“9. ສະມາຄົມສະຕີສົງເຄາະ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“9. ສະມາຄົມສະຕີສົງເຄາະ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
9.
ສະມາຄົມສະຕີສົງເຄາະ
9.1
ຈຸດປະສົງ ແລະ ອົງການ
9.1.1
ຈຸດປະສົງ
ສາດສະດາໂຈເຊັບ ສະມິດ ໄດ້ສິດສອນວ່າ ຈຸດປະສົງຂອງສະມາຄົມສະຕີສົງເຄາະຄືການຊ່ວຍກູ້ຈິດວິນຍານ ແລະ ບັນເທົາຄວາມທຸກທໍລະມານ.
ຄຳຂວັນຂອງສະມາຄົມສະຕີສົງເຄາະຄື “[ຄວາມໃຈບຸນ] ຍັງຈະຕັ້ງໝັ້ນຄົງຢູ່ຕະຫລອດໄປ” (1 ໂກຣິນໂທ 13:8).
9.1.2
ສະມາຊິກກະພາບໃນສະມາຄົມສະຕີສົງເຄາະ
ຍິງໜຸ່ມສາມາດເລີ່ມໄປຮ່ວມສະມາຄົມສະຕີສົງເຄາະເມື່ອເຂົາມີອາຍຸຄົບ 18 ປີ. ເມື່ອມີອາຍຸ 19 ປີ ຫລື ເມື່ອໄດ້ຍ້າຍອອກຈາກເຮືອນ, ດັ່ງເຊັ່ນການໄປຮຽນມະຫາວິທະຍາໄລ ຫລື ການຮັບໃຊ້ເຜີຍແຜ່, ເຂົາຄວນມີສ່ວນຮ່ວມໃນສະມາຄົມສະຕີສົງເຄາະ.
ຜູ້ຍິງອາຍຸນ້ອຍກວ່າ 18 ປີທີ່ແຕ່ງງານແລ້ວກໍເປັນສະມາຊິກໃນສະມາຄົມສະຕີສົງເຄາະເຊັ່ນກັນ.
9.2
ການມີສ່ວນຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ
9.2.1
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ
9.2.1.2
ການຮຽນຮູ້ພຣະກິດຕິຄຸນໃນການປະຊຸມສະມາຄົມສະຕີສົງເຄາະ
ການປະຊຸມຖືກຈັດຂຶ້ນໃນວັນອາທິດທີສອງ ແລະ ທີສີ່ຂອງເດືອນ. ມັນໃຊ້ເວລາ 50 ນາທີ. ຝ່າຍປະທານສະມາຄົມສະຕີສົງເຄາະວາງແຜນການປະຊຸມເຫລົ່ານີ້. ສະມາຊິກຄົນໜຶ່ງໃນຝ່າຍປະທານດຳເນີນການປະຊຸມ.
ການປະຊຸມສະມາຄົມສະຕີສົງເຄາະສຸມໃສ່ຫົວຂໍ້ໃນຄຳປາໄສຂອງກອງປະຊຸມໃຫຍ່ສາມັນຄັ້ງລ່າສຸດ ໜຶ່ງເລື່ອງ ຫລື ຫລາຍກວ່ານັ້ນ.
9.2.1.3
ກິດຈະກຳ
ຝ່າຍປະທານສະມາຄົມສະຕີສົງເຄາະອາດວາງແຜນກິດຈະກຳ. ກິດຈະກຳສ່ວນຫລາຍຖືກຈັດຂຶ້ນໃນເວລາທີ່ນອກເໜືອໄປຈາກແລງວັນອາທິດ ຫລື ແລງວັນຈັນ.
9.2.2
ການດູແລຄົນຂັດສົນ
9.2.2.1
ການປະຕິບັດສາດສະໜາກິດ
ເອື້ອຍນ້ອງຮັບວຽກງານການປະຕິບັດສາດສະໜາກິດຈາກຝ່າຍປະທານສະມາຄົມສະຕີສົງເຄາະ. ສຳລັບຂໍ້ມູນເພີ່ມເຕີມ, ໃຫ້ເບິ່ງ ບົດທີ 21.
