Lēsoni 26

Ko e Fakahā ʻo Kau ki he Lakanga Fakataulaʻeikí

Talateú

ʻI he mafola atu ʻa e ngāue fakafaifekaú he māmaní he senituli 20, ne lotua ʻe he kau taki ʻo e Siasí ha tataki fekauʻaki mo e ngaahi fakangatangata ʻo e fakanofo ki he lakanga fakataulaʻeikí mo e ngaahi ouau fakatemipalé ki he kāingalotu hakoʻi ʻAfilika ʻo e Siasí. ʻI he ʻaho 1 ʻo Sune 1978 ne maʻu ai ha fakahā aofangatuku ʻe Palesiteni Sipenisā W. Kimipolo, mo hono ongo tokoni ʻi he Kau Palesitenisī ʻUluakí, mo e kau mēmipa ʻo e Kau ʻAposetolo ʻe Toko Hongofulu Mā Uá ʻi he Temipale Sōlekí. ʻE mahino lelei ange ki he kau akó heʻenau kau ki he lēsoní e founga ki hono tali e ngaahi fehuʻi ʻo e ongoongoleleí ʻi ha founga ʻoku angatonú mo toe ako ai ki he ngaahi tūkunga mo e moʻoni fekauʻaki mo e fakahā aofangatuku ko ʻení.

Laukonga Puipuituʻá

• Gordon B. Hinckley, “Priesthood Restoration,” Ensign, Oct. 1988, 69–72.

• “Race and the Priesthood,” Gospel Topics, lds.org/topics.

• Ahmad Corbitt, “A Personal Essay on Race and the Priesthood,” konga 1–4, Perspectives on Church History series, history.lds.org/section/perspectives-on-church-history.

Ngaahi Fokotuʻu ki hono Akoʻí

Talateu ki he Fanongonongo Fakamafaiʻi 2

Ko hono tali e ngaahi fehuʻi ʻo e ongoongoleleí ʻi ha founga ʻoku angatonu.

Fakamatalaʻi ʻa e tūkunga ko ʻení ki hoʻo kalasí:

ʻI he tuku ʻa e akó ʻi ha ʻaho ʻe taha, naʻe haʻu ai ha mēmipa ʻe taha ʻo e Siasí kia Sikoti ʻoku ʻi ai haʻane ngaahi fehuʻi kau ki he tokāteline ʻa e Siasí. Ne ongoʻi ʻe Sikoti ʻokú ne malava ke fai ha tokoni ki hono kaungāmeʻá, ka naʻá ne fakakaukau he hili ʻa e meʻa ko ʻení pe ko e hā ha meʻa kehe te ne fai ʻi ha toe haʻu ha mēmipa ʻo e Siasí mo ha fehuʻi tatau.

ʻEke ki he kau akó pe ko e hā te nau fai ke tokoni ki he kāingalotu ʻo e Siasí ʻoku nau ʻomi ha ngaahi fehuʻi fakamātoato kau ki he Siasí pe ko hono tokāteliné.

Fakaʻaliʻali mo lau ʻa e lea ko ʻeni ʻa Palesiteni Tieta F. ʻUkitofa ʻo e Kau Palesitenisī ʻUluakí:

“Ko e faʻa fehuʻí ko e tupuʻanga ia ʻo e fakamoʻoní. ʻOku ongoʻi mā pe taʻe feʻunga ha kakai ʻe niʻihi koeʻuhí ko ʻenau ngaahi fehuʻi fakaʻāuliliki ʻoku fai ʻo kau ki he ongoongoleleí, ka ʻoku ʻikai totonu ke nau ongoʻi pehē. ʻOku ʻikai ko ha fakaʻilonga ʻo e vaivai ʻa ʻete fehuʻí ka ko ha fakamelomelo ia ki he tupulakí.

