“1. ແຜນຂອງພຣະເຈົ້າ ແລະ ບົດບາດຂອງທ່ານໃນວຽກງານແຫ່ງຄວາມລອດ ແລະ ຄວາມສູງສົ່ງ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“1. ວຽກງານແຫ່ງຄວາມລອດ ແລະ ຄວາມສູງສົ່ງ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
1.
ແຜນຂອງພຣະເຈົ້າ ແລະ ບົດບາດຂອງທ່ານໃນວຽກງານແຫ່ງຄວາມລອດ ແລະ ຄວາມສູງສົ່ງ
1.0
ຄຳນຳ
ທ່ານໄດ້ຖືກເອີ້ນໃຫ້ຮັບໃຊ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ຂໍຂອບໃຈສຳລັບການຮັບໃຊ້ຂອງທ່ານ. ທ່ານຈະເປັນພອນໃຫ້ແກ່ຫລາຍຊີວິດ ແລະ ປະສົບຄວາມຊື່ນຊົມຂະນະທີ່ທ່ານຮັບໃຊ້ຢ່າງຊື່ສັດ.
ຄູ່ມືນີ້ຈະຊ່ວຍທ່ານຮຽນຮູ້ຫລັກທຳຂອງການຮັບໃຊ້ເໝືອນດັ່ງພຣະຄຣິດ ແລະ ເຂົ້າໃຈໜ້າທີ່ຮັບຜິດຊອບຂອງທ່ານ. ທ່ານຈະມີປະສິດທິພາບຫລາຍທີ່ສຸດເມື່ອທ່ານເຮັດໃຫ້ການຮັບໃຊ້ໃນສາດສະໜາຈັກຂອງທ່ານສອດຄ່ອງກັບວຽກງານຂອງພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ.
1.1
ແຜນແຫ່ງຄວາມສຸກຂອງພຣະເຈົ້າ
ພຣະບິດາເທິງສະຫວັນໄດ້ຈັດກຽມແຜນແຫ່ງຄວາມສຸກໄວ້ ເພື່ອໃຫ້ເຮົາສາມາດຊື່ນຊົມກັບພອນທັງໝົດຂອງພຣະອົງ. ວຽກງານ ແລະ ລັດສະໝີພາບຂອງພຣະອົງຄື “ການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39).
ພຣະເຢຊູຄຣິດເປັນສູນກາງໃນແຜນຂອງພຣະເຈົ້າ. ຍ້ອນຄວາມຮັກອັນບໍ່ມີຂອບເຂດຂອງພຣະບິດາທີ່ມີຕໍ່ເຮົາ, ພຣະອົງຈຶ່ງໄດ້ສົ່ງພຣະບຸດຂອງພຣະອົງມາເພື່ອໄຖ່ເຮົາຈາກບາບ ແລະ ຄວາມຕາຍ ຜ່ານທາງການເສຍສະລະຊົດໃຊ້ຂອງພຣະອົງ (ເບິ່ງ ໂຢຮັນ 3:16). ຜ່ານທາງການຊົດໃຊ້ຂອງພຣະອົງ, ພຣະເຢຊູຄຣິດຮັບຮອງວ່າ ເຮົາແຕ່ລະຄົນທີ່ໄດ້ເກີດມາໃນໂລກ ຈະຟື້ນຄືນຊີວິດ ແລະ ຮັບຄວາມເປັນອະມະຕະ. ການຊົດໃຊ້ຂອງພຣະອົງກໍຍັງເຮັດໃຫ້ເປັນໄປໄດ້ສຳລັບເຮົາທີ່ຈະຖືກຊຳລະໃຫ້ສະອາດຈາກບາບ ແລະ ປ່ຽນແປງໃຈ ເພື່ອວ່າເຮົາຈະສາມາດໄດ້ຮັບຊີວິດນິລັນດອນ ແລະ ຄວາມສົມບູນແຫ່ງຄວາມຊື່ນຊົມ.
ກ່ອນຈະໄດ້ຮັບຊີວິດນິລັນດອນໄດ້ນັ້ນ, ເຮົາຕ້ອງ “ມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ” (ໂມໂຣໄນ 10:32).