9.2.2.2
ຄວາມຕ້ອງການໄລຍະສັ້ນ
ເອື້ອຍນ້ອງຜູ້ປະຕິບັດສາດສະໜາກິດສະແຫວງຫາຄວາມເຂົ້າໃຈ ແລະ ສະໜອງຄວາມຕ້ອງການຂອງຜູ້ທີ່ເຂົາເຈົ້າຮັບໃຊ້. ສະມາຊິກອາດຕ້ອງການຄວາມຊ່ວຍເຫລືອໄລຍະສັ້ນໃນເວລາມີຄວາມເຈັບປ່ວຍ, ການເກີດ, ການຕາຍ, ຕົກງານ, ແລະ ໃນສະຖານະການອື່ນໆ.
ເມື່ອຕ້ອງການ, ເອື້ອຍນ້ອງຜູ້ປະຕິບັດສາດສະໜາກິດຈະຂໍໃຫ້ຝ່າຍປະທານສະມາຄົມສະຕີສົງເຄາະຊ່ວຍເຫລືອ.
9.2.2.3
ຄວາມຕ້ອງການໄລຍະຍາວ ແລະ ການກຸ້ມຕົນເອງ
ຕາມທີ່ປະສານງານໂດຍອະທິການ, ຝ່າຍປະທານສະມາຄົມສະຕີສົງເຄາະ ແລະ ຝ່າຍປະທານກຸ່ມແອວເດີຈະຊ່ວຍເຫລືອສະມາຊິກເລື່ອງຄວາມຕ້ອງການໄລຍະຍາວ ແລະ ການກຸ້ມຕົນເອງ.
ປະທານສະມາຄົມສະຕີສົງເຄາະ, ປະທານກຸ່ມແອວເດີ, ຫລື ຜູ້ນຳຄົນອື່ນຈະຊ່ວຍບຸກຄົນ ຫລື ຄອບຄົວພັດທະນາ ແຜນການກຸ້ມຕົນເອງ.
9.2.2.4
ເມື່ອສະມາຊິກຫວອດເສຍຊີວິດ
ເມື່ອສະມາຊິກຫວອດເສຍຊີວິດ, ຝ່າຍປະທານສະມາຄົມສະຕີສົງເຄາະ ແລະ ຝ່າຍປະທານກຸ່ມແອວເດີໃຫ້ການປອບໂຍນ ແລະ ຊ່ວຍເຫລືອ. ພາຍໃຕ້ການນຳພາຂອງອະທິການ, ເຂົາເຈົ້າສາມາດຊ່ວຍໃນພິທີສົ່ງສະການ.
ສຳລັບຂໍ້ມູນເພີ່ມເຕີມ, ໃຫ້ເບິ່ງ 38.5.8.
9.2.3
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
ປະທານສະມາຄົມສະຕີສົງເຄາະ ມອບໝາຍຄົນໜຶ່ງໃນຝ່າຍປະທານໃຫ້ຊ່ວຍນຳພາວຽກງານເຜີຍແຜ່ຂອງສະມາຊິກໃນຫວອດ. ລາວເຮັດວຽກງານຮ່ວມກັບສະມາຊິກໃນຝ່າຍປະທານກຸ່ມແອວເດີທີ່ຖືກມອບໝາຍ ເພື່ອປະສານວຽກງານເຫລົ່ານີ້ (ເບິ່ງ 23.5.1).
9.2.4
ການເຕົ້າໂຮມຄອບຄົວເຂົ້າກັນຊົ່ວນິລັນດອນ
ປະທານສະມາຄົມສະຕີສົງເຄາະມອບໝາຍສະມາຊິກຄົນໜຶ່ງໃນຝ່າຍປະທານເພື່ອຊ່ວຍນຳພາວຽກງານພຣະວິຫານ ແລະ ປະຫວັດຄອບຄົວ ຢູ່ໃນຫວອດ. ລາວເຮັດວຽກງານຮ່ວມກັບສະມາຊິກໃນຝ່າຍປະທານກຸ່ມແອວເດີທີ່ຖືກມອບໝາຍ ເພື່ອປະສານວຽກງານເຫລົ່ານີ້ (ເບິ່ງ 25.2.2).
