8.

Korama a Toeaina

8.1

Faamoemoega ma le Faatulagaga

8.1.1

Faamoemoega

O alii agavaa ua ta’i 18 ma matutua atu, e mafai ona mauaina le Perisitua Mekisateko ma faauuina i le tofi o le toeaina. O se alii e faauuina i lena tofi e ulu atu i se feagaiga paia e fesoasoani ai i le Atua i le faataunuuina o Lana galuega (tagai i le Mataupu Faavae ma Feagaiga 84:33–44).

8.1.2

O le avea ma tagata auai i le Korama a Toeaina

E tofu le uarota ma se korama a toeaina. E aofia ai uso nei:

• Toeaina uma i le uarota.

• Toeaina faaolioli uma i le uarota (tagai i le 8.4).

• O faitaulaga sili uma i le uarota, se’i vagana ai i latou o loo galulue nei i se au peresitene o le siteki, i se au epikopo, i fautua maualuga, po o se peteriaka.

E mafai e se alii talavou ona amata auai i fonotaga a le korama a toeaina pe a atoa lona 18, tusa lava foi pe le’i faauuina o se toeaina. E oo atu i le 19 tausaga pe o le a tuua foi le aiga, e pei o le alu i se iunivesite pe auauna atu i se misiona, e ao ona faauuina o ia o se toeaina pe afai o agavaa o ia.

O alii ua faaipoipo e i lalo o le 18, o ni toeaina faaolioli, ma o i latou foi o ni sui auai o le korama a toeaina.

8.2

Auai i le Faatinoina o le Galuega a le Atua mo le Faaolataga ma le Faaeaga

8.2.1

Ola i le Talalelei a Iesu Keriso

8.2.1.2

A’oa’oina o le Talalelei i Fonotaga a le Korama

O sauniga e faia i Aso Sa lona lua ma le lona fa o le masina. E 50 minute le umi. O le au peresitene o le korama a toeaina e fuafuaina nei fonotaga. O se tasi o le au peresitene e taitai.

E taulai fonotaga a le korama i autu mai se lauga se tasi pe sili atu foi mai le konafesi aoao aupito lata mai.

8.2.1.3

Gaoioiga

O au peresitene o korama a toeaina e mafai ona fuafuaina ia gaoioiga. O le tele o gaoioiga e faia i taimi e ese mai le Aso Sa po o afiafi o Aso Gafua.

8.2.2

Tausiga o i Latou e lē Tagolima

8.2.2.1

Auaunaga

E maua e sui auai o le korama a toeaina ia tofitofiga o auaunaga mai le au peresitene o le korama. Mo nisi faamatalaga, tagai i le mataupu 21.

8.2.2.2

Manaoga mo se Taimi-Puupuu

O uso o auaunaga e saili ia malamalama ma tali atu i manaoga o e latou te auauna i ai. E ono manaomia e tagata se fesoasoani mo se taimi puupuu, i le taimi o ma’i, pepe fou e fanau mai, maliu, leai o ni galuega, ma isi tulaga.

Pe a oo ina manaomia, e fesili atu uso o auaunaga i le au peresitene o korama a toeaina mo se fesoasoani.

8.2.2.3

Manaoga mo se Taimi Umi ma le Ola-Tutoatasi

E pei ona faamaopoopoina ai e le epikopo, e fesoasoani au peresitene o le korama a toeaina ma le Aualofa i tagata o le au paia o loo i ai ni manaoga mo se taimi umi ma le ola-tutoatasi.

O le peresitene o le korama a toeaina, peresitene o le Aualofa, po o se isi taitai e fesoasoani i le tagata po o le aiga e atia’e se Fuafuaga mo le Ola-Tutoatasi. E mafai foi ona fesoasoani uso po o tuafafine o auaunaga i le fuafuaga.

8.2.2.4

Pe A Maliu se Tagata o le Uarota

Pe a maliu se tagata o le uarota, o au peresitene o le korama a toeaina ma le Aualofa e ofoina atu le faamafanafanaga ma le lagolago. I lalo o le taitaiga a le epikopo, e mafai ona latou fesoasoani i le falelauasiga.

Mo nisi faamatalaga, tagai i le 38.5.8

8.2.3

Valaaulia Tagata Uma e Talia le Talalelei

O le peresitene o le korama a toeaina e tofia se tasi o le au peresitene e fesoasoani e taitai le galuega faafaifeautalai a le au paia i le uarota. E galulue faatasi o ia ma le sui ua tofia o le au peresitene o le Aualofa e faamaopoopo nei taumafaiga.

