sassing ko ya’an e tabinaew

2.

Ayuweg e Gidii’ nge Tabinaew ko fare Muruwel rok’ Got ko Thapegnag nge N’uf Ngalang ko bin Th’abi Tolang ko Falfalaen’

2.0

Mornga’agen

Ni gur e tiyugang’ ulan e Galasia rok’ Yesus Kristus, gur e ngam ayuweg e gidii’ nge fapi tabinaew ni ngan rrin’ e muruwel rok’ Got ko thapagnag nge n’uf ngalang ko bin th’abi tolang e falfalaen’ (muguy ko 1.2). Bin ni th’abi ga’fan ko biney e muruwel e ngan ayuweg pifak Got ni gubin ni ngar thapagned fapi tawa’ath ko yafos ni manechubog nge fare falfalaen’ nib polo’.

Oren e muruwel rok’ Got ko thapagnag nge n’uf ngalang ko bin th’abi tolang e falfalaen’ e baga’ ni yima rrin’ u tabinaew. Fan ko gidii’en e Galasia ni gubin, biney e muruwel e ir e luk’ungun e tabinaew.

2.1

Fare Muruwel ko Tabinaew ko Tonom rok’ Got

Kabang ko tonom rok’, Chitamangiy nu Tharmiy e ke sunmeg e tabinaew nga dakean e fayleng. Be athapeg ni tabinaew era pii’ e falfalaen’ ngodaed. Tabinaew e ma pii’ e yaay ngodaed ni ngad filed, ngad gaa’ niged ea na’ab rodaed, ngad pigpig gaed, nge kalngaen’daed, nge n’agfan rodaed. Rayag ni nge ayuwegdaed ngan ngongliy rogdaed ko yafos ni manechubog.

Mich rok’ Got ko yafos ni manechubog e mu’un fare mabgol ngay nib manemus, bitir, nge ku boech fapi tawa’ath ko tabinaew ni manemus. Biney nike micheg e ku ta’areb rogon ngak e pi’in ni dawri mabgol fa tin ni dariy e tabinaew roraed ulan e Galasia.

2.1.1

Tabinaew ni Manemus

Tabinaew ni manemus e ma sum u nap’an ni gidii’en e Galasia e be ngongliy fapi m’ag nu napan nikar thapagned fapi gam’ing ko sealing ulan e temple. Fapi tawa’ath ko tabinaew ni manemus era yib napan nibe ayuweg fapi members fapi m’ag roraed ma yaed be kalngaen’ ko napan nikar mulgaed. Pi Tiyugang’ ko Galasia e ngar ayuweged fapi members ngar fal’aged rograed ni ngar thapaged e pi gam’ing ney mi yaed tayfan fapi m’ag roraed.

Kabang ko sunmiy fare tabinaew ni manemus e ngan ul’ul’ ngan rrin’ fapi gam’ing ulan e temple nima ayuweg fapi members ni ngar seal gaed ngak fapi gidii’ roraed ni kakrom.

2.1.2

Figirngiy nge Le’ngiy

Mabgol u thilin e pumo’on nge pin e ke yibliy Got (muguy ko Doctrine and Covenants 49:15). Fan e figirngiy nge le’ngiy e ngeyag nira mon’og gow i yaen u ta’abang ko yafos ni manechubog (muguy ko 1 Korinth 11:11).

Reb e n’en ni rib tu’uf ni ngan thapaeg e yafos ni manechubog e fare pumo’on nge fare bpin ni ngar fal’egnew e m’ag ko mabgol nib celestial (muguy ko Doctrine and Covenants 131:1–4). Fagli cha’ e yowra rrin’ e biney e m’ag u napan ni yowra thapeg fare gam’ing ko sealing nifan e mabgol ulan e temple. Fare m’ag e ir e fare def ko tabinaew ni manemus. Fa’anra yira yul’yul’ ngay, mara ayuweg fare mabgol nge ul’ul’ i yean ni manemus.

Fare tha’ u thilin e par ko mabgol ko fare figirngiy nge fare le’ngiy e susun ni ban’en ni rib fel’ ma rib thothup. Ya Got e ke yibliy nifan e nge sunmiy e bitir nge fan fare a’dag nibay u thilin fare figirngiy nge le’ngiy. Munguy nge tayfan—gathi to’ogor—e susun ni nge gagiyeg nag fare tha’ rorow u thilrow.

