Lēsoni 12 Naunau ʻa e Faiakó

Ko Hono Fokotuʻu ʻo e Ngāue ʻo Saioné

Hili hono fekauʻi ʻe he ʻEikí ke fokotuʻu e ngāue ʻo Saioné, naʻe kamata ke langa ʻe he Kāingalotú ha feituʻu fakatahaʻanga ʻi he Vahefonua Siakisoni Mīsulí. ʻOku fakataumuʻa ʻa e lēsoni ko ʻení ke tokoni ki he kau akó ke nau ʻilo e ngaahi founga te nau lava ai ʻo tokoni ke langa hake ʻa Saione ʻi hotau kuongá.

Ngaahi Fokotuʻu ki hono Akoʻí

ʻOku fekauʻi ʻe he ʻEikí Hono kakaí ke fokotuʻu e ngāue ʻo Saioné.

Kole ki he kau akó ke nau fakakaukau pe kuo tuʻo fiha ʻeni ʻenau lotu ʻo kole ki he Tamai Hēvaní ki ha tokoni ke ʻiloʻi e meʻa ʻokú Ne finangalo ke nau fai ʻi heʻenau moʻuí.

Fakamatalaʻi ange ʻi he faʻahitaʻu failau ʻo e 1829, kimuʻa pea fokotuʻu e Siasí, naʻe maʻu ʻe Siosefa Sāmita ha ngaahi fakahā maʻa ʻŌliva Kautele, Hailame Sāmita, mo Siosefa Naiti. Naʻe fie maʻu ʻe he kau tangata takitaha ko ʻení ke nau ʻiloʻi e meʻa ʻoku finangalo e ʻEikí ke nau faí. Hiki e ngaahi fakamoʻoni fakafolofola ko ʻení ʻi he palakipoé: Tokāteline mo e Ngaahi Fuakava 6:6; 11:6; 12:6.

Fakaafeʻi e kau akó ke nau lau fakalongolongo e ngaahi veesi ko ʻení, ʻo fekumi ki he meʻa naʻe folofola ʻaki ʻe he ʻEikí ki he kau tangata takitaha ko ʻení.

• ʻOkú ke pehē ʻoku ʻuhinga ki he hā ke “ʻomai pea fokotuʻu ʻa e ngāue ʻo Saioné”? (Tokāteline mo e Ngaahi Fuakava 6:6).

Fakaafeʻi ha tokotaha ako ke ne lau leʻolahi e fakamatala ʻa Siosefa Sāmita ʻi he konga 1 ʻo e naunau teuteú. Pe te ke fie huluʻi e vitiō, “Teachings of Joseph Smith: Preparing for Zion” (1:42). Kole ki he kalasí ke nau fekumi ki he meʻa naʻe akoʻi ʻe Siosefa Sāmita fekauʻaki mo Saioné.

• ʻOkú ke pehē ko e hā ʻoku hoko ai e ngāue ʻo Saioné ko ha meʻa kuo tokanga ki ai e kakai ʻo e ʻOtuá ʻi he kuonga kotoa pē? (Fakaafeʻi e kau akó ke nau fakamanatu e meʻa kuo nau ako ʻi heʻenau naunau teuteú.)

Hiki ʻa e kupuʻi lea taʻekakato ko ʻení ʻi he palakipoé: Te tau lava ʻo langa hake ʻa Saione ʻaki …

Fakamatalaʻi ange ʻi Nōvema mo Tīsema ʻo e 1830 lolotonga e ngāue ʻa Siosefa Sāmita ʻi heʻene liliu fakalaumālie ʻo e Tohi Tapú, naʻá ne maʻu ha ngaahi fakahā fekauʻaki mo e palōfita fakakuongamuʻa ko ʻĪnoké mo hono kakaí. Fakaafeʻi ha tokotaha ako ke ne lau e Mōsese 7:18–19, 21 mo ha tokotaha ako ʻe taha ke ne lau e Tokāteline mo e Ngaahi Fuakava 97:21. Kole ki he kalasí ke nau fakafanongo ki hono fakamatalaʻi ʻe he ʻEikí ʻa Saioné.

• Ko e hā te tau lava ʻo ako mei hono fakamatalaʻi ʻe he ʻEikí ʻo Saioné ʻokú ne tokoniʻi kitautolu ke tau ʻiloʻi e founga ke langa hake ai ʻa Saione ʻi hotau kuongá? (Hiki e tali ʻa e kau akó ʻi he palakipoé ʻi lalo ʻi he kupuʻi lea taʻekakató. ʻE kehekehe pē e tali ʻa e kau akó kae mahalo naʻa kau ai e ngaahi sīpinga ko ʻení: Te tau lava ʻo langa hake ʻa Saione ʻaki ʻetau hoko ʻo loto-taha mo fakakaukau taha, ʻaki e moʻui māʻoniʻoní, ʻaki hono tokangaʻi e paeá mo e masivá, pea ʻaki e feinga ke loto-maʻa.)