“Kuo fekau ʻe he ʻOtuá ke tau kumi ki ha ngaahi tali ki heʻetau ngaahi fehuʻí pea kole pē ʻa e meʻa ʻoku tau fekumi aí ʻi he loto-fakamātoato mo e loto-moʻoni ʻo maʻu ʻa e tui kia Kalaisí’ [Molonai 10:4]. Ko e taimi pē te tau fai ai iá, ʻoku lava leva ke fakahā mai kiate kitautolu hono moʻoni ʻo e meʻa kotoa pē ʻʻi he mālohi ʻo e Laumālie Māʻoniʻoníʻ [Molonai 10:5]

ʻOua naʻa manavahē; fai ha ngaahi fehuʻi. Fieʻilo, kae ʻoua naʻa fakaveiveiua! Pikitai maʻu pē ki he tuí mo e maama kuó ke ʻosi maʻú” (“The Reflection in the Water” [Church Educational System fireside for young adults, Nov. 1, 2009], 7, ldschurchnewsarchive.com)

• Ko e hā ʻoku akoʻi ʻe Palesiteni ʻUkitofa ʻe lava ʻo tokoni ki ha taha ʻoku ʻi ai haʻane ngaahi fehuʻi ʻi he ngaahi meʻa fakatokāteline, fakahisitōlia, pe fakasōsiale fekauʻaki mo e Siasí? (Tokoni ke mahino ki he kau akó ʻa e tefitoʻi moʻoni ko ʻení: Kapau te tau fakaʻaongaʻi ʻetau tui ki he ʻEiki ko Sīsū Kalaisí, pea ʻe lava ke maʻu ha ngaahi tali ki heʻetau ngaahi fehuʻi fakamātoató mei he Tamai ʻi Hēvaní.)

Fakamatalaʻi ange ko e taha ʻo e ngaahi meʻa fakahisitōlia ne fehuʻia ʻe ha kāingalotu ʻe niʻihi ʻo e Siasí ne makatuʻunga ia mei ha tuʻutuʻuni ʻa e Siasí ne fakahoko ʻi he kongaloto ʻo e 1800 ki he 1978 ʻo tapui ai e kakai tangata hakoʻi ʻAfiliká mei hono fakanofo ki he lakanga fakataulaʻeikí. Naʻe toe tapui foki ai mo hono maʻu ʻe he houʻeki fafine mo e kakai tangata ʻuliʻulí honau ʻenitaumení pe kau ʻi he ngaahi ouau silá. Fakaafeʻi ha tokotaha ako ke lau leʻolahi e lea ko ʻeni, ʻa ia ko ha konga ia ʻo e talateu ki he Fanongonongo Fakamafaiʻi 2 (ʻoku ʻi he Tokāteline mo e Ngaahi Fuakavá). Kole ki he kau akó ke nau fakakaukau ki he founga e tokoni ʻa e fakamatala ko ʻení kiate kinautolu ʻoku ʻi ai haʻanau hohaʻa fekauʻaki mo e meʻa fakahisitōlia ko ʻení.

“ʻOku akoʻi ʻe he Tohi ʻa Molomoná ʻoku ‘tatau ʻa e kakai fulipē ʻi he ʻao ʻo e ʻOtuá,’ ʻo kau ai ʻa e ‘ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine’ (2 Nīfai 26:33). Kuo papitaiso ha kakai mei he matakali mo e haʻa kotoa pē mei ha ngaahi fonua lahi pea nau moʻui ko ha kāingalotu faivelenga ʻo e Siasí, ʻi hono kotoa e hisitōlia ʻo e Siasí. ʻI he lolotonga e moʻui ʻa Siosefa Sāmitá, ne ʻi ai ha kakai tangata ʻuliʻuli tokosiʻi ʻo e Siasí ne fakanofo kinautolu ki he lakanga fakataulaʻeikí. Ne taʻofi ʻe he kau taki ʻo e Siasí ʻi he kamataʻanga mai pē hono hisitōliá hono foaki e lakanga fakataulaʻeikí ki he kakai tangata ʻoku hakoʻi ʻAfiliká. ʻOku ʻikai ke ʻomi ʻe he ngaahi lekooti ʻo e Siasí ha fakamatala mahino ki he tupuʻanga ʻo e meʻá ni” (talateu ki he Fanongonongo Fakamafaiʻi 2).

• Ko e hā ha ngaahi moʻoni mahuʻinga ʻoku ʻi he fakamatala ko ʻení maʻanautolu te nau faingataʻaʻia ʻi he meʻá ni?