9.3
ຜູ້ນຳສະມາຄົມສະຕີສົງເຄາະ
9.3.1
ອະທິການ
ຕາມປົກກະຕິແລ້ວ ອະທິການພົບກັບປະທານສະມາຄົມສະຕີສົງເຄາະເດືອນລະຄັ້ງ. ພວກເພິ່ນສົນທະນາວຽກງານແຫ່ງຄວາມລອດ ແລະ ຄວາມສູງສົ່ງ, ລວມທັງການຮັບໃຊ້ຂອງເອື້ອຍນ້ອງຜູ້ປະຕິບັດສາດສະໜາກິດ.
9.3.2
ຝ່າຍປະທານສະມາຄົມສະຕີສົງເຄາະ
9.3.2.1
ການເອີ້ນຝ່າຍປະທານສະມາຄົມສະຕີສົງເຄາະ
ອະທິການເອີ້ນຜູ້ຍິງຄົນໜຶ່ງໃຫ້ຮັບໃຊ້ເປັນປະທານສະມາຄົມສະຕີສົງເຄາະໃນຫວອດ. ຖ້າຫາກໜ່ວຍສາດສະໜາຈັກໃຫຍ່ພໍ, ລາວຈະແນະນຳຊື່ຜູ້ຍິງ ໜຶ່ງ ຫລື ສອງຄົນຕໍ່ເພິ່ນ ເພື່ອຮັບໃຊ້ເປັນທີ່ປຶກສາຂອງລາວ.
ໜ່ວຍສາດສະໜາຈັກບາງໜ່ວຍທີ່ນ້ອຍ ອາດບໍ່ມີປະທານອົງການຍິງໜຸ່ມ ຫລື ປະທານອົງການປະຖົມໄວ. ໃນກໍລະນີເຫລົ່ານີ້, ປະທານສະມາຄົມສະຕີສົງເຄາະອາດຊ່ວຍຜູ້ເປັນພໍ່ແມ່ວາງແຜນບົດຮຽນສຳລັບຊາວໜຸ່ມ ແລະ ເດັກນ້ອຍ.
9.3.2.2
ໜ້າທີ່ຮັບຜິດຊອບ
ປະທານສະມາຄົມສະຕີສົງເຄາະມີໜ້າທີ່ຮັບຜິດຊອບດັ່ງຕໍ່ໄປນີ້. ທີ່ປຶກສາຂອງລາວຊ່ວຍເຫລືອລາວ.
-
ຮັບໃຊ້ໃນສະພາຫວອດ.
-
ນຳພາຄວາມພະຍາຍາມຂອງສະມາຄົມສະຕີສົງເຄາະເພື່ອເຂົ້າຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ (ເບິ່ງ ບົດທີ 1).
-
ຈັດລະບຽບ ແລະ ດູແລການຮັບໃຊ້ຂອງເອື້ອຍນ້ອງຜູ້ປະຕິບັດສາດສະໜາກິດ.
-
ພາຍໃຕ້ການນຳພາຂອງອະທິການ, ຈະປຶກສາກັບສະມາຊິກຜູ້ໃຫຍ່ໃນຫວອດ.
-
ປະສານຄວາມພະຍາຍາມຂອງສະມາຄົມສະຕີສົງເຄາະເພື່ອເພີ່ມຄວາມເຂັ້ມແຂງໃຫ້ແກ່ເອື້ອຍນ້ອງຜູ້ໃຫຍ່ໜຸ່ມ, ທັງເປັນໂສດ ແລະ ແຕ່ງງານແລ້ວ.
-
ພົບກັບສະມາຊິກຂອງສະມາຄົມສະຕີສົງເຄາະແຕ່ລະຄົນເປັນສ່ວນຕົວ ຢ່າງໜ້ອຍປີລະເທື່ອ.