• Ko e hā ha faikehekehe ʻe lava ʻo fakahoko ʻi ha fāmili, uooti, pe kolo ʻoku “loto-taha pē mo fakakaukau taha” ʻa e taha kotoa?

Fakaafeʻi e kau akó ke nau toe vakaiʻi e fakamatala ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he konga 1 ʻo e naunau teuteú. Kole ki he kau akó ke nau fekumi ki he founga te tau lava ai ʻo aʻusia e loto-tahá mo e fakakaukau tahá. Hili ʻenau lipōtí, mahalo te ke fie tānaki atu ʻa hono fokotuʻu e Fakamoʻuí ʻi he uhouhonga ʻo ʻetau moʻuí mo e muimui ki he kau taki ʻo e Siasí ki he lisi ʻi he palakipoé.

• ʻOkú ke pehē ʻe tokoni fēfē ʻa hono fokotuʻu e Fakamoʻuí ʻi he uhouhonga ʻo ʻetau moʻuí mo e muimui ki he kau taki ʻo e Siasí ke tau hoko ʻo hangē ko e kakai ʻo Saioné?

Naʻe feinga e Kāingalotú ke langa ʻa e kolo ko Saioné ʻi he Vahefonua Siakisoni, Mīsulí.

Fakamatalaʻi ange naʻe ako e Kāingalotú mei he Mōsese 7 ʻe toe tānaki fakataha e kakai ʻa e ʻEikí pea ʻe toe langa ha kolo ʻe taha ko Saione (vakai, Mōsese 7:62), kimuʻa ʻi he Hāʻele ʻAngau Ua Mai ʻa e Fakamoʻuí. Hili ha ngaahi māhina siʻi mei hono maʻu ʻo e fakahā ʻoku lekooti ʻi he Mōsese 7, naʻe toe maʻu ʻe he Palōfita ko Siosefa Sāmitá ha fakahā lolotonga ha konifelenisi ʻa e Siasí naʻe fakahā lahi ange ai fekauʻaki mo e kolo ko ʻeni ko Saioe ʻi he kahaʻú (vakai, Tokāteline mo e Ngaahi Fuakava 45).

Fakaafeʻi e kalasí ke nau lau fakataha e Tokāteline mo e Ngaahi Fuakava 45:66–71, ʻo fekumi ki he ngaahi fakamatala ki he kolo ko Saioné.

• Ko e hā ha ola ʻokú ke sioloto atu naʻe maʻu ʻe he fuofua Kāingalotú ʻi he fakahā ko ʻení?

Fakamanatu ange ki he kau akó naʻe toki ʻilo ʻe Siosefa Sāmita kimui ange ʻi ha fakahā ko Tauʻatāina, ʻi he Vahefonua Siakisoni, Mīsulí “ko e potu ia ʻi loto mālie” ki he kolo ko Saioné (Tokāteline mo e Ngaahi Fuakava 57:3).

• Ko e hā ha ngaahi faingataʻa naʻá ne taʻofi e Kāingalotú mei hono langa ʻo e kolo ko Saioné ʻi he Vahefonua Siakisoní? (Poupouʻi e kau akó ke nau fakamanatu e meʻa naʻa nau ako mei he konga 2 ʻo e naunau teuteú.)

• Ko e hā ha ngaahi fehuʻi naʻe mei ʻeke ʻe he Kāingalotú hili hono tuli kinautolu mei he Vahefonua Siakisoní?

ʻE toki lava pē ke langa ʻa Saione ʻi he ngaahi tefitoʻi moʻoni ʻo e māʻoniʻoni.

Fakamatalaʻi ange ʻi he ngaahi māhina hili hono tuli fakamamahiʻi e Kāingalotú mei he Vahefonua Siakisoní ʻe he kau fakatanga Mīsulí, naʻe fefaʻuhi ʻa Siosefa Sāmita mo e ngaahi fehuʻi “ko e hā kuo tuku ai ʻe he ʻOtuá ke hoko ha fuʻu mamahi lahi ki Saioné” mo e “ko e hā e ngaahi founga te ne toe fakafoki ai [ʻa Saione] ki [hono] tofiʻá” (“Letter to Edward Partridge and Others, 10 December 1833,” josephsmithpapers.org). Naʻe faifai pea ʻoange ʻe he ʻEikí kia Siosefa ha fakakaukau ki he ʻuhinga naʻe fakatangaʻi mo tuli ai e Kāingalotú.

