fonotaga a le aufono a le uarota

4.

Taitaiga ma Aufono i le Ekalesia a Iesu Keriso

4.0

Faatomuaga

I le avea ai o se taitai i le Ekalesia, ua valaauina oe e ala i musumusuga e auala mai i auauna faatagaina a le Alii. Ua ia te oe le avanoa e fesoasoani ai i le galuega a le Tama Faalelagi o le “aumaia [o] le tino ola pea ma le ola faavavau o le tagata” (Mose 1:39).

4.2

Mataupu Faavae o le Taitaiga i le Ekalesia

I le taimi o Lana galuega i le lalolagi, sa faatu ai e le Faaola le faataitaiga o le taitaiga mo Lana Ekalesia. O Lona faamoemoega tutotonu o le faia o le finagalo o Lona Tama Faalelagi ma fesoasoani i isi ia malamalama ma ola i Lana talalelei (tagai i le Ioane 5:30; Mosaea 15:7).

4.2.1

Saunia Faaleagaga

Sa saunia e Iesu o Ia lava faaleagaga mo Lana misiona i le lalolagi (tagai i le Luka 4:1-2). E faapena foi ona e saunia faaleagaga e ala i le faalatalata atili atu i le Tama Faalelagi e ala i le tatalo, suesue i tusitusiga paia, ma le usiusitai i Ana poloaiga.

Saili i faaaliga e te malamalama ai i manaoga o i latou e te taitaia ma le auala e faataunuu ai le galuega ua valaauina oe e le Atua e fai.

Ua folafola mai foi le Alii e faaee atu meaalofa faaleagaga i luga o i latou o ē saili i ai (tagai i le Mataupu Faavae ma Feagaiga 46:8

4.2.2

Auauna Atu i Fanau Uma a le Atua

Alofa i tagata e te auauna atu i ai e pei ona sa faia e Iesu. Tatalo “ma le malosi atoa o le loto” ina ia faatumulia i Lona alofa (Moronae 7:48).

Fesoasoani i tagata taitasi e faaloloto lo latou liua ma le malosi o lo latou faatuatua i le Tama Faalelagi ma Iesu Keriso. Fesoasoani ia i latou ia saunia e osia feagaiga pe a latou mauaina o latou sauniga e sosoo ai. Fautuaina i latou e tausia feagaiga na latou osia ma ia taumamafa i faamanuiaga o le salamo.

4.2.3

A’oa’o Atu le Talalelei a Iesu Keriso

O taitai uma lava o faiaoga. Tauivi e mulimuli i le faataitaiga a le Faaola i le avea ai ma se faiaoga (tagai i le mataupu 17; Aoao Atu i le Ala a le Faaola). E ala atu i au upu ma faatinoga, ia aoao atu le aoaoga faavae a Iesu Keriso ma mataupu faavae o Lana talalelei (tagai i le 3 Nifae 11:32–33; Mataupu Faavae ma Feagaiga 42:12–14).

A’oa’o atu mai tusitusiga paia ma upu a perofeta o aso e gata ai (tagai i le Mataupu Faavae ma Feagaiga 52:9

Afai e valaauina oe pe tofia e pulefaamalumalu i se sauniga/fonotaga po o se gaoioiga a le Ekalesia, ia mautinoa e faagaeetia ma ia sa’o aoaoga faavae autu (tagai i le Mataupu Faavae ma Feagaiga 50:21–23).

4.2.4

Pulefaamalumalu i le Amiotonu

O taitai pulefaamalumalu taitasi, e auauna atu i lalo o le taitaiga a se tagata o loo umia ki o le perisitua (tagai i le 3.4.1). O lenei faatulagaga ua aumaia ai le faatulagaga maopoopo ma laina manino o le tiutetauave ma le tali atu o le tagata lava ia i le faiga o le galuega a le Alii.

E mafai e se taitai pulefaamalumalu ona faamatuu atu i se isi tagata se tofiga e le tumau e pulefaamalumalu ai.

O se taitai e pulefaamalumalu i se faalapotopotoga a le Ekalesia, fonotaga, po o se gaoioiga e faamautinoaina e ausia faamoemoega a le Alii. O le faia o lea mea, e mulimuli ai le taitai i mataupu faavae o le talalelei, aiaiga faavae a le Ekalesia, ma le taitaiga a le Agaga Paia.

O se valaauga po o se tofiga e pulefaamalumalu e le faapea o le a sili atu ai le taua po o le mamalu o le tagata ua mauaina nai lo isi (tagai i le Mataupu Faavae ma Feagaiga 84:109–10

E le o se mea talafeagai le faufau e pulefaamalumalu i se faalapotopotoga i le Ekalesia a le Alii (tagai i le Mataupu Faavae ma Feagaiga 121:34--37

4.2.5

Faamatuu Atu Tiutetauave ma Faamautinoa le Tali Atu I Ai

Na tuuina atu e le Faaola i Ona soo ni tofiga ma ni tiutetauave ‘anoa (tagai i le Luka 10:1). Na Ia tuu atu foi ia i latou se avanoa e tali atu ai mo le galuega na tuu atu ia i latou e fai (tagai i le Luka 9:10).

I le avea ai ma se taitai, e mafai ona e fesoasoani i isi ia tuputupu ae e ala i le faamatuu atu o tofiga ia i latou. Tauivi e faaauai tagata uma o le au paia i le faiga o le galuega a le Atua.

O le faamatuu atu o le a sili ai foi ona aoga lau auaunaga. Saili i le taitaiga a le Agaga e uiga i mea e faamatuu atu ina ia mafai ai ona e taulai atu i au faamuamua aupito maualuluga.

