4.

Ohiyen Kol ac Kahsruh ke Alu luhn Jisus Kraist

4.0

Ikucslah

Ekihn mwet kol ke Alu, pahngonyuck kom ke moklweyuck luhn mwet kuhlwacnsap solac luhn Leum. Oasr suwohs lom in tahpuhk orekma luhn Pahpah Inkuhsrao in “molwelah moul luhn mwet nuh ke moul kawihl ac moul ma pahtpaht” (Moses 1:39).

4.2

Ip Yohk ke Ohiyen Kol ke Alu uh

Ke lutlut Lal fin facluh, Mwet Lahngo el akiyac srihkasrak in kol Alu Lal. Srihpac yohk Lal pa in oruh kena luhn Pahpah Tuhmacl Inkuhsrao ac mwet sahyac in kahlwem ac moulkihn wosasuc Lal (liye John 5:30; Mosiah 15:7).

Suk kahsruh luhn Leum in kahsre kom eis etack ac in tahfelah kunohkohn ke pahng lom.

4.2.1

Ahkolah in Nguhn

Jisus el ahkolah nguhn in El ke fuhfahsryucsr Lal (liye Luke 4:1–2). Kom oacyacpac enenuh in ahkolah nguhn in kom ke kom fototo nuh yurin Pahpah Inkuhsrao ke pruhe, lutlutkihn ma suhmuhslah, ac ahkosten nuh ke masap Lal.

Suk fwackyuck in kahlwem ke enenuh luhn mwet kom kol ac lah kom ac kanwelah fuhkah kunohkohn se God el pahngon kom in oruh inge.

Leum el olwelah in ukiyac mwe sang luhn nguhn nuh faclos suc suk (liye Doctrine and Covenants 46:8).

4.2.2

Luti nuh sin Tuhlihk Nuhkewa nuhtin God

Luhngse mwet kom kuhlwacnsuhpuh oacna ke Jisus el oruh. Pruhe “ke kuhiyacn insiowos nohfohn” tuh in sesesslah ke luhngse Lal (Moroni 7:48).

Kahsruh kais sie in ahkloalye eklac lalos ac ahkkweye luhlahlfongi lalos kacl Pahpah Inkuhsrao ac Jisus Kraist. Kahsrelos in oraclah wuhlweacng ke elos eis akwuck lalos. Ahkweyaclos in karihngihn na wuhlweacng elos oraclah ac in sikalweni eis mwe insewowo ke auliyak.

4.2.3

Luti Wosasuc luhn Jisus Kraist

Mwet kol nuhkewa elos mwet luti. Kampare in ukwe srihkasrak luhn Mwet Lahngo ekihn mwet luti (liye sapta 17; Teaching in the Savior’s Way). Ke kahs ac ohiyac lom, luti mwe luti luhn Jisus Kraist ac ip yohk ke wosasuc Lal (liye 3 Nephi 11:32–33; Doctrine and Covenants 42:12–14).

Luti orekmakihn ma suhmuhslah ac kahs luhn mwet pahluh ke lwen-sahflah (liye Doctrine and Covenants 52:9).

Fin pahng kuh srihsrngiyucki kom in kol toeni kuh mukwikwi se ke Alu, ahklohyac liye mwe luti an lah kahlwem ac pwacye (liye Doctrine and Covenants 50:21–23).

4.2.4

Kol ke Suwohs

Kais sie mwet ma kol inge kuhlwacnsap ye kohkoh luhn mwet se sruok ki luhn pristut (liye 3.4.1). Ohiyac se inge kahsruh in tahkuhnlah ac in tena fohs ma orek ac kunohkohn ke oruh orekma luhn Leum.

Mwet kol se kuh in srihsrngiyac sie pacna mwet in kol tiac ma paht se.

Mwet kol ma kol u srihsrihk, miting, kuh mukwikwi ke Alu uh enenuh in lohacng liye lah srihpac luhn Leum uh ahksahfyeyucklac. Ke oruh ohinge, mwet kol elos ukwe ip yohk ke wosasuc, masap ke Alu, ac kolyuck luhn Nguhn Muhtahl.

Pahng kuh kunohkohn in kol tiac oruh mwet se ma eis ingacn in yohk srihpac kuh in fulwact liki mwet sahyac (liye Doctrine and Covenants 84:109–10).

Tiac ma wowo se nuhnkuh fuhlwact ke kol ke oacna sie u srihsrihk ke Alu luhn Leum (liye Doctrine and Covenants 121:34–37).

4.2.5

Srihsrngiyac Kunohkohn ac Liye Mwacta

Mwet Lahngo el sang nuh sin mwet tuhma lutlut Lal orekma na yohk srihpac ac ma kunaclos (liye Luke 10:1). El oacyacpac sang nuh selos mwacta ke orekma elos e oruh (liye Luke 9:10).

In mwet kol se, kom kuh in kahsruh mwet sahyac in kapwack ke kom sang kunohkohn nuh selos. Kampare oruh mempucr nuhkewa in wi oruh orekma luhn God.

Srihsrngiyac kahsruh oruh kuhlwacnsap lom oasr srihpac. Suk kolyuck luhn Nguhn ke ma kom enenuh in srihsrngi tuh kom in lohacng ke ma enenuh e meet.

4.2.6

Ahkolah Mwet Sahyac in Mwet Kol ac Mwet Luti

Fin nuhnkuh lah suc kuh in kuhlwacnsap ke Alu kuh orekma se, pruhe kac. Esam lah Leum elac ahokiyac mwet El pahngon. Ma se yohk srihpac emeet uh pa oasr kena se lalos in kuhlwacnsap, e puhsisacl in suk kahsruh luhn Leum, ac kampare in suwohs.