Tuhuʻi pau ange e laine ʻoku pehē, “ʻOku ʻikai ke ʻomi ʻe he ngaahi lekooti ʻa e Siasí ha fakamatala mahino ki he tupuʻanga ʻo e meʻá ni.” Neongo ʻe fokotuʻu mai ʻe ha kakai ʻe niʻihi ha ngaahi ʻuhinga ki he ʻikai ke fakanofo e kakai tangata hakoʻi ʻAfiliká ki he lakanga fakataulaʻeikí ʻi ha taimi, mahalo pē he ʻikai ke tonu e ngaahi ʻuhinga ko iá. Fakaafeʻi ha tokotaha ako ke lau e lea ko ʻeni ʻa ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Kapau te ke lau e folofolá mo fakakaukau ki he fehuʻi ko ʻení, ‘Ko e hā naʻe fai ai ʻe he ʻEikí e fekau ko ʻení pe ko e hā naʻá ne fekauʻi ai iá,’ te ke ʻilo ko e fekau pē ʻe taha ʻi ha foʻi fekau ʻe teau naʻe ʻomai hano ʻuhinga. ʻOku ʻikai ko e sīpinga ʻa e ʻEikí ke ʻomai ha ʻuhinga. ʻE lava ʻe kitautolu [kakai fakamatelié] ʻo fakaʻuhingaʻi e fakahaá. Te tau lava ʻo fakaʻuhingaʻi e ngaahi fekaú. Ko e fakaʻuhinga pē ia ʻatautolu. ʻE fakaʻuhingaʻi ʻe ha kakai ʻe niʻihi e meʻa ʻoku tau talanoaʻi hení [matakali mo e lakanga fakataulaʻeikí], pea te nau matuʻaki hala ʻaupito ai. …

“… ʻOua muʻa naʻa tau fai e foʻi fehalaaki ʻo e kuohilí, ʻi he meʻá ni mo e ngaahi ʻēlia kehé, ke fakaʻuhingaʻi e fakahaá. ʻE mahino ʻaupito ko e foʻi fakaʻuhinga pē ia ʻa e tangatá” (Ko e Ngaahi Lēsoni ʻoku Ako ʻi he Moʻuí [2011], 68–69).

• Ko e hā ʻe fakapotopoto ai ke ʻoua ʻe fakamahamahalo ki he ʻuhinga ne ʻikai ke maʻu ai ʻe he niʻihi fakafoʻituitui hakoʻi ʻAfiliká e lakanga fakataulaʻeikí pe lava ʻo fakangofua ke kau he ngaahi ouau fakatemipalé kimuʻa he 1978. (ʻOku lea e tangatá mei ha fakakaukau ʻoku fakangatangata, pea kuo teʻeki talamai ʻe he ʻOtuá e ʻuhingá kiate kitautolu .)

Fakamamafaʻi ʻi he ʻahó ni, ʻoku fakataʻeʻaongaʻi ʻe he Siasí e ngaahi fakakaukau ne paotoloaki he kuohilí kau ki he meʻá ni: ko e kili ʻuliʻulí ko ha fakaʻilonga ia ʻo ha ʻikai fakahoifua fakalangi pe fakamalaʻia; ʻoku fakahaaʻi ʻe he kili ʻuliʻulí ha ngāue taʻe māʻoniʻoni ʻi he maama fakalaumālié; ko ha angahala e femaliʻaki mo e ngaahi matakali kehé; pe ʻoku maʻulalo hifo e kau ʻuliʻulí pe kakai mei ha faʻahinga matakali pe haʻa kehe ki ha faʻahinga taha pē. ʻOku fakahā mahino mai ʻe he kau taki ʻo e Siasí ʻi he ʻahó ni ʻa e ʻikai ke nau poupouʻi ha faʻahinga tōʻonga lau fakamatakali ʻi he kuohilí mo e lolotongá. (See “Race and the Priesthood,” Gospel Topics, lds.org/topics.)

• ʻE tokoniʻi fēfē ʻe he tui ʻa e kakai kia Sīsū Kalaisí ke fakaleleiʻi ʻenau fehuʻi pe hohaʻa kau ki he fakangatangata ne hoko ki he lakanga fakataulaʻeikí kimuʻa he 1978?

