0.

Pangbukas nga Paathag

0.0

Introduksyon

Ang Ginuo nagtudlo, “Patun-a ang tagsa ka tawo sang iya tulumanon, kag pahikota sa palangakoan sa diin sia ginpili sa bug-os nga katutum” (Doktrina kag mga Kasugtanan 107:99). Bilang lider sang Ang Simbahan ni Jesucristo sang mga Santos sa Ulihing mga Adlaw, dapat ka nga magpangayo sang personal nga rebelasyon para buligan ka nga matun-an kag tumanon ang mga katungdanan sang imo calling.

Ang pagtuon sang balaan nga mga kasulatan kag sang mga pinanudlo sang mga propeta sa ulihing mga adlaw makabulig sa imo nga maintiendihan kag tumanon ang imo mga katungdanan. Samtang ginatun-an mo ang mga pulong sang Dios, mas mabatyagan mo ang impluwensya sang Espiritu (tan-awa sa Doktrina kag mga Kasugtanan 84:85).

Matun-an mo man ang imo mga katungdanan paagi sa pagtuon sang mga instruksyon sa sining libro. Ining mga instruksyon makapahapos sang pagbaton sang rebelasyon kon ginagamit ang mga ini para maghatag sang kaathagan parte sa mga prinsipyo, mga polisiya, kag mga proseso nga gamiton samtang nagapangayo sang giya sang Espiritu.

0.1

Ang Libro

Ang Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw nagahatag sang giya sa pangkabilogan kag lokal nga mga lider sang Simbahan.

Ang mga tig-ulo kag segunda nga mga tig-ulo sa sining libro may mga numero para mahapos pangitaon ang mga topiko. Halimbawa, ang instruksyon parte sa kon sin-o ang pwede selyohan sa templo makita sa 27.3.1. Ang numero 27 nagatumod sa kapitulo, ang numero 3 nagatumod sa isa ka seksyon sina nga kapitulo, kag ang numero 1 nagatumod sa sub-seksyon.

0.2

Pagpabagay kag Opsyunal nga mga Balasahon

Indi tanan nga mga stake kag ward palareho ang mga panginahanglan.

Ang mga lider nagapangayo sang inspirasyon kon ano nga mga pagsulundan kag opsyunal nga mga balasahon ang gamiton para masabat ang mga panginahanglan sang mga miyembro.

0.4

Mga Pamangkot parte sa mga Instruksyon

Kon may mga pamangkot nga indi masabat sang balaan nga mga kasulatan, sang mga pulong sang buhi nga mga propeta, ukon sining libro, ang mga miyembro sang Simbahan dapat nga magsandig sa ila mga kasugtanan upod sa Dios, sa laygay sang ila lokal nga mga lider, kag sa inspirasyon sang Espiritu para sa giya.

Kon ang mga lider may mga pamangkot parte sa impormasyon sa sining libro ukon parte sa mga isyu nga wala sini ginasabat, nagakonsulta sila gilayon sa ila madason nga mas mataas nga nagapamuno nga awtoridad.

0.5

Mga Termino

Magluwas lang kon ginahambal gid nga lain:

• Ang mga termino nga bishop kag bishopric sa sining libro nagatumod man sa mga pangulo sang branch kag mga pangulohan sang branch. Ang mga termino nga stake president kag stake presidency nagatumod man sa mga district president kag mga district presidency. Para sa pagpalip-ot kon ano ang kinalain sang awtoridad sang mga district president sa mga stake president, tan-awa sa 6.3.

• Ang mga pagtumod sa mga ward kag stake sa kabilogan magamit man sa mga branch, mga district, kag mga misyon.

• Ang mga pagtumod sa Domingo magamit sa bisan ano nga adlaw kon san-o ginahiwat ang lokal nga Adlaw nga Inugpahuway.

• Ang termino nga yunit nagatumod sa mga ward kag mga branch.

• Ang pagtumod sa mga ginikanan magamit man sa kabilogan sa legal nga mga guardian.

Ang mga calling sang bishop kag branch president indi palareho sa awtoridad kag responsibilidad, amo man sa mga calling sang stake president kag district president. Ang bishop isa ka palangakuan sa priesthood, kag ang ordinasyon ginapahanugutan lamang sang Unang Pangulohan. Ang mga stake president ginatawag sang mga General Authority kag mga Area Seventy.

0.6

Pagkontak sa Headquarters sang Simbahan ukon sang Area Office

Ang pila sa mga kapitulo sining libro may mga instruksyon kon paano kontakon ang headquarters sang Simbahan ukon ang area offce. Ang instruksyon nga magkontak sa headquarters sang Simbahan ginapatuhoy sa mga nagaestar sa Estados Unidos kag Canada. Ang instruksyon nga magkontak sa area office ginapatuhoy sa mga nagaestar sa gwa sang Estados Unidos kag Canada.