Got e ke motochiyel nag ni ngonglen e m’aey e ngan soen nag nge mada’ ko ngiyal’ nike mabgol fare mo’on nge fare bpin.

Fare figirngiy nge fare le’ngiy e yow l’agrow ni yow ba ta’areb u mit Got. Dariy bagyow ni nge gel fan ngak bagyow. Tin ni yowra duugliy e susun ni ngar ngongliyew u ta’abang nge fithik’ e t’ufeg, ni yow l’agruw ngay.

2.1.3

Fapi Galbithir nge fapi Bitir

Profet ko tin tomur e rran e kar machib niged ni “motochiyel rok’ Got ngak pifak ni ngar fakiyed e bitir nge garar u dakean e fayleng e kabay nibe buch nib gel” (“The Family: A Proclamation to the World”; muguy ko Doctrine and Covenants 49:16–17).

Fare figirngiy nge fare le’ngiy e yow e bin th’abi fel’ e kanawo’en i chugliy nge chathawliy nag e bitir. Tin nibe buch ko bee’ e bay nira taleg fagli mabgol ni ngar chugliyew e bitir rorow u ta’abang. Machane, Somoel era tawa’ath nagrow napan ni yowra ning e ayuw rok’ mara bagyow ma be gay rogon ni nge ayuweg fapi m’ag rok’.

Galibithir e bay e muruwel rorow ni rib ga’fan ni ngar ayuwegnew fapi bitir rorow ni ngar fal’agned rograed ni ngar thapagned fapi tawa’ath ko yafos ni manechubog. Ngar machib gaed ngak pifakrow ni ngar t’ufeged mi yaed pigpig ngak Got nge ngak e gidii’ (muguy ko Matthew 22:36–40).

“Matam e bay mat’won nib ga’ ni nge gagiyeg nag e tabinaew roraed u fithik’ e t’ufeg nge mat’aw ma yaed e bay e muruwel roraed ni ngar pii’ed e tin nib tu’uf ko yafos mi yaed yiroriy e tabinaew roraed” (“The Family: A Proclamation to the World”). Fa’anra dariy figirngiy fa matam ulan fare tabinaew, ma fare mitin e bay mat’won nib ga’ ulan fare tabinaew.

Mat’won ulan fare tabinaew e muruwl rok’ ni nge ayuweg me powi’iy gathon fare tabinaew ni nge sul nge par rok’ Got. Biney e yima rrin’ u fithik’ e pigpig nge machib u fithik’ e munguy, mudung, nge t’ufeg nib polo’, ni yibe leak wo’en Yesus Kristus (muguy ko Matthew 20:26–28). Mat’woy ulan fare tabinaew e mu’un i powi’iy gathon e tabinaew ko meybil ni gubin ngiyal’, fil mornga’agen fare gospel, nge rogon ni yima liyoer. Galibithir e ngar muruwel gow u ta’abang ni ngeyag ni ngar rrin’ew e pi muruwl ney.

“Bin th’abi ga’ e muruwel ko mitin e ngar chadawliyed e bitir roraed” (“The Family: A Proclamation to the World”). Ngan chadawliy e be yipfan ni ngan chugliy, min machib ngak, min ayuweg, ni yibe leak wo’en fare Tathapeg (muguy ko 3 Nephi 10:4). Ni yow fare figirngin u ta’abang, fare mitin e nge ayuweg e tabinaew rok’ ni nge fil mornga’agen fapi riyul’ ko gospel nge mich ngak e Chitamangiy nu Tharmiy nge Yesus Kristus. U ta’abang ni yow be ngongliy bang nira yib fare t’ufeg ngay ngalan fare tabinaew.

“Ko pi muruwel rorow ney nib thothup, matam nge mitin e thingara ayuwegew row ni yow l’agruw ni yow ba ta’abthal” (“The Family: A Proclamation to the World”). Yowra gopuruy’ mi yowra meybil u ta’abang nge ngak Somoel.

2.2

Fare Muruwel rok’ Got ko Thapegnag nge N’uf Ngalang ko bin Th’abi Tolang e Falfalaen’ ulan e Tabinaew

Fare bin Somm’on e Presidency e ga’ar, “Tabinaew e ir e gin nibay e yafos nib yul’yul’ riy” (First Presidency letter, Feb. 11, 1999).