Fakaafeʻi ha vaeua ʻo e kalasí ke nau toe vakaiʻi e Tokāteline mo e Ngaahi Fuakava 101:2–3, 6–8 pea ki he vaeua ʻe tahá ke nau toe vakaiʻi e Tokāteline mo e Ngaahi Fuakava 105:3–6, ʻa ia ko e ngaahi potufolofola naʻa nau ako ʻi he konga 3 ʻo e naunau teuteú. Kole ki he kau akó ke vahevahe ʻenau ngaahi fakakaukau fekauʻaki mo e ngaahi fehuʻi ko ʻeni naʻe fakaafeʻi kinautolu ke nau fakalaulauloto ki aí:

• Ko e hā naʻá ne taʻofi e Kāingalotú mei hono fakahoko e ngāue ʻo Saioné ʻi he Vahefonua Siakisoni, Mīsulí?

• Ko e hā ha ngaahi ngāue mo ha ʻulungaanga ʻoku fie maʻu ʻe he ʻEikí meiate kinautolu ʻi he ngaahi ʻaho kimui ní ʻoku nau maʻu e holi ke langa hake ʻa Saioné? (Tānaki atu e tali ʻa e kau akó ki he lisi ʻi he palakipoé ʻi lalo ʻi he kupuʻi lea Te tau lava ʻo langa hake ʻa Saione ʻaki …)

Fakamatalaʻi ange neongo ko Tauʻatāina, Mīsuli “ko e feituʻu ia ʻi loto mālie” ʻi Saioné (Tokāteline mo e Ngaahi Fuakava 57:3), ka naʻe akoʻi ʻe he Palōfita ko Siosefa Sāmitá “ka ai ha potu ʻoku fakataha ai ʻa e Kāingalotú ko Saione ia” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 213). ʻI he ʻaho ní, ʻoku kau ai e ngaahi siteiki kotoa ʻo e Siasí ʻi he funga ʻo e māmaní.

Fakaʻaliʻali e lea ko ʻeni ʻa Siosefa Sāmitá:

“ʻOku totonu ke hoko hono langa hake ʻo Saioné ko ʻetau kaveinga maʻongoʻonga tahá ia” (Ngaahi Akonakí: Siosefa Sāmita, 213).

• Fakatatau ki he meʻa kuó ke ako fekauʻaki mo Saioné, ko e hā ʻokú ke pehē ai ʻoku totonu ke hoko hono langa hake ʻo Saioné ko ha taha ia ʻo hoʻo ngaahi taumuʻa maʻongoʻonga tahá?

Tuku ha taimi ke toe vakaiʻi ai ʻe he kau akó e meʻa kuo nau ako mei he ngaahi aʻusia ʻa e fuofua Kāingalotú mo e ngaahi fakahā fekauʻaki mo hono langa ʻo Saioné. Fakaafeʻi ke nau fakalaulauloto ki he meʻa te nau lava ʻo fai he taimí ni ke tokoni ki hono fokotuʻu ʻo Saione ʻi honau ngaahi ʻapí, uōtí, mo e kolo ʻo e Siasí. Mahalo te ke fie poupouʻi kinautolu ke hiki e ngaahi fakakaukau mo e ongo ʻoku nau maʻú. Mahalo foki te ke fie kole ki ha kau ako ʻe niʻihi ke vahevahe e meʻa te nau faí. Fakamanatu ange ke ʻoua te nau vahevahe ha meʻa ʻoku fuʻu fakataautaha.

Ki he Kalasi Hokó

Fakamatalaʻi ange naʻe fakahā ʻe he ʻEikí e ngaahi fono ʻo e fakatapuí, moʻui maʻá, moʻui leleí, mo e Sāpaté, mo ha ngaahi meʻa kehe, ke tokoniʻi Hono Kāingalotú ke nau fokotuʻu ʻa Saione. Fakamamafaʻi ange ʻe maʻu ʻe he kau akó e faingamālie ke ako ha taha ʻo e ngaahi tefito ko ʻení pe lahi ange ʻi heʻenau teuteu ki he kalasi hokó. Poupouʻi ke nau haʻu mateuteu ki he kalasi hokó ke vahevahe ha meʻa makehe naʻa nau maʻu fekauʻaki mo ha taha ʻo e ngaahi fono ko ʻení pe lahi ange.