-
ດູແລບັນທຶກສະມາຄົມສະຕີສົງເຄາະ, ລາຍງານ, ແລະ ການເງິນ (ເບິ່ງ LCR.ChurchofJesusChrist.org).
9.3.2.3
ການປະຊຸມຝ່າຍປະທານ
ຝ່າຍປະທານສະມາຄົມສະຕີສົງເຄາະ ແລະ ເລຂານຸການພົບກັນເປັນປະຈຳ. ປະທານດຳເນີນການປະຊຸມເຫລົ່ານີ້. ວາລະສາມາດລວມທັງລາຍການດັ່ງຕໍ່ໄປນີ້:
-
ວາງແຜນເພີ່ມຄວາມເຂັ້ມແຂງໃຫ້ແກ່ເອື້ອຍນ້ອງ ແລະ ຄອບຄົວຂອງເຂົາເຈົ້າ.
-
ປະສານວຽກງານເຜີຍແຜ່ ແລະ ວຽກງານພຣະວິຫານ ແລະ ປະຫວັດຄອບຄົວ.
-
ຕອບຮັບການມອບໝາຍຈາກການປະຊຸມສະພາຫວອດ.
-
ທົບທວນຂໍ້ມູນຈາກການສຳພາດການປະຕິບັດສາດສະໜາກິດ.
-
ພິຈາລະນາບັນດາເອື້ອຍນ້ອງເພື່ອຮັບໃຊ້ໃນການເອີ້ນ ແລະ ການມອບໝາຍໃນສະມາຄົມສະຕີສົງເຄາະ.
-
ວາງແຜນການປະຊຸມ ແລະ ກິດຈະກຳຂອງສະມາຄົມສະຕີສົງເຄາະ.
9.3.3
ເລຂານຸການ
ຝ່າຍປະທານສະມາຄົມສະຕີສົງເຄາະອາດແນະນຳເອື້ອຍນ້ອງຄົນໜຶ່ງໃຫ້ຮັບໃຊ້ເປັນເລຂານຸການຂອງສະມາຄົມສະຕີສົງເຄາະ.
9.4
ການຊ່ວຍຍິງໜຸ່ມກຽມພ້ອມທີ່ຈະເຂົ້າຮ່ວມສະມາຄົມສະຕີສົງເຄາະ
ຝ່າຍປະທານສະມາຄົມສະຕີສົງເຄາະເຮັດວຽກງານຮ່ວມກັບຍິງໜຸ່ມ, ພໍ່ແມ່ຂອງເຂົາ, ແລະ ຜູ້ນຳຍິງໜຸ່ມ ເພື່ອຊ່ວຍຍິງໜຸ່ມກຽມພ້ອມທີ່ຈະເຂົ້າຮ່ວມສະມາຄົມສະຕີສົງເຄາະ.
ຜູ້ນຳກໍຍັງຈັດກຽມໂອກາດຢ່າງຕໍ່ເນື່ອງສຳລັບຍິງໜຸ່ມ ແລະ ເອື້ອຍນ້ອງສະມາຄົມສະຕີສົງເຄາະເພື່ອພັດທະນາຄວາມສຳພັນນຳອີກ. ການຮັບໃຊ້ນຳກັນເປັນເອື້ອຍນ້ອງຜູ້ປະຕິບັດສາດສະໜາກິດເປັນວິທີໜຶ່ງທີ່ມີຄ່າໃນການຜູກພັນ.
9.6
ແນວທາງຊີ້ນຳ ແລະ ນະໂຍບາຍເພີ່ມເຕີມ
9.6.2
ການຮູ້ໜັງສື
ຖ້າຈຳເປັນ, ຝ່າຍປະທານສະມາຄົມສະຕີສົງເຄາະຈະເຮັດວຽກງານຮ່ວມກັບອະທິການ, ຝ່າຍປະທານກຸ່ມແອວເດີ, ແລະ ສະພາຫວອດ ເພື່ອຊ່ວຍໃຫ້ສະມາຊິກຮຽນຂຽນອ່ານ.