4.

Lidasip mo Ol Kaonsel Insaed long Jos Ia blong Jisas Kraes

4.0

Fas Toktok

Olsem wan lida insaed long Jos, oli bin singaotem yu tru long insperesen tru long ol wokman blong Lod, we oli kasem raet ia. Yu, yu gat spesel janis blong helpem wok blong Papa long Heven blong “stap mekem man i nomo save ded mo i kasem laef we i no save finis” i hapen (Moses 1:39).

4.2

Ol Prinsipol blong Lidasip Insaed long Jos

Long taem blong seves blong Hem long wol ia, Sevya i bin setem eksampol blong lidasip blong Jos blong Hem. Stamba tingting blong Hem, i blong mekem wok blong Papa blong Hem long Heven mo stap helpem ol narawan blong oli andastanem mo stap laef folem gospel blong Hem (luk long Jon 5:30; Mosaea 15:7).

4.2.1

Rere long Saed blong Spirit

Jisas i mekem Hem i rere long saed blong spirit blong mekem misin blong Hem long wol ia (luk long Luk 4:1–2). Semmak, yu rere long saed blong spirit taem yu stap kam kolosap moa long Papa long Heven tru long prea, skripja stadi, mo fasin blong stap obei long ol komanmen blong Hem.

Lukaotem revelesen blong andastanem ol nid blong olgeta we yu stap lidim mo olsem wanem blong mekem wok blong God we oli singaotem yu from, i hapen.

Lod i bin promesem tu blong givim ol presen long saed blong spirit long olgeta we oli stap lukaotem ol presen ia (luk long Doktrin mo Ol Kavenan 46:8

4.2.2

Givhan long Evriwan long Ol Pikinini blong God

Lavem ol pipol we yu stap wok blong olgeta, semmak olsem we Jisas i bin mekem. Prea “wetem evri paoa blong hat” blong yufala i fulap wetem lav ia blong Hem (Moronae 7:48).

Helpem wanwan man mo woman blong mekem oli jenisim laef blong olgeta moa, mo blong mekem bilif blong olgeta long Papa long Heven mo Jisas Kraes i kam strong moa. Helpem olgeta blong rere blong mekem ol kavenan taem oli stap kasem ol nekis odinens blong olgeta. Leftemap tingting blong olgeta blong kipim ol kavenan we oli bin mekem mo blong oli tekem mo yusum ol blesing blong fasin blong sakem sin.

4.2.3

Tijim Gospel blong Jisas Kraes

Evri lida oli ol tija. Traehad blong stap folem eksampol blong Sevya olsem wan tija (luk long japta 17; Teaching in the Savior’s Way). Tru long ol toktok mo ol aksen blong yu, tijim doktrin ia blong Jisas Kraes mo olgeta prinsipol blong gospel blong Hem (luk long 3 Nifae 11:32–33; Doktrin mo Ol Kavenan 42:12–14).

Tij aot long ol skripja mo ol toktok blong ol profet blong las dei (luk long Doktrin mo Ol Kavenan 52:9

Sapos oli singaotem yu, o oli givim wok long yu blong yu prisaed long wan miting blong Jos, o long wan aktiviti blong Jos, meksua se tijing ia, i leftemap man, mo doktrin i stret (luk long Doktrin mo Ol Kavenan 50:21–23).

4.2.4

Prisaed long Stret mo Gud Fasin

Wanwan prisaeding ofisa i wok anda long daereksen blong wan we i holem ol ki blong prishud (luk long 3.4.1). Fasin ia i givim oda mo ol klia laen blong responsabiliti mo fasin blong stap akaontebol blong mekem wok blong Lod.

Wan prisaeding ofisa, i save givim long wan narawan, wan wok we i blong sot taem, blong hem i prisaed.

Wan lida we i prisaed long wan oganaesesen blong Jos, long wan miting, o aktiviti, i mekemsua se oli stap mekem ol stamba tingting blong Lod i kamtru. Taem hem i mekem olsem, lida ia i stap folem ol prinsipol blong gospel, ol polisi blong Jos, mo daereksen we i kam long Tabu Spirit.

Wan koling o wan asaenmen blong prisaed i no mekem se, hem we i kasem hemia, i moa impoten o i gat moa paoa bitim ol narawan (luk long Doktrin mo Ol Kavenan 84:109–10

Hem i no stret blong wantem prisaed long eni oganaesesen blong Jos ia blong Lod (luk long Doktrin mo Ol Kavenan 121:34–37

4.2.5

Givimaot Wok mo Meksua se Wanwan I Ansa From

Sevya i givim long ol disaepol blong Hem ol asaenmen mo ol responsabiliti we oli gat mining (luk long Luk 10:1). Mo tu, Hem i mekem olgeta oli mas ansa from ol wok we oli kasem blong mekem (luk long Luk 9:10).

Olsem wan lida, yu save helpem ol narawan blong oli groap taem yu givimaot ol wok long olgeta. Traehad blong yusum mo tekem evri memba blong kam mekem wok ia blong God.

Fasin blong stap givimaot wok bae i mekem tu se seves blong yu i wok gud moa. Lukaotem givhan blong Spirit abaot wanem wok blong givimaot blong mekem se yu save lukluk nomo long ol samting we oli kam faswan mo oli moa impoten long yu.

4.2.6

Rere Ol Narawan blong Stap Ol Lida mo Ol Tija

Taem yu stap tingting long huia nao i save givim seves long ol koling blong Jos, o i save kasem wok blong mekem, yu mas prea. Tingbaot se Lod bae i mekem olgeta we Hem i singaotem, bae oli kwalifae. Wanem i moa impoten, i we, oli wantem mo glad blong mekem wok, bambae oli lukaotem help blong Lod wetem tingting we i stap daon, mo bae oli traehad blong stap klin inaf.

