« Parau hi’u », Nō te pūai o te feiā ’āpī : E arata’i nō te rave i te mau mā’itira’a (2022)
« Parau hi’u », Nō te pūai o te feiā ’āpī
Parau hi’u
Hō’ē rāve’a nō te hi’opo’a i tō ’oe haerera’a i mua i ni’a i te ē’a nō te fafaura’a ’o te ferurira’a ïa i te mau uira’a i raro nei. ’O te mau uira’a e uihia ia ’oe i roto i te uiuira’a nō te fāri’i i te hō’ē parau fa’ati’a nō te hiero, ’eiaha rā e tīa’i roa i te uiuira’a. ’A rave i tā ’oe iho hi’opo’ara’a pae vārua. ’O te Parau tai’o a te Feiā ’Āpī Tamahine ato’a, te Parau tai’o a te pupu autahu’ara’a a Aarona ’e nā ture hō’ē ’ahuru ’o tē riro mai ’ei mauha’a maita’i nō te hi’opo’a ia ’oe iho.
Te mau uira’a nō te parau fa’ati’a hiero nō te feiā ’āpī
E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; i tāna Tamaiti, ’o Iesu Mesia ; ’e i te Vārua Maita’i ?
E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?
E ’itera’a pāpū ānei tō ’oe nō ni’a i te fa’aho’i-fa’ahou-ra’a mai o te ’evanelia a Iesu Mesia ?
Tē pāturu ra ānei ’oe i te Peresideni o Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei peropheta, ’ei ’ite ’e ’ei heheu parau ’e ’o ’oia ana’e te ta’ata i ni’a i te fenua nei tei ha’amanahia nō te fa’a’ohipa i te mau tāviri ato’a o te autahu’ara’a ? Tē pāturu ra ānei ’oe i te mau melo o te Peresidenira’a Mātāmua ’e o te pupu nō te Tino ’Ahuru Ma Piti ’āpōsetolo ’ei peropheta, ’ei hi’o ’e ’ei heheu parau ? Tē pāturu ra ānei ’oe i te tahi atu Huimana fa’atere rahi ’e te feiā fa’atere o te ’Ēkālesia nō te fenua nei ?
’Ua parau te Fatu ē, ’ia « rave-mā-hia » te mau mea ato’a i mua iāna (Te Ha’api’ira’a Tumu ’e te mau Fafaura’a 42:41). Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ? Tē ha’apa’o ra ānei ’oe i te ture nō te vi’ivi’i ’ore ?
Tē pe’e ra ānei ’oe i te mau ha’api’ira’a a te ’Ēkālesia a Iesu Mesia i roto i tā ’oe mau peu i ni’a i te mau melo o tō ’oe ’utuāfare ’e i ni’a ia vetahi ’ē, i te vāhi ’ōmo’e ’e i te vāhi ta’ata ?
Tē pāturu ra ānei ’oe ’aore rā tē fa’aitoito ra ānei ’oe i te tahi noa atu ha’api’ira’a, ravera’a ’aore rā ha’api’ira’a tumu e pāto’i nei i terā a Te ’Ēkālesia a Iesu Mesia i te Feiā Mo’a i te mau Mahana Hope’a nei ?
Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’a mā i te ’ōro’a, ’e i te ora i te orara’a e au i te mau ture ’e te mau fa’auera’a o te ’evanelia ?
Tē tūtava ra ānei ’oe ’eiaha e ha’avare i roto i te mau mea ato’a tā ’oe e rave ?
E ta’ata ’aufau tuha’a ’ahuru ti’a ānei ’oe ?
Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?
Tē vai ra ānei te tahi mau hara teimaha o tō ’oe orara’a tei tītauhia e fa’a’āfaro ’e te mau ti’a mana o te autahu’ara’a, ’ei tuha’a nō tō ’oe tātarahapara’a ?
’Ia mana’o ’oe, e mea ti’amā ānei ’oe ’ia tomo i roto i te fare o te Fatu ’e ’ia rave i te mau ’ōro’a o te hiero ?
Te parau tai’o a te Feiā ’Āpī Tamāhine
E tamāhine herehia vau e nā Metua i te ra’i ra, ma te nātura hanahana ’e te hope’a mure ’ore.
’Ei pipi nā Iesu Mesia, tē tūtava nei au ’ia riro mai iāna ra te huru. Tē ’imi nei au ’e tē rave nei au mai te au i te heheura’a e tae mai iā’u nei, ’e tē aupuru nei au ia vetahi ’ē i tōna i’oa mo’a.
E ti’a atu vau ’ei ’ite nō te Atua i te mau taime ato’a ’e i roto i te mau mea ato’a ’e i te mau vāhi ato’a.
’A tūtava ai au ’ia noa’a te fa’ateiteira’a, e poihere au i te hōro’a nō te tātarahapa, ’e e ’imi au i te ha’amaita’i iā’u i te mahana tāta’itahi. Ma te fa’aro’o, e ha’apūai au i tō’u ’utuāfare ’e i tō’u mau fēti’i, e rave au i te mau fafaura’a mo’a ’e e ha’apa’o vau i te reira, ’e e fāri’i au i te mau ’ōro’a ’e te mau ha’amaita’ira’a o te hiero mo’a.
Te parau tai’o a te pupu autahu’ara’a a Aarona
E tamaiti here au nā te Atua, ’e e ’ohipa tāna nā’u.
Ma tō’u ’ā’au ato’a ’e te itoito ’e te mana’o ’e te pūai, e here au i te Atua, e ha’apa’o vau i tā’u mau fafaura’a, ’e e fa’a’ohipa vau i tāna autahu’ara’a nō te tāvini ia vetahi ’ē, ma te ha’amata i roto i tō’u iho ’utuāfare.
’A tūtava ai au i te tāvini, i te fa’a’ohipa i te fa’aro’o, i te tātarahapa ’e i te ha’amaita’i atu ā iā’u i te mahana tāta’itahi, e ineine ïa vau nō te fāri’i i te mau ha’amaita’ira’a nō te hiero ’e te ’oa’oa mure ’ore o te ’evanelia.
E fa’aineine au nō te riro ’ei misiōnare itoito mau, ’ei tāne fa’aipoipo ha’apa’o mau ’e ’ei metua tāne here ho’i, nā roto i te rirora’a ’ei pipi mau nā Iesu Mesia.
E tauturu vau ’ia fa’aineine i te ao nei nō te ho’ira’a mai o te Fa’aora, nā roto i te anira’a i te tā’āto’ara’a o te mau ta’ata ’ia haere mai i te Mesia ’e ’ia fāri’i i te mau ha’amaita’ira’a o tōna tāra’ehara.
Nā ture hō’ē ’ahuru
’Eiaha roa tō ’oe ’ei Atua ’ē atu, iā’u nei.
’Eiaha roa ’oe e hāmani i te ’īdolo tarai nō ’oe.
’Eiaha ’oe e fa’ahiti faufa’a ’ore noa i te i’oa o tō Atua ra ’o Iehova.
E ha’amana’o i te mahana sābati ’ia ha’apa’ohia ’ei mahana mo’a.
E fa’atura atu i tō metua tāne, ’e tō metua vahine.
’Eiaha roa ’oe e [taparahi pohe i te ta’ata].
’Eiaha roa ’oe e moiheuo.
’Eiaha roa ’oe e ’eiā.
’Eiaha roa ’oe e ha’avare ia vetahi ’ē.
’Eiaha roa ’oe e nounou.
Hi’o Exodo 20:3–17.