4.

Pagkalider kag mga Konseho sa Simbahan ni Jesucristo

4.0

Introduksyon

Bilang lider sang Simbahan, gintawag ka paagi sa inspirasyon sang awtorisado nga mga alagad sang Ginuo. May ara ka sang pribelihiyo nga buligan ang Amay nga Langitnon sa buluhaton sang “[pagpahanabo sang] pagkawala’y kamatayon kag kabuhi nga wala’y katapusan sang tawo” (Moises 1:39).

4.2

Mga Prinsipyo sang Pagkalider sa Simbahan

Sang panahon sang Iya dutan-on nga pag-alagad, nagpahamtang ang Manluluwas sang ehemplo sang pagkalider sa Iya Simbahan. Ang Iya mayor nga katuyuan amo ang pagtuman sang pagbuot sang Iya Amay nga Langitnon kag pagbulig sa iban nga maintiendihan kag ipangabuhi ang Iya ebanghelyo (tan-awa sa Juan 5:30; Mosias 15:7).

Pangayua ang giya sang Ginuo nga buligan ka sa pagtuon kag pagtuman sang mga tulumanon sang imo calling.

4.2.1

Maghanda sa Espirituhanon

Naghanda si Jesus sang Iya Kaugalingon sa espirituhanon para sa Iya dutan-on nga misyon (tan-awa sa Lucas 4:1–2). Ikaw man makahanda sa espirituhanon sa pagpalapit sa Amay nga Langitnon paagi sa pangamuyo, pagtuon sang balaan nga mga kasulatan, kag pagtuman sang Iya mga kasuguan.

Magpangayo sang rebelasyon para maintiendihan ang mga panginahanglan sang imo mga ginapamunoan kag kon paano himuon ang buluhaton nga ginapaobra sang Dios sa imo.

Nagpromisa man ang Ginuo nga hatagan sang espirituhanon nga mga dulot ang mga nagapangita sini (tan-awa sa Doktrina kag mga Kasugtanan 46:8).

4.2.2

Mag-alagad sa Tanan nga mga Anak sang Dios

Palanggaa ang mga tawo nga imo ginaalagaran pareho sang ginhimo ni Jesus. Magpangamuyo “sa bug-os nga ikasarang sang tagipusuon” nga mapuno sang Iya gugma (Moroni 7:48).

Buligi ang kada isa nga padalumon ang ila pagkahaylo kag pabakuron ang ila pagtuo sa Amay nga Langitnon kag kay Jesucristo. Buligi sila nga maghanda sa paghimo sang mga kasugtanan sa pagbaton nila sang madason nila nga ordinansa. Paisoga sila nga tumanon ang mga kasugtanan nga ila ginhimo kag batunon ang mga bugay sang paghinulsol.

4.2.3

Itudlo ang Ebanghelyo ni Jesucristo

Ang tanan nga mga lider mga manunudlo. Tinguhai nga sundon ang ehemplo sang Manluluwas bilang manunudlo (tan-awa sa kapitulo 17; Pagtudlo sa Paagi sang Manluluwas ). Paagi sa imo mga tinaga kag aksyon, itudlo ang doktrina ni Jesucristo kag ang mga prinsipyo sang Iya ebanghelyo (tan-awa sa 3 Nefi 11:32–33; Doktrina kag mga Kasugtanan 42:12–14).

Magtudlo halin sa balaan nga mga kasulatan kag sa mga pulong sang mga propeta sa ulihing adlaw (tan-awa sa Doktrina kag mga Kasugtanan 52:9).

Kon gintawag ka ukon gin-asayn nga magpamuno sa isa ka miting ukon aktibidades sa Simbahan, siguroha nga ang pagtudlo makapalig-on sa espirituhanon kag husto sa doktrina (tan-awa sa Doktrina kag mga Kasugtanan 50:21–23).

4.2.4

Magpamuno sa Pagkamatarong

Ang tagsa ka nagapamuno nga opisyal nagaserbe sa direksyon sang tawo nga nagakapot sang mga yabi sang priesthood (tan-awa sa 3.4.1). Ang ini nga istraktura nagahatag sang kahusay kag klaro nga mga responsibilidad kag salabton sa paghimo sang buluhaton sang Ginuo.

