“Appendix eo,” N̄an Kōkajoorļo̧k Jodikdik ro (2022)
“Appendix eo,” N̄an Kōkajoorļo̧k Jodikdik ro
Appendix eo
Juon wāween n̄an etale eddōkļo̧k eo am̧ ilo iaļan bujen in ej n̄an kejokļo̧kjeņ kōn kajjitōk kein ilaļ. Rej kajjitōk ko me rej kajjitōkin eok kaki n̄e kwoj intōrpiu n̄an bōk juon mālim n̄an deļon̄e tampeļ, ak jab kōttar n̄an juon intōrpiu. Kōm̧m̧an am̧ make iien n̄an etale mour in jetōb eo am̧. Unin Tōl eo an Doulul eo an Jiron̄ ro, Unin Tōl eo an Doulul eo an Priesthood eo an Aron, im Kien ko Jon̄oul remaron̄ barāinwōt kein jipan̄ ko n̄an etale mour eo am make.
Kajjitōk ko kōn mālim n̄an deļon̄e tampeļ n̄an jodikdik ro
Ewōr ke am̧ tōmak ilo im juon naan in kam̧ool kōn Anij Jemed Indeeo, Nejin, Jisōs Kraist; im Jetōb Kwojarjar?
Ewōr ke am̧ juon naan in kam̧ool kōn Pinmuur eo an Kraist im kōn jerbal eo An āinwōt Rilo̧mo̧o̧r im Ripinmuur?
Ewōr ke am̧ juon naan in kam̧ool kōn Jepļaaktok eo an gospel eo an Jisōs Kraist?
Kwōj ke rejtake Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata āinwōt rikanaan eo, rilolo eo, im rikwaļo̧k revelesōn eo im āinwōt e wōt armej ioon laļ in eo ewōr an mālim n̄an kōjerbal aolep kii ko an priesthood eo? Kwōj ke rejtake membōr ro an Būreejtōnji eo Kein Kajuon im Doulul eo an Jon̄oulruo Rijilōk ro āinwōt rikanaan, rilolo, im rikwaļo̧k revelesōn? Kwōj ke rejtake Ritōl ro Routiej jet an Kabun̄ in im ritōl ro an Kabun̄ in ijo kwoj jokwe ie?
Irooj ekar ba bwe men otemjej rej aikuj “kōm̧m̧an ilo erreo” Im̧aan Mejān (Katak im Bujen Ko 42:41). Kwoj kajjieon̄ in erreo ilo m̧wil in ļōmņak im m̧antim̧? Kwoj ke pokake kien erreo?
Kwoj ke ļoore katak ko an Kabun̄ eo an Jisōs Kraist ilo m̧wil ko am̧ make im m̧wil ko am̧ n̄an armej otemjej im ippān ro uwaan baam̧le eo am̧ im ro jet?
Kwoj ke rie ak jutak likin jabdewōt katak ko, kōm̧m̧an ko, ak katakin ko roktak jān ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata?
Kwoj ke kajjieon̄ kōjparok ekwojarjar eo an raan in Jabōt, jim̧or ilo m̧weo im ilo m̧ōnjar eo; pād ilo kweilo̧k ko am̧, m̧aanjabpopo n̄an im bōk m̧ōttan kwojkwoj eo ilo erreo; im mour ilo ineem̧m̧an kōn kakien ko im kien ko an gospel eo?
Kwoj ke kajjieon̄ in m̧ool ilo aolep kōm̧m̧an ko am̧?
Kwoj ke juon eo ej kōļļā juon m̧ōttan jon̄oul aolep iien?
Kwoj ke meļeļe im pokake Naan in Mālōtlōt?
Ewōr ke jerawiwi ko reļļap ilo mour eo am̧ me rej aikuj in ņamejļaer ippān priesthood ro ewōr mālim eo ippāer āinwōt m̧ōttan wōt am̧ ukweļo̧k?
Kwoj ke watōk eok make kworreo n̄an deļon̄e m̧weo im̧ōn Irooj im bōk koņaam̧ ilo kain̄i ko an tampeļ?
Unin Tōl eo an Doulul eo an Jiron̄ ro
N̄a ij juon leddik ejitōn bōro nejin Jined im Jemedwōj Ilan̄ kōn juon piktok ekwojarjar im mejān kajjūk indeeo.
Āinwōt juon rikaļoor an Jisōs Kraist, ij kajjieon̄ n̄an erom̧ āinwōt E. Ij kappukot im jerbale revelesōn an juon make im jerbal in karejar n̄an ro jet ilo Etan ekwojarjar.
Inaaj jutak āinwōt juon rikam̧ool an Anij ilo aolep iien im ilo aolep men otemjeļo̧k im ilo aolep jikin.
Ilo aō kajjieon̄ n̄an karbōb n̄an mour ijo eutiejtata, Ij kaorōk menin letok eo an ukweļo̧k im kappukot n̄an em̧m̧anļo̧k kajjojo raan. Kōn tōmak, Inaaj kōkajoorļo̧k m̧weo im̧ō im baam̧le eo aō, kōm̧m̧an im kōjparok bujen ko rekwojarjar, im bōk kain̄i ko im kōjeraam̧m̧an ko an tampeļ eo ekwojarjar.
Unin Tōl eo an Doulul eo an Priesthood eo an Aron
Ij juon ļaddik ejitōn bōro nejin Anij, im ewōr juon An jerbal ij aikuj kōm̧m̧ane.
Kōn aolepān būruwō, maron̄, ļōmņak im kajoor, inaaj iakwe Anij, kōjparok bujen ko aō, im kōjerbal priesthood eo An n̄an jipan̄ ro jet, jino ilowaan m̧weeo im̧ō.
Ilo aō kajjieon̄ jerbal, kōjerbal tōmak, ukweļo̧k, im em̧m̧anļo̧k kajjojo raan, inaaj karbab n̄an bōk kōjeraam̧m̧an ko an tampeļ im n̄an niknik lan̄lōn̄ kōn gospel in.
Inaaj kōppopo n̄an erom̧ juon mijenede eo etiljek, ļeo pālele ettā, im baba eo eļap iakwe ippān n̄an erom̧ juon rikaļoor eo em̧ool an Jisōs Kraist.
Inaaj jipan̄ kōpooj laļ in n̄an Itok eo Kein Karuo an Rilo̧mo̧o̧r ilo aō karuwaineneik aolep n̄an itok n̄an Kraist im bōk kōjeraam̧m̧an ko an Pinmuur eo An.
Kien ko Jon̄oul
En ejjeļo̧k bar anij raņ ippam̧ ijello̧kū.
Kwōn jab kōm̧anm̧an im jekjek ekjab n̄an eok.
Kwōn jab ba pata etan Irooj am̧ Anij.
Kwōn keememej raan in Jabōt, n̄an kokwōjarjar e.
Kwōn koutiej jemam̧ im jinōm̧.
Kwōn jab uror.
Kwōn jab ļōn̄.
Kwōn jab ko̧o̧t.
Kwōn jab kōnnaan naan in riab ņae ri turum̧.
Kwōn jab aņokņak.
Lale Exodus 20:3–17.