1.2
ວຽກງານແຫ່ງຄວາມລອດ ແລະ ຄວາມສູງສົ່ງ
ເມື່ອເຮົາມາຫາພຣະຄຣິດ ແລະ ຊ່ວຍຄົນອື່ນໃຫ້ເຮັດຄືກັນ, ເຮົາໄດ້ມີພາກສ່ວນໃນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ. ວຽກງານນີ້ຖືກນຳພາໂດຍພຣະບັນຍັດທີ່ຍິ່ງໃຫຍ່ສອງປະການ ເພື່ອໃຫ້ຮັກພຣະເຈົ້າ ແລະ ໃຫ້ຮັກເພື່ອນບ້ານຂອງເຮົາ (ເບິ່ງ ມັດທາຍ 22:37–39).
ວຽກງານແຫ່ງຄວາມລອດ ແລະ ຄວາມສູງສົ່ງສຸມໃສ່ໜ້າທີ່ຮັບຜິດຊອບສີ່ຢ່າງທີ່ກຳນົດໃຫ້ຈາກສະຫວັນ.
ຄູ່ມືນີ້ຈະຊ່ວຍໃຫ້ທ່ານເຂົ້າໃຈວຽກງານສີ່ດ້ານເຫລົ່ານີ້ຂອງພຣະເຈົ້າ. ພຣະວິນຍານບໍລິສຸດຈະນຳພາທ່ານ ຂະນະທີ່ທ່ານເຮັດພາກສ່ວນຂອງທ່ານໃນການປະຕິບັດວຽກງານເຫລົ່ານີ້ (ເບິ່ງ 2 ນີໄຟ 32:5).
1.2.1
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ ແມ່ນລວມທັງ:
-
ການໃຊ້ສັດທາໃນພຣະຄຣິດ, ການກັບໃຈທຸກວັນ, ການເຮັດພັນທະສັນຍາກັບພຣະເຈົ້າ ຂະນະທີ່ເຮົາຮັບພິທີການແຫ່ງຄວາມລອດ ແລະ ຄວາມສູງສົ່ງ, ແລະ ອົດທົນຈົນເຖິງທີ່ສຸດໂດຍການຮັກສາພັນທະສັນຍາເຫລົ່ານັ້ນ (ເບິ່ງ 3.5.1).
-
ການຮຽນຮູ້ ແລະ ການສິດສອນພຣະກິດຕິຄຸນຂອງພຣະເຢຊູຄຣິດຢູ່ທີ່ບ້ານ ແລະ ຢູ່ທີ່ໂບດ.
-
ການກຸ້ມຕົນເອງໃນການຈັດຫາໃຫ້ຕົວເຮົາເອງ ແລະ ຄອບຄົວຂອງເຮົາ, ທັງທາງວິນຍານ ແລະ ທາງໂລກ.
1.2.2
ການດູແລຄົນຂັດສົນ
ການດູແລຄົນຂັດສົນແມ່ນລວມທັງ:
-
ການຮັບໃຊ້ ແລະ ການປະຕິບັດສາດສະໜາກິດຕໍ່ບຸກຄົນ, ຄອບຄົວ, ແລະ ຊຸມຊົນ.
-
ການແບ່ງປັນແຫລ່ງຊ່ວຍເຫລືອ, ລວມທັງການຊ່ວຍເຫລືອຂອງສາດສະໜາຈັກ, ໃຫ້ກັບຄົນຂັດສົນ.
-
ການຊ່ວຍໃຫ້ຄົນອື່ນກຸ້ມຕົນເອງ.
1.2.3
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນແມ່ນລວມທັງ:
-
ການມີສ່ວນຮ່ວມໃນວຽກງານເຜີຍແຜ່ ແລະ ການຮັບໃຊ້ເປັນຜູ້ສອນສາດສະໜາ.
-
ການຊ່ວຍໃຫ້ສະມາຊິກໃໝ່ຂອງສາດສະໜາຈັກ ແລະ ສະມາຊິກທີ່ກັບຄືນມາ ກ້າວໜ້າຕາມເສັ້ນທາງແຫ່ງພັນທະສັນຍາ.