Ang nagapamuno nga opisyales pwede nga magdelegar sa iban nga tawo sang temporaryo nga asaynment nga magpamuno.

Ang lider nga nagapamuno sa isa ka organisasyon, miting, ukon aktibidades sa Simbahan nagasiguro nga matuman ang mga katuyuan sang Ginuo. Sa paghimo sini, ginasunod sang lider ang mga prinsipyo sang ebanghelyo, mga polisiya sang Simbahan, kag ang direksyon sang Balaan nga Espiritu.

Ang calling ukon tulumanon nga magpamuno wala nagahimo sa tawo nga nakabaton sini nga mas importante ukon pinaboran sangsa iban (tan-awa sa Doktrina kag mga Kasugtanan 84:109–10).

Indi nagakabagay ang maghandum nga magpamuno sa bisan ano nga organisasyon sa Simbahan sang Ginuo (tan-awa sa Doktrina kag mga Kasugtanan 121:34–37).

4.2.5

Magdelegar sang Responsibilidad kag Siguroha ang Salabton

Ang Manluluwas naghatag sa Iya mga disipulo sang mapuslanon nga mga tulumanon kag mga responsibilidad (tan-awa sa Lucas 10:1). Ginhatagan man Niya sila sang oportunidad nga manabat sa buluhaton nga ginapahimo sa ila (tan-awa sa Lucas 9:10).

Bilang lider, mabuligan mo ang iban nga magtubo paagi sa pagdelegar sang mga tulumanon sa ila. Tinguhai nga paentrahon ang tanan nga mga miyembro sa paghimo sang buluhaton sang Dios.

Ang pagdelegar magahimo man sang imo pagserbisyo nga mas epektibo. Pangayoa ang giya sang Espiritu kon ano ang idelegar para matutukan mo ang pinakamataas mo nga mga prayoridad.

4.2.6

Ihanda ang Iban nga Mangin mga Lider kag Titser

Samtang ginabinagbinag mo kon sin-o ang pwede nga magserbisyo sa mga calling ukon mga tulumanon sa Simbahan, mangin mainampuon. Tandai nga ginakwalipikar sang Ginuo ang Iya ginatawag. Ang pinakaimportante amo nga handa sila nga magserbisyo, mapainubuson nga magpangayo sang bulig sang Ginuo, kag nagatinguha nga mangin kaangay-angay.

4.2.7

Magplano sang mga Miting, Leksyon, kag Aktibidades nga Maathag ang mga Tuyo

Pangayoa ang giya sang Espiritu sa pagplano sang mga miting, mga leksyon, kag aktibidades nga may klaro nga katuyuan. Ining mga katuyuan dapat magapabakod sang mga indibidwal kag mga pamilya, mas magapalapit sa ila kay Cristo, kag magabulig sa pagtuman sang buluhaton sang Dios sang kaluwasan kag pangkahitaasan (tan-awa sa mga kapitulo 1 and 2).

4.2.8

Pagtakos sang Imo nga Pagpaninguha

Regular nga rebyuha ang imo mga responsibilidad kag espirituhanon nga pagtubo bilang lider. Pamensara man ang pagtubo sang imo mga ginapamunoan.

Ang imo kadalag-an bilang lider ginatakos una gid sa imo dedikasyon nga buligan ang mga anak sang Dios nga mangin matutom nga mga disipulo ni Jesucristo. Mahibal-an mo nga ang Ginuo nalipay sa imo mga pagpaninguha kay mabatyagan mo ang Espiritu nga nagahikot paagi sa imo.

4.3

Mga Konseho sa Simbahan

Naghatag ang Ginuo sang instruksyon sa mga lider sang Iya Simbahan nga magkonsultahanay sa ila paghimo sang Iya buluhaton (tan-awa sa Doktrina kag mga Kasugtanan 41:2–3). Ang mga konseho nagahatag sang mga oportunidad sa mga miyembro sang konseho nga makabaton sang rebelasyon samtang ginatinguhaan nila nga intiendihon ang mga panginahanglan sang mga anak sang Dios kag ginaplanuhan kon paano ini aksyunan.

