9.

Komonil re Tenq’ank

9.1

K’a’ru rajb’al, ut chan ru naq k’uub’anb’il

9.1.1

K’a’ru rajb’al

Li profeet aj Jose Smith kixk’ut naq li rajb’al li Komonil re Tenq’ank a’an xkolb’aleb’ li aamej ut xk’osb’al li rahilal.

Li jolomil aatin re li Komonil re Tenq’ank a’an “Li rahok maajo’q’e na’oso’” (1 Korintios 13:8).

9.1.2

Li wank choq’ komon sa’ li Komonil re Tenq’ank

Jun saaj ixq naru na’ok chi tz’aqonk sa’eb’ li ch’utam re li Komonil re Tenq’ank naq ak wan 18 chihab’ re. Naq ak wan 19 chihab’ re malaj naq na’el chaq sa’ rochoch, jo’ re xik sa’ li universidad malaj re xik sa’ jun li mision, tento taatz’aqonq sa’ li Komonil re Tenq’ank.

Eb’ li ixq li maji’ wan 18 chihab’ reheb’ a’ut sumsuukeb’ wanqeb’ sa’ li Komonil re Tenq’ank.

9.2

Li tz’aqonk sa’ li k’anjel re li kolb’a-ib’ ut li taqenaqil loq’al

9.2.1

Xyu’aminkil lix evangelio li Jesukristo

9.2.1.2

Xtzolb’al li evangelio sa’eb’ li ch’utam re li Komonil re Tenq’ank

Neke’b’aanuman li ch’utam sa’ li xkab’ ut li xkaa domingo chiru li jun po. Neke’wan chiru 50 k’asal. Li awa’b’ejil re li Komonil re Tenq’ank neke’xkawresi li ch’utam a’in. Jun komon sa’ li awa’b’ejil nak’amok b’e.

Sa’eb’ li ch’utam re li Komonil re Tenq’ank, neke’tzolok chirix jun malaj numenaq jun li aatin li xyeeman sa’ li jolomil ch’utub’aj-ib’ li toje’ xnume’.

9.2.1.3

Eb’ li kok’ k’anjel

Li awa’b’ejil re li Komonil re Tenq’ank naru neke’xk’uub’eb’ li kok’ k’anjel. Lix k’ihaleb’ li kok’ k’anjel a’in ink’a’ neke’b’aanuman sa’ li domingo, chi moko sa’ lunes ewu.

9.2.2

Xtenq’ankileb’ li wankeb’ rajom ru

9.2.2.1

Li ilok komon

Eb’ li ixq neke’k’ehe’ xtaqlankileb’ jo’ aj ilol komon xb’aan li awa’b’ej re li Komonil re Tenq’ank. Re xtawb’al xkomon chik li na’leb’, chi’ilmanq ch’ol 21.

9.2.2.2

Li k’a’ru ajb’il ru chiru jarub’aq kutan

Eb’ li ixq aj ilol komon neke’xsik’ xnawb’al k’a’ru rajomeb’ ru li ani neke’k’anjelak wi’, ut xtenq’ankileb’ rik’in a’an. Wan naq eb’ li komon te’wanq rajomeb’ ru chiru jarub’aq kutan, jo’ naq nawan li yajel, li yo’laak, li kamk, xsachik li trab’aaj, ut xkomon chik li k’a’ru nak’ulman.

Naq ajb’il ru, eb’ li ixq aj ilol komon neke’xpatz’ xtenq’ankileb’ rik’in li awa’b’ejil re li Komonil re Tenq’ank.

9.2.2.3

Li ajb’il ru chiru naab’al kutan, ut li tenq’ank-ib’ xjunes

Chi b’eresinb’il xb’aan li obiisp, eb’ li awa’b’ejil re li Komonil re Tenq’ank ut lix molameb’ li xb’eenil neke’xtenq’aheb’ li komon rik’in li k’a’ru ajb’il ru xb’aaneb’ chiru naab’al kutan, ut rik’in li tenq’ank-ib’ xjuneseb’.