4.2.7

Mekem Plan blong Ol Miting, Ol Lesen mo Ol Aktiviti we Oli Gat Ol Klia Stamba Tingting

Lukaotem blong Spirit i lidim yu blong mekem plan blong ol miting, ol lesen, mo ol aktiviti we oli gat ol klia stamba tingting. Olgeta stamba tingting ia, oli blong mekem wanwan man, woman, mo ol famli oli kam strong moa, oli tekem olgeta oli go kolosap moa long Kraes, mo i helpem olgeta blong mekem wok ia blong fasin blong sevem man mo hemia blong kam olsem wan god i hapen (luk long ol japta 1 mo 2).

4.2.8

Stap Skelem Ol Hadwok blong Yu

Fulap taem, luklukbak long ol responsabiliti blong yu mo hamas yu stap kam antap long saed blong spirit olsem wan lida. Tingting long hamas nao olgeta we yu stap lidim oli stap kam antap long saed blong spirit.

Sakses blong yu olsem wan lida, bae yu skelem faswan wetem ol komitmen blong yu blong stap helpem ol pikinini blong God blong oli kam ol fetful disaepol blong Jisas Kraes. Bae yu save kam blong save se Lod i stap glad wetem ol hadwok blong yu taem yu stap filim Spirit i wok tru long yu.

4.3

Ol Kaonsel Insaed long Jos

Lod i bin givim instraksen long ol lida blong Jos blong kaonsel tugeta blong mekem wok ia blong Hem (luk long Doktrin mo Ol Kavenan 41:2–3). Ol kaonsel oli givim ol janis blong ol memba blong kaonsel blong kasem revelesen taem oli lukaotem blong andastanem ol nid blong ol pikinini blong God, mo mekem ol plan blong hao blong lukluk long ol nid ia.

4.4

Ol Prinsipol blong Ol Kaonsel we Oli Wok Gud

4.4.1

Ol Stamba Tingting blong Ol Kaonsel

Ol kaonsel oli tokbaot plante blong stap helpem ol memba blong oli kasem ol odinens, mo blong oli kipim ol kavenan we i go wetem ol odinens ia.

4.4.2

Stap Rere from Ol Kaonsel Miting

Tingting i stap se ol presidensi mo ol kaonsel oli mas mit oltaem. Ol lida oli lukaotem blong Lod i soem rod long olgeta taem oli mekem plan blong ol kaonsel miting blong olgeta. Mo tu, oli lukaotem blong ol memba blong kaonsel oli givim tingting blong disaed long saed blong wanem blong toktok raon long hem.

Ol lida oli letem ol memba blong kaonsel oli save abaot ol poen blong toktok raon long olgeta; oli mekem hemia bifo miting i tekples. Ol memba blong kaonsel oli rere blong serem ol niu tingting abaot ol poen ia.

4.4.3

Ol Toktok Storian mo Ol Desisen

Long taem blong wan kaonsel miting, lida (o wan we lida i givim wok ia long hem,) i eksplenem poen blong toktok raon long hem. Nao lida i leftemap tingting blong evri memba blong kaonsel i toktok, i askem ol kwestin, mo i lukaotem ol aedia.

Ol memba oli givim ol tingting mo oli lisin long wanwan wetem respek. Taem oli stap lukaot blong save tingting blong Lod, i gat wan spirit blong insperesen mo yuniti we i save win i stap.

Long wan kaonsel we i gat ol woman, mo ol man, lida i lukaotem ol niu tingting mo ol aedia we oli kam long tugeta saed ia. Plante taem, ol woman mo ol man oli gat ol defren lukluk we i givim gudfala balens ia we i nid.

Wan lida i lidim ol toktok storian blong kaonsel. Be, lida ia, man o woman, i mas lisin moa bitim we hem i toktok.

Afta long wan toktok storian, lida i save disaed blong tekem wan aksen, o i save disaed blong mekem wan desisen afta, mo save go lukaotem moa infomesen mo help blong Lod.

4.4.4

Yuniti

Ol memba blong kaonsel oli lukaot blong kam wan long wanem samting oli wantem, mo stamba tingting blong olgeta wetem hemia blong Papa long Heven mo Jisas Kraes. Oli traehad blong oli stap wan long ol toktok storian mo desisen blong olgeta.

4.4.5

Aksen mo Fasin blong Stap Akaontebol

Ol memba blong kaonsel oli mekem plante long ol wok blong olgeta bifo mo afta long kaonsel miting. Long taem blong ol miting, oli lukaotem insperesen blong stap developem ol plan blong mekem ol desisen we oli bin tekem. Kaonsel lida i invaetem ol memba blong mekem ol wok we oli bin givimaot long saed blong ol plan ia.

Ol memba blong kaonsel oli givim ripot blong ol wok we oli bin givimaot long olgeta. Plante taem, progres i nidim blong ol lida oli luklukgud long ol wok ia, mo blong oli mas folemap oltaem ol wok ia.

4.4.6

Ol Konfidensiol Samting

Ol lida oli mas lukaotgud taem oli serem ol praevet infomesen wetem wan kaonsel. Plante taem, oli askem raet blong wan memba blong oli serem infomesen ia.

Ol memba blong kaonsel oli no mas serem ol praevet infomesen aotsaed long kaonsel, be nomo sapos i nid blong mekem wan wok we kaonsel lida i bin givim.

Samfala mata, oli no stret tumas blong tokbaot long fored blong wan ful kaonsel.