Fanongonongo Fakamafaiʻi 2

ʻOku foaki e lakanga fakataulaʻeikí mo e ngaahi tāpuaki ʻo e temipalé ki he mēmipa kotoa pē ʻo e Siasí ʻoku moʻui tāú

Fakamatalaʻi ange ne lauiafe ha kakai hakoʻi ʻAfilika mei he ngaahi puleʻanga kehekehe ne nau ʻiloʻi e moʻoni ʻo e ongoongolelei kuo toe fakafoki maí kimuʻa ʻi he 1978. Ne lahi ha ngaahi tohi ne maʻu ʻe he kau taki ʻo e Siasí ʻi Sōleki Siti mei ha kau ului ne teʻeki papitaiso mei Naisīlia mo Kana ko e kole ke ʻoange ha kau faifekau ki ʻAfilika. Ne lotua mo fakakaukauʻi ʻe he kau taki ʻo e Siasí e meʻá ni ʻi ha ngaahi taʻu lahi, ka naʻa nau ongoʻi ʻoku teʻeki ke hokosia e taimi ke ʻave ha kau faifekau ki ʻAfilika. Ne tokoni ha kāingalotu ʻuliʻuli faivelenga ʻi Palāsila ki hono langa ʻo e Temipale Sao Pauló ʻa ia naʻe fanongonongo ʻi he 1975, neongo ʻenau ʻilo he ʻikai ke nau lava ʻo hū ki he temipalé.

Talaange ki he kau akó ʻoku ʻi he Fanongonongo Fakamafaiʻi 2 e fakamatala totonu ki he fakahā ne maʻu ʻe Palesiteni Sipenisā W. Kimipolo, hono ongo Tokoni ʻi he Kau Palesitenisī ʻUluakí, mo e kau mēmipa ʻe toko hongofulu ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe maʻu e fakahaá ʻi he ʻaho 1 ʻo Sune 1978. Kole ki ha tokotaha ako ke lau leʻolahi e ʻuluaki palakalafí ko e ngaahi foʻi lea ʻoku pehē “Siʻomau Ngaahi Tokoua.” Fakaafeʻi e kalasí ke nau muimui ki ai, ʻo fekumi ki he meʻa naʻe pehē ʻe he kau taki ʻo e Siasí ne nau fakamoʻoniʻí.

• Ko e hā e meʻa naʻe fakamoʻoniʻi ʻe he kau taki ʻo e Siasí ki he māmaní kotoa?

• Ko e hā naʻá ne ueʻi fakalaumālie e kau taki ʻo e Siasí ʻi heʻenau mamata ki hono fakalahi e ngāue ʻa e ʻEikí?

Kole ki ha tokotaha ako ke lau leʻolahi e palakalafi hokó, ʻa ia ʻoku kamata ʻaki e ngaahi foʻi lea “Tuʻunga ʻi he mahino kiate kimautolu e ngaahi talaʻofá.” Fakaafeʻi ʻa e kalasí ke nau kumi ki he founga ne ngāue ai e kau taki ʻo e Siasí ʻo fakatatau ki heʻenau ngaahi fakaʻamu ne ueʻi fakalaumālié. Fehuʻi ange:

• Naʻe ngāue fēfē ʻa Palesiteni Sipenisā W. Kimipolo mo e kau taki kehe ʻo e Siasí ki heʻenau ngaahi fakaʻamu ne tataki fakalaumālié?

• Fakatatau ki he ʻuluaki laine ʻe tolu ʻo e palakalafi ko ʻení, ko e hā e meʻa ne ʻilo ʻe he kau taki ʻo e Siasí kau ki he fakangatangata ʻo e lakanga fakataulaʻeikí? (Naʻa nau ʻilo ʻe ʻi ai ha taimi, ʻe maʻu ʻe he tangata moʻui taau kotoa pē ha faingamālie ke ne maʻu ai e lakanga fakataulaʻeikí.)

Fakamatalaʻi ange ne ʻilo ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi ha ngaahi taʻu lahi kimuʻa he 1978, ʻe fie maʻu ha fakahā kae toki lava ʻo fai ha liliú, naʻa nau aleaʻi mo lotua e fakangatangata ki he lakanga fakataulaʻeikí. Fakaʻaliʻali ʻa e lea ko ʻeni ʻa Palesiteni Sipenisā W. Kimipolo (1895-1985) pea kole ki ha tokotaha ako ke lau leʻolahi ia.

