“1. Uldesuel a Dios ma Ngerechelem er a Ureor ra Olsobel ma Diak a Ulebengelel Klengar,” Bliongel mengai er a General Handbook (2023).

“1. Ureor ra Olsobel ma Diak a Ulebengelel Klengar,” Bliongel mengai er a General Handbook (2023).

siasing/Llecheklel

re meklou el chad el omekedechor er a blai

Uldesuel a Dios ma Ngerechelem er a Ureor ra Olsobel ma Diak a Ulebengelel Klengar

1.0

Uchelel a Omesodel

Kau a mla mokedong el mo mesiou er a Ikelesia er a Jesus Kristo er a Uriul-klebesei el Santo. Ke meral mesaul er a omesiungem. Kau a mo omekngeltengat a klengar e monguu a deureng sel bo mosiou el blak a rengum.

Tial handbook a mo ngosukau el subii a llechul a omesiou el diua Kristo e mo ungil medengei a ngerchelem. Ke mo ungil ra ngerchelem sel momekesiu a urerem er a Ikelesia el mobengkel a urerel a Dios el Chedam ma Ngelekel, el Jesus Kristo.

1.1

Uldesuel a Dios er a Deurreng

A Chedam er a Babeluades a uldersii a uldasu el kirel a deurreng me bol sebeched el mo dmeu a rengud er a rokui el klengeltengat el mla er Ngii. A urerel me a klebkellel a mo msa chad a klengar me a kiei el mo cherechar (Moses 1:39).

A Jesus Kristo a ngii a moktek er tial uldesuel a Dios. Leng sel diak a ulebengelel beltik el reng ra Demad ra Babeluades el merkid, e Ngii a uldureklii a Ngelekel el me olsobel er kid ra klengit ma kodall lokiu sel uldersel a tngakireng er Ngii (mesa Johanes 3:16). Ngokiu a Tngakireng er Ngii, ea Jesus Kristo a mla oterkeklii el kmo kid el rokui el mlechell ra beluulechad a mo mekiis ra kodall e diak deluut el mad. A Tngakireng er Ngii a dirrek el rulii meng techelled el mekikiid ra klengit e obult a rengud meng sebeched el nguu a diak a ulebengelel klengar ma mui el deurreng.

A bo denguu a diak a ulebengelel klengar, eng kired el “mora Kristo, e mo mecherrungel er ngii” (Moroni 10:32).

1.2

Ureor ra Olsobel ma Diak a Ulebengelel Klengar

Mesel de bora Kristo e dolengeseu ra rebebil el mo meruul osisiu el tekoi, e kede olengeseu er a urerel a Dios ra olsobel ma diak a ulebengelel klengar. Tial ureor a ulekrael lokiu eru el meklou el llach el mo betik a rengud ra Dios ma re ngera bita er kid el chad. (mesa Mateus 22:37–39).

A ureor ra olsobel ma diak a ulebengelel klengar a omes eual chedaol el telutk el ngerachel.

Tial handbook a mo ngosukau el mo medengei a ikal eual el telengtengil a urerel a Dios. A Chedaol Reng a mo mekrolau sel moruul ra ngerchelem e mongetmokl (mesa 2 Nephi 32:5).

1.2.1

Kiei el Oltirakl er a Ebangkelio ra Jesus Kristo

Kiei el oltirakl er a ebangkelio ra Jesus Kristo a uldimukl ra:

Ultuil ra klaumerang er kid ra Kristo, ouchel el reng ra bek el sils, mengetmokl a telbiled lobengkel a Dios sel dolai a chedaol ruoll ra olsobel ma diak a ulebengelel klengar, e outekangel el mora ulebongel el mengeluolu a ikel telbiil (mesa 3.5.1).
Mesuub e olsisechakl ra ebangkelio ra Jesus Kristo ra re keblid ma ikelesia.
Di mokid el mengtmokl ra klengar er kid ma telungalek er kid, ra reng ma tekingel a klechad.

1.2.2

Kerkikl er a Rengesool

Kerkikl er a rengesool luldimukl ra:

Mesiou e oldingel ra re dertal chad, telungalek, ma buai.
Omerk a ngeseu, uldimukl ra ngeseu ra Ikelesia, el mortirkel lousbech a ngeseu.
Olengeseu ra rebebil el mo di tir.

1.2.3

Mengemedaol ra Rokui el Chad Mel Nguu a Ebangkelio

Mengemedaol ra rokui el chad el mel nguu a ebangkelio a uldimukl ra:

Olengeseu er a Ureor ra misionari e mesiou el ua misionari.
Olengeseu ra re beches ma re luetang el rechad er a Ikelesia me lolemolmel ngarsel rael ra telbiil.

1.2.4

Oldak ra re Telungalek el mora Diak a Ulebengelel Klengar

Oldak ra re telungalk el mora diak a ulebengelel klengar a uldimukl ra:

Mengetmokl a telbiil sel dolai a chedaol ruoll ra templo el kired.
Osiik a ngklir a re mla mad el chedad e mengedmokl chedaol ruoll el kirir ra templo me bol sebecherir el kudmokl a telbiil lobengkel a Dios.
Sel de blechoel lomais el mora templo, a blo el sebechel, el mo mesiou ra Dios e mengetmokl chedaol ruoll el kirir a Rengelekel.