1.2.4
ການເຕົ້າໂຮມຄອບຄົວເຂົ້າກັນຊົ່ວນິລັນດອນ
ການເຕົ້າໂຮມຄອບຄົວເຂົ້າກັນຊົ່ວນິລັນດອນແມ່ນລວມທັງ:
-
ການເຮັດພັນທະສັນຍາເມື່ອເຮົາຮັບເອົາພິທີການພຣະວິຫານຂອງເຮົາເອງ.
-
ການຄົ້ນຫາບັນພະບຸລຸດທີ່ລ່ວງລັບໄປແລ້ວຂອງເຮົາ ແລະ ກະທຳພິທີການແທນເຂົາເຈົ້າໃນພຣະວິຫານ ເພື່ອວ່າເຂົາເຈົ້າຈະສາມາດເຮັດພັນທະສັນຍາກັບພຣະເຈົ້າ.
-
ການໄປພຣະວິຫານເປັນປະຈຳ, ເມື່ອເປັນໄປໄດ້, ເພື່ອນະມັດສະການພຣະເຈົ້າ ແລະ ກະທຳພິທີການແທນລູກໆຂອງພຣະອົງ.
1.3
ຈຸດປະສົງຂອງສາດສະໜາຈັກ
ພຣະເຢຊູຄຣິດໄດ້ສະຖາປະນາສາດສະໜາຈັກຂອງພຣະອົງຂຶ້ນ ເພື່ອໃຫ້ບຸກຄົນ ແລະ ຄອບຄົວສາມາດເຮັດວຽກງານແຫ່ງຄວາມລອດ ແລະ ຄວາມສູງສົ່ງ (ເບິ່ງ ເອເຟໂຊ 4:11–13; ເບິ່ງ 2.2 ໃນຄູ່ມືນີ້ ນຳອີກ). ເພື່ອຊ່ວຍບັນລຸຈຸດປະສົງແຫ່ງສະຫວັນ, ສາດສະໜາຈັກ ແລະ ຜູ້ນຳຂອງສາດສະໜາຈັກ ຈຶ່ງຈັດກຽມ:
-
ສິດອຳນາດ ແລະ ຂໍກະແຈຂອງຖານະປະໂລຫິດ.
-
ພັນທະສັນຍາ ແລະ ພິທີການ.
-
ການຊີ້ນຳຂອງສາດສະດາ.
-
ພຣະຄຳພີ.
-
ການສະໜັບສະໜູນການຮຽນຮູ້ ແລະ ການສິດສອນພຣະກິດຕິຄຸນ.
-
ໂອກາດໃນການຮັບໃຊ້ ແລະ ການເປັນຜູ້ນຳ.
-
ຊຸມຊົນຂອງໄພ່ພົນ.
1.3.1
ສິດອຳນາດ ແລະ ຂໍກະແຈຂອງຖານະປະໂລຫິດ
ຜ່ານທາງຖານະປະໂລຫິດ, ພຣະເຈົ້າບັນລຸວຽກງານແຫ່ງຄວາມລອດ ແລະ ຄວາມສູງສົ່ງ. ສິດອຳນາດ ແລະ ຂໍກະແຈຂອງຖານະປະໂລຫິດທີ່ຈຳເປັນຕໍ່ການຊີ້ນຳວຽກງານຂອງພຣະເຈົ້າຢູ່ເທິງແຜ່ນດິນໂລກໄດ້ຖືກຟື້ນຟູສູ່ສາດສະດາໂຈເຊັບ ສະມິດ (ເບິ່ງ ຄຳສອນ ແລະ ພັນທະສັນຍາ 110:11–16; 112:30). ຂໍກະແຈເຫລົ່ານີ້ແມ່ນດຳລົງໂດຍຜູ້ນຳຂອງສາດສະໜາຈັກໃນປະຈຸບັນ. ພວກເພິ່ນເອີ້ນ ແລະ ໃຫ້ສິດອຳນາດແກ່ຄົນອື່ນເພື່ອຊ່ວຍເຫລືອໃນວຽກງານຂອງພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 107:8, 65–67).