Li awa’b’ej re li Komonil re Tenq’ank, re lix molameb’ li xb’eenil, malaj jalan chik aj jolominel naxtenq’a li komon malaj li junkab’al chixtikib’ankil jun k’uub’anb’il na’leb’ re xtenq’ankil rib’ xjunes.

9.2.2.4

Naq nakam jun komon sa’ li teep

Naq nakam jun komon sa’ li teep, eb’ li awa’b’ejil re li Komonil re Tenq’ank ut re lix molameb’ li xb’eenil neke’k’ojob’an ch’oolej ut neke’xyeechi’i li tenq’ank. Chi b’eresinb’il xb’aan li obiisp, naru neke’tenq’an rik’in li muquk.

Re xtawb’al xkomon chik li na’leb’, chi’ilmanq 38.5.8.

9.2.3

Xb’oqb’aleb’ chixjunil chixk’ulb’al li evangelio

Li awa’b’ej re li Komonil re Tenq’ank naxk’e xtaqlankil jun komon sa’ li awa’b’ejil re taatenq’anq chixb’eresinkil li k’anjel re xjultikankil li evangelio sa’ li teep. A’an nak’anjelak rochb’een li ani k’eeb’il xtaqlankil sa’ li awa’b’ejil re lix molameb’ li xb’eenil, re te’xk’uub’ li k’anjel a’in sa’ komonil (chi’ilmanq 23.5.1).

9.2.4

Xk’amb’aleb’ li junkab’al sa’ junajil sa’ li junelik q’e kutan

Li awa’b’ej re li Komonil re Tenq’ank naxk’e xtaqlankil jun komon sa’ li awa’b’ejil re taatenq’anq chixb’eresinkil li k’anjel re li santil ochoch ut resilal li junkab’al sa’ li teep. A’an nak’anjelak rochb’een li ani k’eeb’il xtaqlankil sa’ li awa’b’ejil re lix molameb’ li xb’eenil, re te’xk’uub’ sa’ komonil li k’anjel a’in (chi’ilmanq 25.2.2).

9.3

Eb’ laj jolominel sa’ li Komonil re Tenq’ank

9.3.1

Li obiisp

Li obiisp nach’utla rajlal po rik’in li awa’b’ej re li Komonil re Tenq’ank. Eb’ a’an neke’aatinak chirix li k’anjel re li kolb’a-ib’ ut li taqenaqil loq’al, sa’ li wan wi’ lix k’anjeleb’ li ixq aj ilol komon.

9.3.2

Li awa’b’ejil re li Komonil re Tenq’ank

9.3.2.1

Chan ru neke’b’oqman li awa’b’ejil re li Komonil re Tenq’ank

Li obiisp naxb’oq jun ixq re taak’anjelaq jo’ awa’b’ej re li Komonil re Tenq’ank sa’ li teep. Wi nim b’ayaq li teep, li ani xb’oqe’ naxk’e xk’ab’a’ jun malaj wiib’ chik ixq re te’k’anjelaq choq’ laj tenq’ aj k’ehol na’leb’.

Sa’ junjunqeb’ li teep yal ka’ch’ineb’, maare maak’a’aq jun awa’b’ej reheb’ li Saaj Ixq malaj re li Tzoleb’aal reheb’ li Kok’al. Sa’eb’ li teep a’an, li awa’b’ej re li Komonil re Tenq’ank naru naxtenq’aheb’ li na’b’ej yuwa’b’ej chixk’uub’ankil chan ru xtzolb’aleb’ li saaj ut eb’ li kok’al.

9.3.2.2

Eb’ lix teneb’ankil

A’aneb’ a’in lix teneb’ankil li awa’b’ej re li Komonil re Tenq’ank. Eb’ laj tenq’ aj k’ehol na’leb’ neke’xtenq’a.

• Wan sa’ li ch’uut re teep.