Ra ngan pii’ e ayuw ngak fapi members ko muruwel rok’ Got nifen e thapegnag nge n’uf ngalang ko bin th’abi tolang e falfalaen’ ulan e tabinaew, fapi tiyugang’ ko Galasia era pii’ e athamgil ngoraed ni ngar ted e tabinaew roraed ni bang nrayag nira par fare Thothup riy. Ma kiyaedra pii’ e athamgil ngak fapi members ni ngar liyorfan fare rran nib Madnom, ni ngan fil fare gospel riy ulan e tabinaew.

2.2.3

Fil Mornga’agen e Gospel nge Tin ni ngan Fil ulan e Tabinaew

Fil e gospel nge tin ni ngan fil riy bugi ban’en ni’ir e bay u luk’unguy e tabinaew nge Galasia e bay nira pii’ e ayuw riy. Tiyugang’ ko Galasia era pii’ e athamgil ngak e members ni gubin ni ngar filed mornga’agen e gospel ulan e tabinaew ko fare rran ko Madbom nge lan fare wik.

Fil fapi chep nib thothup nikan yoloey ko Come, Follow Me—For Individuals and Families e n’en nikan tay ningan fil mornga’agen e gospel ulan e tabinaew.

2.2.4

Mo’olung ko Tabinaew nge ku Boech e Activities

Profet ko tin tomur e rran e kar machib niged ngak gidii’en e Galasia ni ngar ted e mo’olung nifan e tabinaew ni gubin e wik. Irraray e ngiyal’ nib thothup nifan fapi gidii’ nge tabinaew roraed ni ngar filled mornga’agen fare gospel, gel nag e mich rorad, ta’arebgaed u ta’abang, mi yaed falfalaen’ ngoraed.

Mo’olung ko tabinaew e rayag ni yira thilyeg rogon nibe yaen ko tin nibe buch ko gidii’en fare tabinaew. Rayag ni yira tay ko fare rran ko Madnom fa ku boech e rran nge ngiyal’ nib thil. Rayag nira un e:

• Fil mornga’agen e gospel nge rogon ngay (fare Come, Follow Me nge fapi materials ko rogon ni yi ba’adag.

• Pigpig ngak e gidii’.

• Yoen’ e tang fa fapi hymns nge fapi tang ko Primary (muguy ko chapter 19).

• Pii’ e ayuw ngak e gathon e tabinaew ko Bitir nge ayuw ko Fal’yangren.

• Tabinaew e rayag nira fal’ag e tin ni yaed ba’adag ni ngar rrin’ed, tin ni ngar mon’ogaed riy, nge tin ni rayag roraed.

• Gosgos.

Gidii’ ni yigo yaed roraed nge ku boech e gidii’ e rayag ni ngar ulung gaed nga ta’abang ni gathi fare rran’ ko Mandom ni yima tayfan ni ngar uned ko mo’olung ko tabinaew mi yaed ayuwegraed ni yaed be fil mornga’agen fare gospel.

2.2.5

Ayuweg e Gidii’

Tiyugang’ ko Galasia e ngar pii’ed e ayuw ngak fapi members nib tu’uf e ayuw roraed. Fapi tiyugang’ e ngar ayuweged e pi members ney nge tabinaew roraed ni ngeyag ni ngar uned, ko tin nibe buch, nib thothup.

2.3

Fare Tha’ u thilin e Tabinaew nge Galasia

Fare muruwel rok’ Got ko thapegnag nge n’uf ngalang ko bin th’abi tolang e falfalaen’ e bay ni’ir e luk’ungun e tabinaew ni Galasia e be pii’ e ayuw riy. Tin ba’aray e yalen e bay ko tha’ u thilin e tabinaew nge Galasia.

• Fapi tiyugang’ nge sensey era tayfan fare muruwel rok’ e galibithir min ayuwegraed riy.

• Boech e mo’olung ko Galasia e bay ni rib tu’uf ni be yaen u rogon fare ward fa fare branch. Tiney e mu’un fare mo’olung ko sakrament ngay nge fpai klas nge mo’olung ko quorum ni yima tay ko Madnom. Ma boech e mo’olung, fa activities, nge boech e program ni gathi rib ga’fan.

• Somoel era tawa’ath nag fapi members napan ni yaed be pigpig nge tin ni yaed be athamgiliy ualn e Galasia rok’. Machane, urngin e tin ni yibe pigpig nag ulan e Galasia e susun ni dabi talag fa palog nigey ko tin ni muruwel ulan e tabinaew, fa tamuruwel, nge bang.