1.3.2
ພັນທະສັນຍາ ແລະ ພິທີການ
ໃນແຜນຂອງພຣະບິດາເທິງສະຫວັນ, ເຮົາເຮັດພັນທະສັນຍາເມື່ອເຮົາຮັບພິທີການແຫ່ງຄວາມລອດ ແລະ ຄວາມສູງສົ່ງ, ດັ່ງເຊັ່ນການຮັບບັບຕິສະມາ (ເບິ່ງ ໂຢຮັນ 3:5; ເບິ່ງ ບົດທີ 18 ໃນຄູ່ມືນີ້ ນຳອີກ). ພັນທະສັນຍາ ແລະ ພິທີການເຫລົ່ານີ້ແມ່ນຈຳເປັນສຳລັບເຮົາ ເພື່ອຈະໄດ້ກາຍເປັນເໝືອນດັ່ງພຣະເຈົ້າຫລາຍຂຶ້ນ ແລະ ກັບຄືນໄປຢູ່ໃນທີ່ປະທັບຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 84:19–22).
1.3.3
ການຊີ້ນຳຂອງສາດສະດາ
ຜ່ານທາງສາດສະດາທີ່ຖືກເລືອກຂອງພຣະອົງ, ພຣະເຈົ້າເປີດເຜີຍ ແລະ ໃຫ້ການນຳພາ ແລະ ຄຳເຕືອນທີ່ດົນໃຈ (ເບິ່ງ ອາໂມດ 3:7; ຄຳສອນ ແລະ ພັນທະສັນຍາ 1:4). ການນຳພານີ້ຊ່ວຍໃຫ້ເຮົາເຂົ້າສູ່ ແລະ ຄົງຢູ່ໃນເສັ້ນທາງທີ່ນຳພາໄປສູ່ຊີວິດນິລັນດອນ.
1.3.4
ພຣະຄຳພີ
ພາຍໃຕ້ການຊີ້ນຳຂອງສາດສະດາ ແລະ ອັກຄະສາວົກຂອງພຣະຜູ້ເປັນເຈົ້າ, ສາດສະໜາຈັກຈັດກຽມ ແລະ ຮັກສາພຣະຄຳຂອງພຣະເຈົ້າ ຕາມທີ່ພົບເຫັນຢູ່ໃນພຣະຄຳພີສັກສິດ. ພຣະຄຳພີເປັນພະຍານເຖິງພຣະຄຣິດ, ສິດສອນພຣະກິດຕິຄຸນຂອງພຣະອົງ, ແລະ ຊ່ວຍໃຫ້ເຮົາໃຊ້ສັດທາໃນພຣະອົງ (ເບິ່ງ ຢາໂຄບ 7:10–11; ຮີລາມັນ 15:7).
1.3.5
ການສະໜັບສະໜູນການຮຽນຮູ້ ແລະ ການສິດສອນພຣະກິດຕິຄຸນ
ສາດສະໜາຈັກສະໜັບສະໜູນບຸກຄົນ ແລະ ຄອບຄົວ ໃນໜ້າທີ່ຮັບຜິດຊອບຂອງເຂົາເຈົ້າ ເພື່ອຮຽນຮູ້ຄວາມຈິງຂອງພຣະກິດຕິຄຸນ ແລະ ສິດສອນຄວາມຈິງເຫລົ່ານີ້ໃຫ້ສະມາຊິກໃນຄອບຄົວ ແລະ ຄົນອື່ນໆ (ເບິ່ງ ຄຳສອນ ແລະ ພັນທະສັນຍາ 88:77–78, 118; ເບິ່ງ 2.2.3 ໃນຄູ່ມືນີ້ ນຳອີກ).
