«0. Ներածական ակնարկ», Ընտրված հատվածներ Ընդհանուր ձեռնարկից (2023)։
«0. Ներածական ակնարկ» Ընտրված հատվածներ Ընդհանուր ձեռնարկից
0.
Ներածական ակնարկ
0.0
Նախաբան
Տերն ուսուցանել է․ «Թող ամեն տղամարդ սովորի իր պարտականությունը և ողջ ջանասիրությամբ գործի այն պաշտոնում, որում նշանակված է» (Վարդապետություն և Ուխտեր 107․99)։ Որպես Հիսուս Քրիստոսի Վերջին Օրերի Սրբերի Եկեղեցու ղեկավար, դուք պետք է փնտրեք անձնական հայտնություն, որը կօգնի ձեզ սովորել և կատարել ձեր կոչման պարտականությունները:
Սուրբ գրությունների և վերջին օրերի մարգարեների ուսմունքների ուսումնասիրությունը կօգնի ձեզ հասկանալ և կատարել ձեր պարտականությունները: Երբ ուսումնասիրեք Աստծո խոսքերը, դուք ավելի ընկալունակ կլինեք Հոգու ազդեցության հանդեպ (տես Վարդապետություն և Ուխտեր 84․85)։
Դուք կսովորեք նաև ձեր պարտականությունները, երբ ուսումնասիրեք սույն ձեռնարկի հրահանգները: Այս հրահանգների շնորհիվ կարող եք հայտնություն ստանալ, եթե դրանք օգտագործեք այն նպատակով, որ հասկանաք սկզբունքները, քաղաքականությունը և ընթացակարգերը, որոնք պետք է կիրառվեն Հոգու առաջնորդությունը փնտրելիս:
0.1
Ձեռնարկը
Ընդհանուր ձեռնարկ․ ծառայել Հիսուս Քրիստոսի Վերջին Օրերի Սրբերի Եկեղեցում, ուղեցույց է Եկեղեցու բարձրագույն և տեղական ղեկավարների համար։
Թեմաները հեշտ գտնելու և մեջբերելու համար այս ձեռնարկի վերնագրերն ու ենթավերնագրերը համարակալված են: Օրինակ՝ հրահանգ այն մասին, թե ով կարող է կնքվել տաճարում, տրված է 27.3.1-ում: 27 թիվը վերաբերում է գլխին, 3 թիվը վերաբերում է այդ գլխի տվյալ բաժնին, իսկ 1 թիվը վերաբերում է ենթաբաժնին։
0.2
Հարմարեցում և լրացուցիչ նյութեր
Ոչ բոլոր ծխերն ու ճյուղերն ունեն նույն կարիքները։
Ղեկավարները ոգեշնչում են փնտրում այն մասին, թե որ ուղեցույցներն ու լրացուցիչ նյութերն օգտագործեն անդամների կարիքները բավարարելու համար:
0.4
Հարցեր հրահանգների վերաբերյալ
Երբ հարցեր են առաջանում, որոնք չեն քննարկվում սուրբ գրություններում, ապրող մարգարեների խոսքերում կամ այս ձեռնարկում, առաջնորդության համար Եկեղեցու անդամները պետք է ապավինեն Աստծո հետ կապած իրենց ուխտերին, իրենց տեղական ղեկավարների խորհուրդներին և Հոգու ոգեշնչմանը։
Եթե ղեկավարները հարցեր ունենան այս ձեռնարկում տեղ գտած որևէ նյութի կամ այն խնդիրների վերաբերյալ, որոնք ընդգրկված չեն ձեռնարկում, նրանք պիտի խորհրդակցեն իրենց անմիջական նախագահող իշխանության հետ:
0.5
Տերմինաբանություն
Բացառությամբ այն դեպքերի, երբ այլ բան է նշված.
-
Այս ձեռնարկում եպիսկոպոս և եպիսկոպոսություն եզրույթները վերաբերում են նաև ճյուղերի նախագահներին և ճյուղերի նախագահություններին։ Ցցի նախագահ և ցցի նախագահություն եզրույթները վերաբերում են նաև շրջանների նախագահներին և շրջանների նախագահություններին: Ամփոփելու համար, թե ինչպես են շրջանների նախագահների լիազորությունները տարբերվում ցցերի նախագահների լիազորություններից, տես 6․3։
-
Ծխերին և ցցերին վերաբերող հղումները սովորաբար կիրառելի են նաև ճյուղերի, շրջանների և միսիաների համար:
-
Կիրակի օրվան վերաբերող հղումները կիրառելի են այն օրվա համար, որը տվյալ երկրում պահում են որպես հանգստության օր։
-
Միավոր եզրույթը վերաբերում է ծխերին ու ճյուղերին:
-
Ծնողներին վերաբերող հղումները սովորաբար կիրառելի են նաև օրինական խնամակալների համար:
Եպիսկոպոսի և ճյուղի նախագահի կոչումները համարժեք չեն իրենց իշխանությամբ և պատասխանատվությամբ, համարժեք չեն նաև ցցի նախագահի և շրջանի նախագահի կոչումները: Եպիսկոպոսը քահանայության պաշտոն է, և ձեռնադրումը թույլատրվում է միայն Առաջին Նախագահության կողմից: Ցցի նախագահներին կանչում են Բարձրագույն իշխանությունները և Տարածքային յոթանասունականները:
0.6
Կապ հաստատել Եկեղեցու Գլխավոր վարչության կամ Տարածաշրջանի գրասենյակի հետ
Այս ձեռնարկի որոշ գլուխներ ներառում են Եկեղեցու Գլխավոր վարչության կամ Տարածաշրջանի գրասենյակի հետ կապ հաստատելու հրահանգներ: Եկեղեցու Գլխավոր վարչության հետ կապ հաստատելու հրահանգը վերաբերում է նրանց, ովքեր գտնվում են Միացյալ Նահանգներում և Կանադայում: Տարածաշրջանի գրասենյակի հետ կապ հաստատելու հրահանգը վերաբերում է ԱՄՆ-ից և Կանադայից դուրս գտնվողներին: