1.

Ana Babaire te Atua ao Tabem n Ana Mwakuri Ibukin te Kamaiuaki ao te Karietataaki

1.0

Moantaeka

Ko a tia ni weteaki bwa ko na beku n Ana Ekaretia Iesu Kristo Ibukiia Aika Itiaki ni Boong aika Kaitira. Ko rabwa ibukin am ibuobuoki. Ko na kakabwaiai maiu ao ni karekei kimwareirei ngkana ko beku ma te kakaonimaki.

E na buokiko te aeniboki aei n reirei tuan te maiu ni beku n aron Kristo ao n atai tabem. Kona bon rangin n nakoraoi ngkana ko kangaraoa am beku inanon te Ekaretia ma ana mwakuri te Atua te Tama ao Natina, Iesu Kristo.

1.1

Ana Babaire te Atua ni Kakukurei

Tamara are i Karawa e katauraoa te babaire ni kakukurei bwa ti aonga ni bane ni kimwareirei n Ana kakabwaia ni kabane. Ana mwakuri ao mimitongina a na “uota te maiu ae aki mamate ao akea tokina nakon maiuia aomata” (Mote 1:39).

Iesu Kristo e kakawaki nakon ana babaire te Atua. Ibukin ana tangira Tamara ae akea kabotauana ibukira, E anga natina ae te rikitemanna bwa e na kamaiura man te bure ao te mate rinanon Ana mwakuri ni kamaiu (taraa Ioane 3:16). Rinanon Ana Mwakuri ni Kamaiu, Iesu Kristo e kakoaua bwa ngaira n tatabemaniira nako aika ti bungiaki iaon te aba ti na mangauti ao ni karekei rabwatara aika aki mamate.

Karekean te maiu are akea tokina, ti riai n “nakomai nakon Kristo” (Moronaai 10:32). Ana Mwakuri ni Kamaiu te Tia Kamaiu e karekea nakoira te kona ni kaitiakaki man ara bure ao ni bitii nanora bwa ti aonga ni karekea te maiu are akea tokina ao te kimwareirei ae bwanin.

1.2

Ana Mwakuri te Atua ibukin te Kamaiuaki ao te Karietataaki

Ngkana ti nakon Kristo ao ni buokiia tabeman bwa a na karaoia naba, ti ira Ana mwakuri Te Atua ni kamaiu ao ni karietataa. E kairaki te mwakuri aei n tuua aika uoua n tangira te Atua ao n tangiriia kaain rarikira (taraa Mataio 22:37–39).

Te mwakuri ni kamaiu ao ni karietaata a boboto iaon aua taabe aika mai iroun te Atua.

Ana Mwakuri te Atua ibukin te Kamaiuaki ao te Karietataaki

Ti nakon Kristo ao n ibuobuoki n ana mwakuri te Atua man:

• Maiuakinan ana euangkerio Iesu Kristo.

• Tararuakiia naake iai kainnanoia.

• Kaoakiia ni kabane bwa a na karekea te euangkerio.

• Katiteuanakiia utu ibukin te maiu ae akea tokina.

Te aeniboki aei e na buokiko n atai aua iteran ana mwakuri te Atua aikai. E na kairiko te Tamnei ae Raoiroi ngkana ko karaoa tabem ni kakoroi bukiia (taraa 2 Nibwaai 32:5).

1.2.1

Maiuakinan ana Euangkerio Iesu Kristo

Maiuakinan ana euangkerio Iesu Kristo e raonaki ma:

• Kamwakuran te onimaki iroun Kristo, te rairannano ni katoabong, karaoan berita ma te Atua ngkai ti karekei otenanti n te kamaiuaki ao te karietataaki, ao ni kekeiaki ni uaa te toki man kawakinan berita aikanne (taraa 3.5.1).

• Kamatebwaiakan ao reiakinan ana euangkerio Iesu Kristo n te mweenga ao n te taromauri.

• Te riki n toronibwai ni karekei oin maiura i bon iroura ao ara utu, n te maiu n tamnei ao n rabwata.

1.2.2

Tararuakiia Naake Iai Kainnanoia

Tararuakiia naake Iai kainnanoia e raonaki ma:

• Te beku ao te mwakuri n ibuobuoki nakoia aomata n tatabemaniia, utu, ao kaomiuniti.

• Tibwauakin bwaai n ibuobuoki, n raonaki ma ana ibuobuoki te Ekaretia, ma naake a kainnanoi.

• Buokaia tabeman bwa ana toronibwai.

1.2.3

Kaoakiia ni Kabane Bwa Ana Karekea te Euangkerio

Kaoakiia ni kabane bwa ana karekea te euangkerio e raonaki ma:

• Karaoan te mwakuri ni mitinare ao te beku bwa mitinare.

• Buokaia kaain te Ekaretia aika boou ao aika a oki ni waaki nako n kawain te berita.

1.2.4

Katiteuanakiia Utu n te Maiu ae Akea Tokina

Katiteuanakiia utu n te maiu ae akea tokina e raonaki ma:

• Karaoakin berita aika tabu ngkana ti karekei ara otenanti n te tembora.

• Kakaeakiia ara bakatibu ake a tia ni mate ao ni karaoi otenanti ibukiia n te tembora bwa aonga ni karaoi berita ma te Atua.

• Te nakon te tembora n tainako, ngkana e kona, n taromauriia te Atua ao ni karaoi otenanti ibukiia Natina.