4.4

Mga Prinsipyo sang Epektibo nga mga Konseho

4.4.1

Mga Katuyuan sang mga Konseho

Ang mga konseho nagahatag sang espesyal nga pagtutok para buligan ang mga miyembro nga makabaton sang mga ordinansa kag magtuman sang naangot nga mga kasugtanan.

4.4.2

Preparasyon para sa mga Miting sang Konseho

Ang mga pangulohan kag mga konseho ginapaabot nga regular nga magmiting. Ining mga lider nagapangayo sang giya sang Ginuo sa pagplano sang mga miting sang konseho. Nagapangayo man sila sang mga ideya halin sa mga miyembro sang konseho kon ano ang hambalan.

Ginapahibalo na nga daan sang mga lider ang mga miyembro sang konseho kon ano ang mga topiko nga hambalan. Ang mga miyembro sang konseho nagahanda sa paghatag sang ila mga panghunahuna parte sa sining mga butang.

4.4.3

Paghinambalanay kag mga Desisyon

Sa tion sang miting sang konseho, ang lider (ukon ang gin-asayn sang lider) magapaathag sang butang nga dapat hambalan. Dayon ginaagda sang lider ang tanan nga mga miyembro sang konseho nga mag-entra sa paghinambalanay, nga nagapamangkot kag nagapangayo sang mga ideya.

Ang mga miyembro nagahatag sang ila mga suhestyon kag nagapamati sa kada isa nga may respeto. Samtang ginahandum nila nga mahibal-an ang pagbuot sang Ginuo, magapangibabaw ang panimuot sang inspirasyon kag pag-isa.

Sa konseho nga may mga babayi kag lalaki, ang lider nagapangayo sang mga panghunahuna kag mga ideya sang pareho nga grupo. Ang mga babayi kag lalaki masami lainlain ang panan-awan sa mga butang kag nagahatag ini sang balanse.

Ginagiyahan sang lider ang paghinambalanay sang konseho. Pero, dapat nga mas laban sia nga magapamati sangsa magahambal.

Pagkatapos sang paghinambalanay, pwede ang lider nga magdesisyon kon ano ang himuon ukon indi anay magdesisyon samtang nagapangayo sang dugang nga impormasyon kag giya.

4.4.4

Pag-isa

Ang mga miyembro sang konseho nagatinguha nga mangin isa sa handum kag katuyuan upod sa Amay nga Langitnon kag kay Jesucristo. Ginatinguhaan nila nga mag-isa sa ila mga paghinambalanay kag mga desisyon.

4.4.5

Aksyon kag Salabton

Ginaobra sang mga miyembro sang konseho ang kalabanan sang ila mga buluhaton antes kag pagkatapos sang mga miting sang konseho. Sa tion sang mga miting, nagapangayo sila sang inspirasyon sa pagporma sang mga plano kon paano i-implementar ang mga desisyon. Ang lider sang konseho nagahagad sa mga miyembro nga tumanon ang mga asaynment nga naangot sa sining mga plano.

Ang mga miyembro sang konseho nagareport sang resulta sang ila mga asaynment. Ang pag-uswag masami nagapangayo sang sige-sige nga pagtutok kag mga padason pa nga mga asaynment.

4.4.6

Pagtipig sang Impormasyon

Ang mga lider nagagamit sang kaalam sa pagpagwa sang personal nga impormasyon sa konseho. Sa masami nagapangayo sila sang permiso sa miyembro kon pwede isugid ini nga impormasyon.

Ang mga miyembro sang konseho indi dapat mag-istorya sang personal nga impormasyon sa gwa sang konseho magluwas kon kinahanglanon ini para mahimo ang ginapaobra sang lider sang konseho.

Ang pila ka mga topiko tama kasensitibo agud iistorya sa bilog nga konseho.