoʼq aawe li hilobʼaal kutan, re xkʼuulankil xsantilal.

Chawoxloq’i laa na’ aayuwa’.

Matkamsin.

Matmuxuk sumsu.

Mat-elqʼak.

Matyoob’ank aatin chirix laa was aawiitz’in.

Maarahin ru k’a’aq re ru.

Chi’ilmanq Exodo 20:3–17.