4.2.7

Plwacnelah Miting, Lesin, ac Mukwikwi ke ma Oasr Srihpac

Suk kahsruh luhn Nguhn ke plwacni miting, lesin, ac mukwikwi ma oasr srihpac. Srihpac inge enenuh in ahkkweye kais sie ac sucu, ahkfototoyaclos nuh yurin Kraist, ac kahsruh ahksahfyelah orekma in molwelah ac ma pahtpaht luhn God (liye sapta 1 ac 2).

4.2.8

Fohlohk Liye Oraclah Lom

Sifwilpacna liye kunohkohn lom ac kapwack in nguhn lom ke kom kol. Nuhnkuh pac kapwack luhn mwet kom kol an.

Oraclah wo lom ekihn mwet kol se srihkasrak uh ke insacnweacng lom in kahruh tuhlihk nuhtin God in mwet tuhma lutlut pwacye luhn Jisus Kraist. Kom kuh in etuh lah Leum el engankihn insacnweacng lom ke kom puhla Nguhn orekma in kom uh.

4.3

Kahs in Kahsruh ke Alu uh

Leum el luti mwet kol ke Alu Lal in tuhkweni oruh kahs in kahsruh in oruh orekma Lal (liye Doctrine and Covenants 41:2–3). Tuhkeni nuh sie eis kahs in kahsruh inkacnek se nuh sin mempucrs in eis fwackyuck ke elos suk in kahlwem ke enenuh luhn tuhlihk nuhtin God ac plwacnwelah lah elos e kahsrelos fuhkah.

4.4

Ip Yohk ke Kahs in Kahsruh Wowo

4.4.1

Srihpen Eis ac Sang Kahs in Kahsruh

Kahs in kahsruh sang inkacnek yohk srihpac in kahsruh mempucr eis akwuck ac karihngihn wuhlwelah elos oraclah.

4.4.2

Ahkolah nuh ke Miting in Tuhkeni Eis Kahsruh

Prestuhn ac mwet in kahsruh elos enenuh in kwacna ohsun. Mwet kol inge suk kolyuck sin Leum in plwacnelah miting in eis kahsruh. Elos oacyacpac suk kahsruh sin mempucrs in sang kuhtuh ma elos kuh in sruhmuhn.

Mwet kol enenuh in oraclah koanon miting sang mempucrs ke council etuh meet. Mempucrs ke u in eis ac sang kahsruh ahkolah in fahk nuhnak lalos ke elyah inge.

4.4.3

Ma Sruhmuhnyuck ac Ma Wotlac

Ke toeni in eis kuh sang kahsruh, mwet kol (kuh mwet se ma mwet kol srihsrngiyac) ahkuhtweyac elyah sac. Mwet kol sac fuhlwelac nuh ke sramsram sin mempucrs ma toeni ah, siyuck kihsensiyuck ac eis nuhnak.

Mempucrs elos fahk nuhnak ac porongo kais sie. Ke elos suk in etuh luhngse luhn Leum, nguhn in moklweyuck ac oracni kuh in sikyak.

Ke toeni in eis ac sang kahsruh ma oasr muhtwacn ac mukul kac, mwet kol sac suk nuhnak yurin kewana. Ma muhtwacn ac mukul uh akacsruhi uh tiacna oacna sie tuhsruhk oraclah ma fal se.

Mwet kol se kol sramsram ke toeni in eis ac sang kahsruh. Tuhsruhkuh, el enenuh in porongo yohk liki na el sramsram.

Tukun sramsram ingacn kewa, mwet kol se kuh in otwelah na ingena ma se kuh fihliyac nuh tok sulwaclah se elan sokwack in puhs information ac guidance.

4.4.4

Insese

Mempucrs ma toeni eis ac sang kahsruh suk in ma se fanna ke kena ac srihpac lalos nuh sin Pahpah Inkuhsrao ac Jisus Kraist. Elos kampare in insese ke ma elos sruhmuhn ac ma elos otwelah.

4.4.5

Ma Oreklac ac Mwacta

Mempucrs ke toeni in eis ac sang kahsruh oruh inkaiyen orekma lalos meet liki ac tukun toeni in eis ac sang kahsruh. Ke pacl se miting an fahsr, elos suk moklweyuck in katweack plwacn lalos in sang kahsruh ke ma e wotlac uh. Mwet kol se ke toeni in eis ac sang kahsruh suli mempucrs in ahksahfyelah orekma lalos ma sruhmuhnyuck ke plwacn inge.

Mempucrs ke toeni in eis ac sang kahsruh elos ripohrti orekma lalos. Kapwack kac uh enenuh in sifwil liyeyuck ac in sifwil orekma kac.

4.4.6

Ma Lukmac

Mwet kol elos oruh ma uh lukmac pacl se elos akacsruhi mwe ahkkahlwemye nuh sin u in eis ac sang kahsruh. Elos suk lwelah luhn mempucr in akacsruhi ke mwe ahkkahlwemye se inge.

Mempucrs ke u in eis ac sang kahsruh tiac lwelah in sruhmuhn mwe ahkkahlwemye inge nuh sin mwet sahyacn u se inge nekena oasr kunohkohn se tuhkuh yurin mwet kol ke council.

Kuhtuh ma sruhmuhnyuck inge kuh in arulacna upac in fwackyuck mwet nuhkewa ke u sacn lohng.