1.3

Te Kantaninga Ibukin te Ekaretia

E katea Ana Ekaretia Iesu Kristo bwa aonga aomata n tatabemaniia ni buoka te Atua ni kakoroi bukin Ana mwakuri ibukin te kamaiuaki ao te karietataaki (taraa I-Ebeto 4:11–13; taraa naba 2.2 n te aeniboki aei). Ni buokia ni kakoroa nanon te kantaninga mairoun te Atua aei, te Ekaretia ao ana taan kairiiri a katauraoi:

• Kariaia n te nakoanibonga ao kiing.

• Berita ao otenanti.

• Kaetieti ni burabeti.

• Booki aika tabu.

• Reirei n te euangkerio ao boutoka n te angareirei.

• Te mwakuri n ibuobuoki ao taai ni kairiiri.

• Aia kaominuti Aika Itiaki.

1.3.1

Kiing ao Kariaia n te Nakoanibonga

Rinanon te nakoanibonga, te Atua e kakoroa nanon Ana mwakuri ni kamaiu ao te karietataaki. Te kariaia n te nakoanibonga ao kiing aika kainnanoaki ni kaira ana mwakuri te Atua iaon te aba a kaokaki nakon te Burabeti Iotebwa Timiti (taraa Reirei ao Berita aika Tabu 110:11–16; 112:30). Kiing aikai iai irouia taan kairiiri n te Ekaretia n te bong aei. Taan kairiiri aikai a weteia ao ni kariaia tabeman bwa ana ibuobuoki n ana mwakuri te Atua (taraa Reirei ao Berita aika Tabu 107:8, 65–67).

1.3.2

Berita aika Tabu ao Otenanti

N ana babaire Tamara are i Karawa, ti karaoi berita aika tabu ngkana ti karekei otenanti ni kamaiu ao ni karietataaki, n aron te bwabetito (taraa Ioane 3:5; taraa naba mwakoro 18 n te aeniboki aei). Berita aika tabu ao otenanti aikai a kakawaki ibukira n riki n aron te Atua ao n oki ni maeka i Matana (taraa Reirei ao Berita aika Tabu 84:19–22).

1.3.3

Kaetieti ni Burabeti

Rinanoia Ana burabeti aika rineaki, e kaoti koaua te Atua ao ni katauraoi kairi ao kauring mai iroun te tamnei (taraa Amota 3:7; Reirei ao Berita aika Tabu 1:4). Te kairi aei e buokiira n rin ao n teimatoa iaon te kawai are e kaineti nakon te maiu ae akea tokina.

1.3.4

Koroboki aika tabu

Iaan ana kaetieti ana burabeti ao ana abotoro te Uea, te Ekaretia e katauraoi ao e kawakin ana taeka te Atua n aron ake a kuneaki inanon booki aika tabu. Booki aika tabu a kakoaua Kristo, reirei Ana euangkerio, ao ni buokiira ni kamwakura te onimaki Irouna (taraa Iakobo 7:10–11; Ereman 15:7).

1.3.5

Reiakinan te Euangkerio ao te Boutoka n te Angareirei

E boutoka te Ekaretia nakoia aomata n tatabemaniia nako ao utu n tabeia n reiakin koaua n te euangkerio ao n reirei koaua aikai nakoia kaain te utu ao tabeman riki (taraa Reirei ao Berita aika Tabu 88:77–78, 118; taraa naba 2.2.3 n te aeniboki aei).

1.3.6

Te Mwakuri n Ibuobuoki ao Taai ni Kairiiri

Rinanon wewete ao mwakuri n te Ekaretia, te Atua e anganiia membwa aia tai ni beku ao ni kairiiri. Te Ekaretia e katauraoi kawai ni buokia membwa n tararuai kainnanoia ao n anga te ibuobuoki nakoia tabeman (taraa Motiaea 18:27–29).

1.3.7

Aia Kaomiunitii Aika Itiaki

Ngkai aia kaomiuniti Aika Itiaki, a botaki kaain te Ekaretia n tainako n taromauriia te Atua ao n uringa te Tia Kamaiu man kanakin te toa (taraa Moronaai 6:4–6; Reirei ao Berita aika Tabu 20:77). A tabe naba membwa ibukiia ao n ibuobuoki imarenaia (taraa I-Ebeto 2:19).

1.4

Tabem n Ana Mwakuri te Atua

Ngkai ngkoe te tia kairiiri n te Ekaretia, ko weteaki bwa ko na reireiniia ao ni boutokaia naake ko buokiia ngkai a buoka te Atua n Ana mwakuri ibukin te kamaiuaki ao te karietataaki (taraa 1.2). Reken te atatai ae itiaki n ana mwakuri te Atua, n aron are E kaoko bwa ko na karaoia, ao ma te kantaninga ibukin Ana Ekaretia e na buokiko ni kakorakora am kekeiaki ni uoti tamnei nakon Kristo.

Tataro mwaaka ni ukoukoria bwa ko na kanga n ibuobuoki ni uota ana kantaninga te Atua ni maiuia naake ko buokiia. E na kairiko te Atua rinanon ana wirikiriki te Tamnei ae Raoiroi (taraa 2 Nibwaai 32:5). Te mwakuri korakora ma te Uea n Ana nne ni kureebe e uota nakoim te kimwareirei ae korakora (taraa Iakobwa 5:70–72