“Naʻá ku ʻalu toko taha pē ʻi he ʻaho ki he ʻaho ki he loki ʻi ʻolunga ʻi he temipalé he loto māluʻia mo fakamātoato ʻou ʻohake ai hoku lotó ki he ʻEikí mo u fakahā ange te u fai hoku tūkuingatá ke fakahoko ʻa e polokalamá. Naʻá ku fie maʻu ke u fai hono finangaló. Naʻá ku fakahā ʻeni kiate ia peá u pehē ange, ʻʻE Eiki, ko hoku lotó ke u fai pē ʻa ia ʻoku totonú. ʻOku ʻikai ke mau faʻufaʻu ha ngaahi palani ke fakahoko ha ngaahi meʻa lalahi. ʻOku mau fie maʻu pē ʻa e meʻa ko ia ʻokú Ke finangalo ki aí, pea ʻoku mau fie maʻu ke hoko ia ʻi Ho taimi pē ʻoʻoú kae ʻoua naʻa kimuʻa ai’” (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 292-93).

• Ko e hā ʻoku akoʻi mai kiate kitautolu ʻe he lea ʻa Palesiteni Kimipoló ʻo fekauʻaki mo e founga ʻoku fekumi ai e kau palōfitá ki ha fakahaá? (Hili e tali ʻa e kau akó, mahalo te ke fie hiki e ngaahi tefitoʻi moʻoni ko ʻení ʻi he palakipoé: ʻOku fekumi e kau palōfitá ki he finangalo ʻo e ʻEikí ki hono tataki ʻo e Siasí.)

Fakaafeʻi ha tokotaha ako ke lau leʻolahi ʻa e ongo palakalafi hono hokó ʻi he Fanongonongo Fakamafaiʻi 2, ʻo kamataʻaki e “Kuó Ne ʻafio mai ki heʻemau lotú.” Kole ki he kalasí ke nau fekumi ki he tali ʻa e ʻEikí ki he lotu ʻa Palesiteni Kimipoló, hono ongo Tokoni ʻi he Kau Palesitenisī ʻUluakí, mo e kau mēmipa ʻe toko hongofulu ʻo e Kōlomu ʻo e Kau ʻAposetolo ʻe Toko Hongofulu Mā Uá.

• Ko e hā e tali ʻa e ʻEikí ki he lotu ʻa ʻEne palōfitá? (Fakamamafaʻi e pōpokai ʻa e ʻEikí ne maʻu ʻi he fakahā ko ʻení: ʻOku lava ke maʻu ʻe he fānau kotoa ʻa e Tamai Hēvaní e ngaahi tāpuaki ʻo e ongoongolelei ʻo Sīsū Kalaisí.)

Ke tokoniʻi e kau akó ke mahino e founga ne maʻu ai e fakahā ʻoku lekooti ʻi he Fanongonongo Fakamafaiʻi 2, vahevahe e lea ko ʻeni ʻa Palesiteni Kōtoni B. Hingikelī (1910–2008), ʻa ia naʻe ʻi ai he ʻaho ne maʻu ai e fakahaá ʻi he temipalé:

“Ne ʻi ai ha ongo molumalu mo māʻoniʻoni ʻi he lokí. Ne u ongoʻi ne fakaava mai ha matapā mei he taloni ʻo e langí ʻi he tūʻulutui ʻa e palōfita ʻo e ʻOtuá mo hono ngaahi Tokouá ʻo fai ʻenau tāutapá. Ne ʻi ai e Laumālie ʻo e ʻOtuá. Ne hoko mai ki he palōfita ko iá ha fakapapauʻi ʻi he mālohi ʻo e Laumālie Māʻoniʻoní ʻoku tonu e meʻa naʻá ne lotuá, kuo hokosia e taimi, ke foaki atu e tāpuaki fakaofo ʻo e lakanga fakataulaʻeikí ki he kakai tangata moʻui taau he feituʻu kotoa pē ʻo tatau ai pē ko e hā honau tupuʻangá. …