• Naxjolomi li Komonil re Tenq’ank sa’ xb’aanunkil li k’anjel re li kolb’a-ib’ ut li taqenaqil loq’al (chi’ilmanq ch’ol 1).

• Naxk’uub’ ut naxjolomi lix k’anjeleb’ li ixq aj ilol komon.

• Chi b’eresinb’il xb’aan li obiisp, naxk’uub’ xna’leb’ rik’ineb’ li komon sa’ li teep ak ninqeb’.

• Naxb’eresi lix k’anjel li Komonil re Tenq’ank re xk’eeb’al xkawilaleb’ li ixq sa’ li teep toj saajeb’, li maji’ neke’sumla jo’ ajwi’ li ak sumsuukeb’.

• Nach’utla rik’in li junjunq chi ixq sa’ li Komonil re Tenq’ank sa’ junesal jun sut chiru li jun chihab’, malaj chi kok’ aj chik xsa’.

• Naxb’eresi li tz’iib’ank hu, li taqlanb’il esil, ut li tumin re li Komonil re Tenq’ank (chi’ilmanq LCR.ChurchofJesusChrist.org).

9.3.2.3

Li ch’utam re li awa’b’ejil

Li awa’b’ejil re li Komonil re Tenq’ank ut laj tz’iib’anel neke’ch’utla chi kok’ aj xsa’. Li awa’b’ej naxb’eresiheb’ li ch’utam a’in. Sa’ li ch’utam a’in, naru neke’aatinak chirix li na’leb’ a’in:

• Xk’uub’ankil chan ru xk’eeb’al xkawilaleb’ li komon ixq ut eb’ lix junkab’aleb’.

• Xb’eresinkil li k’anjel re xjultikankil li evangelio ut li k’anjel re li santil ochoch ut resilal li junkab’al.

• Xb’aanunkil lix taqlankil li k’eeb’il reheb’ sa’ li ch’uut re teep.

• Xk’eeb’al reetal li k’a’ru xyeeman sa’eb’ li tz’ilok-ix reheb’ laj ilol komon.

• Xk’oxlankil ani reheb’ li ixq te’k’ehe’q xb’oqb’al malaj xtaqlankileb’ sa’ li Komonil re Tenq’ank.

• Xkawresinkileb’ li ch’utam ut li kok’ k’anjel re li Komonil re Tenq’ank.

9.3.3

Laj tz’iib’anel

Li awa’b’ejil re li Komonil re Tenq’ank naru neke’xk’e xk’ab’a’ jun ixq re taak’anjelaq jo’ aj tz’iib’anel sa’ li Komonil re Tenq’ank.

9.4

Xtenq’ankileb’ li saaj ixq chixkawresinkil rib’ re te’tz’aqonq sa’ li Komonil re Tenq’ank

Li awa’b’ejil re li Komonil re Tenq’ank nak’anjelak sa’ komonil rik’ineb’ li saaj ixq, rik’ineb’ lix na’ xyuwa’, ut rik’ineb’ laj jolominel sa’ xb’eeneb’ li Saaj Ixq re xtenq’ankileb’ li saaj ixq re te’tz’aqonq moqon sa’ li Komonil re Tenq’ank.

Eb’ laj jolominel neke’xk’uub’ ajwi’ chan ru naq eb’ li saaj ixq ut eb’ li ixq sa’ li Komonil re Tenq’ank taaruuq te’xk’am rib’ sa’ komonil. Li k’anjelak sa’ wiib’al jo’ ixq aj ilol komon naru nak’anjelak re te’ok sa’ komonil.

9.6

Xkomon chik li b’eresink ut li chaq’rab’ink

9.6.2

Li ilok ru hu

Wi na’ajman ru, li awa’b’ejil re li Komonil re Tenq’ank nak’anjelak rochb’een li obiisp, li awa’b’ejil re lix molameb’ li xb’eenil, ut li ch’uut re teep, re xtenq’ankileb’ li komon re te’xtzol li ilok ru hu ut li tz’iib’ak.