1.3.6
ໂອກາດໃນການຮັບໃຊ້ ແລະ ການເປັນຜູ້ນຳ
ຜ່ານທາງການເອີ້ນ ແລະ ການມອບໝາຍໃນສາດສະໜາຈັກ, ພຣະເຈົ້າມອບໂອກາດໃຫ້ສະມາຊິກເພື່ອຮັບໃຊ້ ແລະ ນຳພາ. ສາດສະໜາຈັກຈັດກຽມໂຄງສ້າງໄວ້ເພື່ອຊ່ວຍດູແລສະມາຊິກທີ່ຂັດສົນ ແລະ ຊ່ວຍບັນເທົາມະນຸດສະທຳແກ່ຄົນອື່ນໆ (ເບິ່ງ ໂມໄຊຢາ 18:27–29).
1.3.7
ຊຸມຊົນຂອງໄພ່ພົນ
ໃນຖານະຊຸມຊົນຂອງໄພ່ພົນ, ສະມາຊິກຂອງສາດສະໜາຈັກຈະເຕົ້າໂຮມກັນເປັນປະຈຳເພື່ອນະມັດສະການພຣະເຈົ້າ ແລະ ເພື່ອລະນຶກເຖິງພຣະຜູ້ຊ່ວຍໃຫ້ລອດ ໂດຍການຮັບສ່ວນສິນລະລຶກ (ເບິ່ງ ໂມໂຣໄນ 6:4–6; ຄຳສອນ ແລະ ພັນທະສັນຍາ 20:77). ສະມາຊິກກໍຍັງດູແລ ແລະ ປະຕິບັດສາດສະໜາກິດຕໍ່ກັນແລະກັນນຳອີກ (ເບິ່ງ ເອເຟໂຊ 2:19).
1.4
ບົດບາດຂອງທ່ານໃນວຽກງານຂອງພຣະເຈົ້າ
ໃນຖານະຜູ້ນຳໃນສາດສະໜາຈັກ, ທ່ານໄດ້ຖືກເອີ້ນໃຫ້ສິດສອນ ແລະ ສະໜັບສະໜູນຜູ້ທີ່ທ່ານຮັບໃຊ້ ຂະນະທີ່ເຂົາເຈົ້າເຂົ້າຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ (ເບິ່ງ 1.2). ທ່ານມີຄວາມຮັບຜິດຊອບຕໍ່ການບັນລຸການເອີ້ນຂອງທ່ານ ແລະ “ສິດສອນພຣະຄຳຂອງພຣະເຈົ້າ … ດ້ວຍຄວາມພາກພຽນ” (ຢາໂຄບ 1:19). ການອອກແຮງງານຮ່ວມກັບພຣະຜູ້ເປັນເຈົ້າໃນສວນອະງຸ່ນຂອງພຣະອົງຈະນຳຄວາມສຸກອັນຍິ່ງໃຫຍ່ມາໃຫ້ (ເບິ່ງ ຢາໂຄບ 5:70–72).
ການມີຄວາມເຂົ້າໃຈຢ່າງແຈ່ມແຈ້ງໃນວຽກງານຂອງພຣະເຈົ້າ, ໃນສິ່ງທີ່ພຣະອົງເຊື້ອເຊີນໃຫ້ທ່ານເຮັດ, ແລະ ໃນຈຸດປະສົງຂອງສາດສະໜາຈັກຂອງພຣະອົງ ຈະຊ່ວຍໃຫ້ທ່ານສຸມຄວາມພະຍາຍາມຂອງທ່ານໃສ່ໃນການນຳຈິດວິນຍານມາສູ່ພຣະຄຣິດ.
ໃຫ້ກັບມາເບິ່ງຫລັກທຳໃນບົດນີ້ເລື້ອຍໆ. ສະແຫວງຫາດ້ວຍການອະທິຖານ ເພື່ອຈະໄດ້ຮູ້ວ່າ ທ່ານຈະສາມາດຊ່ວຍນຳຈຸດປະສົງຂອງພຣະເຈົ້າໄປໃຫ້ຊີວິດຂອງຄົນທີ່ທ່ານຮັບໃຊ້ແນວໃດ. ພຣະເຈົ້າຈະຊີ້ນຳທ່ານຜ່ານທາງການກະຕຸ້ນຂອງພຣະວິນຍານບໍລິສຸດ.