“Ne mau ʻiloʻi kotoa kuo hokosia e taimi ke fai ai ha liliú pea ko e tuʻutuʻuni ia kuo ʻomi mei he langí. Ne mahino e talí. Ne ʻi ai ha fāitaha haohaoa ʻiate kimautolu he aʻusia mo e mahino ne mau maʻú” (“Priesthood Restoration,” Ensign, Oct. 1988, 70)

Fakamatalaʻi ange ko e hili pē hono maʻu e fakahā ke toʻo e fakangatangata ki he lakanga fakataulaʻeikí, ne ʻave leva ha kau faifekau ki ʻAfilika. Kuo ʻosi langa ha ngaahi temipale ʻi he konitinēniti ko iá, kuo laka hake he ngaahi siteiki ʻe teau kuo fokotuʻú, pea kuo laukilu e kakai kuo nau maʻu e ngaahi ouau ʻo e ongoongoleleí maʻanautolu mo ʻenau ngaahi kui kuo pekiá. (Vakai, hangē ko ʻení, “Mormons in Africa: A Bright Land of Hope,” mormonnewsroom.org; “Emerging with Faith in Africa,” konga 1–3, lds.org/prophets-and-apostles/unto-all-the-world.)

Fakaʻaliʻali ʻa e lea ko ʻeni ʻa ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá, pea kole ki ha tokotaha ako ke lau leʻolahi ia:

“ʻOku tānaki mai ʻa e kakai faivelenga ʻi he konitinēniti kotoa mo e ngaahi motu ʻo e tahí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻikai mahuʻinga ʻa e ngaahi faikehekehe ʻi he puipuituʻa ʻo e anga fakafonuá, leá, tangata pe fefine, mo e fōtunga ʻo e matá ʻi he femoʻuekina ʻa e kāingalotú he ngāue tokoni maʻa honau Fakamoʻui ʻofeiná. ʻOku fakahoko e lea ʻa Paulá: ʻHe ko kimoutolu kotoa pē kuo papitaiso kia Kalaisi, kuo mou ʻai ʻa Kalaisi.

“Pea ‘oku ʻikai ai ha Siu pe Kiliki, ʻoku ʻikai ha pōpula pe ha tauʻatāina, ʻoku ʻikai ha tangata pe ha fefine: ka ʻoku mou taha kotoa pē ʻia Kalaisi Sīsū’ [Kalētia 3:27–28].

“Ko ʻene toki mahino pē ʻa e tuʻunga Fakaetamai moʻoni ʻo e ʻOtuá pea lava leva ke maʻu ʻa e houngaʻia kakato ʻo e feohi fakatokoua moʻoni ʻa e tangatá. ʻOku fakatupu ʻe he mahino ko iá ʻa e holi ʻo e lotó ke langa ha ngaahi halafakakavakava ʻo e ngāue fakatahá kae ʻikai ko ha ngaahi ʻā vahevahe.” (“Teach Us Tolerance and Love,” Ensign, May 1994, 70).

• ʻOku teuteuʻi fēfē kitautolu ʻe he ongoongoleleí ke tau fāitaha mo e kakai ʻoku kehekehe hotau puipuituʻá?

• Ko e hā ha ngaahi sīpinga kuó ke mamata ai ʻi ha Kāingalotu ʻo e Siasí mei ha ngaahi puipuituʻa kehekehe ʻoku nau tupulaki ʻi he fāitahá mo e uouangatahá?

ʻI hono fakaʻosi, fakaafeʻi e kau akó ke nau fakakaukau ki haʻanau tali kapau ʻe ʻeke ange pe ko e hā ne ʻikai ke fakanofo ai ʻe he Siasí e kakai tangata hakoʻi ʻAfiliká ki he lakanga fakataulaʻeikí ʻi ha vahaʻa taimi. Fakapapauʻi ʻoku lelei ke fakamatalaʻi ki he niʻihi kehé ʻoku ʻikai ke tau ʻiloʻi e ʻuhinga ne kamata ai hono fakangatangata ʻo e lakanga fakataulaʻeikí ka ʻoku totonu ke tau vahevahe mo fakamoʻoniʻi e ngaahi moʻoni ʻoku tau ʻiló.

Laukonga ʻa e Tokotaha Akó

• 2 Nīfai 26:33; Fakamatala Fakamafaiʻi 2.

• “Race and the Priesthood,” Gospel Topics, lds.org/topics.