Tagai i le 23.5.1ma le 23.5.3

8.2.4

Tuufaatasia o Aiga mo le Faavavau

E tofi e le peresitene o le korama a toeaina se tasi o le au peresitene e fesoasoani e taitai le galuega faalemalumalu ma talafaasolopito o aiga i le uarota. E galulue faatasi o ia ma le sui ua tofia o le au peresitene o le Aualofa e faamaopoopo nei taumafaiga.

Tagai i le 25.2.2

8.3

Taitai o le Korama a Toeaina

8.3.1

Au Peresitene o le Siteki ma le Epikopo

O le peresitene o le korama a toeaina e tali tuusa’o atu i le au peresitene o le siteki. E fono e le aunoa o ia ma se sui o le au peresitene e maua mai ai faatonuga ma lipoti atu i ona tiutetauave.

E maua foi e le peresitene o le korama a toeaina le taitaiga mai le epikopo, o le taitai pulefaamalumalu i le uarota. La te fono e le aunoa.

8.3.2

Fautua Maualuga

E tofia e le au peresitene o le siteki se fautua maualuga e avea ma sui o i latou i korama taitasi a toeaina. O ona tiutetauave o loo otooto atu i le 6.5.

8.3.3

Au Peresitene o le Korama a Toeaina

8.3.3.1

Valaauina o se Au Peresitene o le Korama a Toeaina

A maea ona feutagai ma le epikopo, e valaauina e le peresitene o le siteki se toeaina po o se faitaulaga sili e avea ma peresitene o le korama a toeaina.

Afai e lava le telē o le iunite, e fautuaina atu e le peresitene o le korama a toeaina i le peresitene o le siteki se toeaina se toatasi pe toalua po o ni faitaulaga sili e avea ma ona fesoasoani.

8.3.3.2

Tiutetauave

Ua i ai i le peresitene o le korama a toeaina tiutetauave nei. E lagolago atu ona fesoasoani ia te ia.

• Auauna atu i le aufono a le uarota.

• Taitaia taumafaiga a le korama e auai i le faatinoga o le galuega o le faaolataga ma le faaeaga (tagai i le mataupu 1).

• Faatulaga ma vaavaaia le galuega a uso o auaunaga.

• I lalo o le taitaiga a le epikopo, ia fefautuaai ma tagata matutua o le uarota.

• E faamaopoopoa taumafaiga a le korama a toeaina e faamalolosia uso talavou matutua, o ē nofofua ma ē ua faaipoipo.

• E feiloai taitoatasi ma uso o le korama ia le itiiti ifo ma le tasi i le tausaga.

• A’oa’o uso o le korama i o latou tiute o le perisitua (tagai i le Mataupu Faavae ma Feagaiga 107:89). E aofia ai i lenei mea le a’oa’o atu o i latou pe faapefea ona faaaoga o latou perisitua i le faatinoina o sauniga ma faamanuiaga.

• Vaavaaia ia faamaumauga, lipoti, ma mea tautupe (tagai i le LCR.ChurchofJesusChrist.org

8.3.3.3

Fonotaga a le Au Peresitene

E fono e le aunoa le au peresitene o le korama a toeaina ma le failautusi. O le peresitene e faatautaia nei fonotaga. O le fautua maualuga ua tofia i le korama e auai mai i lea taimi i lea taimi.

O le lisi o mataupu e talanoaina e mafai ona aofia ai aitema nei:

• Fuafua ni auala e faamalolosia ai tagata o le korama (e aofia ai toeaina faaolioli) ma o latou aiga.

• Faamaopoopo le galuega faafaifeautalai ma le galuega mo malumalu ma talafaasolopito o aiga.

• Tali atu i tofitofiga mai fonotaga a le aufono a le uarota.

• Iloilo faamatalaga mai faatalanoaga o auaunaga.

• Mafaufau i ni uso e galulue i valaauga ma tofitofiga.

• Fuafua ia fonotaga ma gaoioiga a le korama.

8.3.4

Failautusi

Faatasi ai ma le faamaoniga a le epikopo, e mafai e se tasi o le au peresitene o le korama a toeaina ona valaau se uso o le korama e avea ma failautusi a le korama.

8.4

Fesoasoani i Toeaina Faaolioli e Sauniuni mo le Mauaina o le Perisitua Mekisateko

O se toeaina faaolioli, o se tamatane e auai i le Ekalesia, e le’i mauaina le Perisitua Mekisateko ma (1) ua 19 tausaga pe matua atu pe (2) e i lalo ifo o le 19 tausaga ma ua faaipoipo.

O le fesoasoani i toeaina faaolioli e sauniuni mo le mauaina o le Perisitua Mekisateko, o se tasi lea o faamuamua aupito maualuga a le au peresitene o le korama.