4.2.6

Saunia Isi e Avea ma Taitai ma Faiaoga

Pe a mafaufauina po o ai e mafai ona galue i valaauga po o tofiga o le Ekalesia, ia agaga tatalo. Ia manatua o le a faaagavaaina e le Alii i latou Na te valaauina. O le mea e aupito sili ona taua o lo latou naunau e auauna atu, o le a sailia ma le lotomaualalo le fesoasoani a le Alii ma o loo taumafai ia agavaa.

4.2.7

Fuafua Fonotaga, Lesona, ma Gaoioiga ma ni Faamoemoega Manino

Saili le taitaiga a le Agaga i le fuafuaina o fonotaga, lesona, ma gaoioiga e i ai ni faamoemoega manino. O nei faamoemoega e tatau ona faamalolosia ai tagata taitoatasi ma aiga, aumaia faalatalata atili ai i latou ia Keriso, ma fesoasoani ai i le faataunuuina o le galuega a le Atua o le faaolataga ma le faaeaga (tagai i mataupu 1 ma le 2).

4.2.8

Iloiloina o Au Taumafaiga

Ia iloilo e le aunoa ou tiutetauave ma le tuputupu a’e faaleagaga o se taitai. Ia mafaufau foi i le tuputupu a’e o i latou e te taitaia.

O le faamanuiaina o oe o se taitai e muai fuaina i lau tautinoga e fesoasoani i fanau a le Atua ia avea ma soo faamaoni o Iesu Keriso. E mafai ona e iloa ua fiafia le Alii i au taumafaiga pe a e lagonaina le Agaga o loo galue e ala atu ia te oe.

4.3

Aufono i le Ekalesia

Ua faatonuina e le Alii ia taitai o Lana Ekalesia e fefautuaai faatasi i le faiga o Lana galuega (tagai i le Mataupu Faavae ma Feagaiga 41:2–3). O aufono e maua ai avanoa mo sui auai o aufono e maua faaaliga a o latou saili ia malamalama i manaoga o fanau a le Atua ma fuafua pe faapefea ona fesoasoani ia taulimaina.

4.4

O Mataupu Faavae o Aufono Aoga

4.4.1

Faamoemoega o Aufono

E tuu atu e aufono le faamamafa faapitoa e fesoasoani ai i tagata ia maua sauniga ma tausisia feagaiga e o faatasi ai.

4.4.2

Sauniuniga mo Fonotaga a le Aufono

Ua faamoemoe i au peresitene ma aufono e fono e le aunoa. E saili e taitai le taitaiga a le Alii i le fuafuaina o fonotaga a aufono. Latou te sailia foi manatu mai sui auai o aufono i le filifilia o mea e talanoaina.

E vave faailoa atu e taitai i sui auai o aufono ia iloa mataupu mo talanoaga. E sauniuni sui auai o aufono e faasoa mai malamalamaaga e uiga i nei mataupu.

4.4.3

Talanoaga ma Faaiuga

I le taimi o se fonotaga a se aufono, e faamalamalama atu e le taitai (po o se tasi ua tofia e le taitai) le mataupu ua mafaufauina. Ona fautuaina lea e le taitai le talanoaga i sui auai uma o le aufono, ma faia fesili ma sailia ni manatu.

E fefaasoaai e sui auai ia fautuaga ma faalogologo le tasi i le isi ma le faaaloalo. A o latou saili ia iloa le finagalo o le Alii, e mafai ona manumalo ai se agaga o musumusuga ma le lotogatasi.

I se aufono e aofia ai tamaitai ma alii, e saili e le taitai ia malamalamaaga ma manatu mai i nei itu e lua. O alii ma tamaitai e tele ina eseese manatu e maua mai ai le paleni e moomia.

E taiala e se taitai le talanoaga a le aufono. Peitai, e ao ona tele atu lana faalogologo nai lo le tautala.

A maea le talanoaga, e mafai e le taitai ona fai se tonu o se auala o le faatinoga pe toe tolopo se faaiuga a o sailia nisi faamatalaga ma se taitaiga.

4.4.4

Lotogatasi

E saili sui auai o aufono ia tasi i le faanaunauga ma le faamoemoega ma le Tama Faalelagi ma Iesu Keriso. Latou te taumafai malosi mo le lotogatasi i a latou talanoaga ma faaiuga.

4.4.5

O Faatinoga ma le Tali Atu mo A’u Lava

E faia e tagata o le aufono le tele o a latou galuega ao lei amataina ma i le mae’a ai o fonotaga a le aufono. I le taimi o fonotaga, latou te sailia ia musumusuga i le atiina a’e o fuafuaga e faatino ai faaiuga. E valaaulia e le taitai o le aufono ia sui auai e faataunuu ia tofiga e tusa ai ma nei fuafuaga.

E lipoti atu sui auai o aufono e uiga i o latou tofitofiga. O le alualu i luma e masani ona manaomia ai le gauai atu faifai pea ma tofitofiga e tulitatao ai.

4.4.6

Lē Faalaua’iteleina

E faaaoga e taitai le faautautaga pe a faasoa atu faamatalaga patino i se aufono. E masani lava latou te sailia se faatagaga a se sui auai e faasoa atu ai lenei faamatalaga.

E le tatau i sui auai o le aufono ona faasoa atu faamatalaga patino i fafo atu o le aufono sei vagana ai ua manaomia e faataunuu ai se tofiga mai le taitai o le aufono.

O nisi mataupu e maaleale tele naua e le tatau ai ona aumaia i luma o se aufono atoa.