1.3

Sel Moktek er a Ikelesia

A Jesus Kristo a milngederodel e ra Ikelesia er Ngii me bol sebecherir a re dertal chad ma telungalek el mengedmokl a ureor ra olsobel ma diak a ulebengelel klengar (mesa Efesus 4:11–13; dirrek el mesa 2.2 er tial handbook). Sel mo ngosuir el kudmeklii tial chedaol el moktek, ea Ikelesia ma re merredelel odars a:

Ngerachel ma kiis er a Priesthood.
Telbiil ma chedaol ruoll.
Ulekrael el ulaoch.
Chedaol llechukl.
Ngesou er a omesubel ma osisecheklel Ebangkelio.
Omesiou ma techall el mo oungerachel.
Chelechad er a re Santo.

1.3.1

Ngerachel ma Kiis er a Priesthood

Ngokiu a priesthood, e a Dios a kudmeklii a ureor el olsobel ma diak a ulebengelel klengar. A ngerachel ma kiis ra priesthood el usbechall el mo mekrael ra urerel a Dios ra beluulechad a mloluut el mora Prophet Joseph Smith (mesa Doctrine and Covenants 110:11–16; 112:30). A ikal kiis a lolab a re merredelel er a Ikelesia er chelechal taem. Te omekedong e omekngerachel ra rebebil el mo olngeseu ra urerel a Dios (mesa Doctrine and Covenants 107:8, 65–67).

1.3.2

Telbiil ma Chedaol ruoll

Sel ngara uldesuel a Demad ra Babeluades, a kmo kid a kudmokl a telbiil sel de ngai a ikel chedaol ruoll el lolsobel ma diak a ulebengelel klengar, el ua techolbechelid (mesa Johanes 3:5; dirrek el mesa bliongel 18 er tial handbook). A ikal telbiil ma chedaol ruoll a meklou a ultutelel el kired meke demo uai a Dios e lmuut el mo kiei lobengkel (mesa Doctrine and Covenants 84:19–22).

1.3.3

Ulekrael el Ulaoch

Ngokiu ra re telutk el profet er Ngii, ea Dios ocholt a klemerang e odars a ulekrael el ngeseu ma uleklatk (mesa Amos 3:7; Doctrine and Covenants 1:4). Tial ngeseu a ngosukid el soiseb e melemolm el ngara rael el bedul a diak a ulebengelel klengar.

1.3.4

Chedaol llechukl

Ngokiu a tekingir a re profet ma re apostol ra Rubak, e a Ikelesia odars e mengedmokl a tekingel a Dios el de betik e ra chedaol llechukl. A chedoal llechukl a ouchais el kirel a Kristo, e olsisechakl ra ebangkelio er Ngii, e ngosukid el ouedikel ra klaumerang er kid er Ngii (mesa Jacobus 7:10–11; Helaman 15:7).

1.3.5

Ngesou el kirel Omesubel ma Osisecheklel Ebangkelio

A Ikelesia a olengeseu ra rechad ma telungalek ra ngerechelir el mo mesuub a ikel klemerang ra ebangkelio e olsisechakl a ikal klemerang el mora rechad ra blirir ma rebebil (mesa Doctrine and Covenants 88:77–78, 118; dirrek el mesa 2.2.3 er tial handbook).

1.3.6

Omesiou ma Techall el mo Oungerachel

Ngokiu okedong ma ngerachel ra Ikelesia, ea Dios a mesterir a rechedal er a Ikelesia a techall el mesiou e oungerachel. A Ikelesia odars a bedengel a teletael el molngeseu ra re ngesool el rechedal a ikelesia e odars a meklou el ngesou el mora rebebil (mesas Mosiah 18:27–29).

1.3.7

Chelechad er a re Santo

Me kid el chelechad er a re Santo, a rechedal a Ikelesia a blechoel mo keldibel el mo mengull ra Dios e mo melatk ra Osobel el melai ra chedaol belsoil (mesa Moroni 6:4–6; Doctrine and Covenants 20:77). A rechedal a Ikelesia a dirrek el kerekikl e mesiou ra delongelir (mesa Efesus 2:19).

1.4

Sel Ngerechelem er a Urelel a Dios

Mesel dorredel er tial Ikelesia, e kau a mlokedong el molsisechakl e olengeseu er tirkel mosiou er tir el mechesang er a ureor e lolsobel ma diak a ulebengelel klengar (mesa 1.2). Ngerchelem el urrengelii a okodongem e “olsisechakl … ra tekingel a Dios loba blakereng” (Jakobus 1:19). Sel moureor lobengkel a Rubak er a sersel a mo meskau a klou el deurreng (mesa Jakobus 5:70–72).

Sel mededaes a uldesued el kirel a urerel a Dios, ra tekoi el Ngii a mengemedaol er kau el mo meruul, mesel moktek ra Ikelesia er Ngii el mo ngosukau el loterkokl a urerem el obteterir a rechad el mora Kristo.

Blechoel lomes el mora ikel llach er tial bliongel. Moluluuch el oba blak el reng losiik el kmo ke mekerang a molengeseu e mekera omnguu a moktek ra Dios el mora klengar er tirkel mosiou er tir. A Dios a mo mekrolau lokiu a otbechel Chedaol Reng.