12.

Li Tzoleb’aal reheb’ li Kok’al

12.1

K’a’ru rajb’al, ut chan ru naq k’uub’anb’il

Li Tzoleb’aal reheb’ li Kok’al a’an jun molam li jayalinb’il sa’ li ochoch ut tenq’anb’il xb’aan li Iglees. A’an choq’ reheb’ li kok’al li ak xe’xket 18 po, toj li wankeb’ 11 chihab’ re.

12.1.1

K’a’ru rajb’al

Li Tzoleb’aal reheb’ li Kok’al naxtenq’aheb’ li kok’al:

• Re te’reek’a naq raab’ileb’ xb’aan lix Choxahil Yuwa’, ut re te’tzoloq chirix lix k’uub’anb’il na’leb’ re sahil ch’oolejil.

• Re te’tzoloq chirix li Jesukristo, ut lix k’anjel a’an sa’ lix k’uub’anb’il na’leb’ li qaChoxahil Yuwa’.

• Re te’xtzol ut te’xyu’ami lix evangelio li Jesukristo.

• Re te’reek’a, te’xk’e reetal, ut te’xb’aanu li k’a’ru yeeb’il xb’aan li Santil Musiq’ej.

• Re te’xkawresi rib’ choq’ reheb’ li santil sumwank, ut re te’xb’aanuheb’ ut te’xpaab’eb’ li sumwank a’an.

• Re te’tz’aqonq sa’ li k’anjel re li kolb’a-ib’ ut li taqenaqil loq’al.

12.1.3

Eb’ li tzoleb’aal

Naq k’iheb’ li kok’al, neke’k’ehe’ sa’eb’ li tzoleb’aal a’ yaal jo’ lix chihab’eb’.

Eb’ li kok’al neke’el chaq sa’ li Tzoleb’aal reheb’ li Kok’al ut neke’ok sa’ li Saaj Ixq malaj li molam reheb’ laj tenq’anel sa’ li enero re li chihab’ te’xket wi’ 12 chihab’.

12.1.4

Li hoonal re b’ichank

Li hoonal re b’ichank naxtenq’aheb’ li kok’al chireek’ankil lix rahom lix Choxahil Yuwa’, ut chi tzolok chirix lix k’uub’anb’il na’leb’ re sahil ch’oolejil. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxk’e chixnaweb’ naq yaaleb’ li na’leb’ a’an.

Li awa’b’ejil re li Tzoleb’aal reheb’ li Kok’al ut laj b’eresinel b’ich neke’xsik’eb’ ru li b’ich choq’ re li junjunq chi po re xk’eeb’al xkawilal li na’leb’ chirix li evangelio li yookeb’ chixtzolb’al li kok’al sa’eb’ lix tzoleb’aal ut sa’ li ochoch.

12.1.5

Li na’ajej choq’ reheb’ li toj kok’eb’

Li na’ajej choq’ reheb’ li toj kok’eb’ naxtenq’aheb’ li kok’al li ak xe’xket 18 po toj li wankeb’ 3 chihab’ re, re te’reek’a lix rahom lix Choxahil Yuwa’, ut te’tzoloq chirix lix k’uub’anb’il na’leb’ re sahil ch’oolejil.

12.2

Li tz’aqonk sa’ li k’anjel re li kolb’a-ib’ ut li taqenaqil loq’al

12.2.1

Xyu’aminkil lix evangelio li Jesukristo

12.2.1.2

Xtzolb’al li evangelio

Eb’ li ch’utam re domingo sa’ li Tzoleb’aal reheb’ li Kok’al. Jun komon sa’ li awa’b’ejil re li Tzoleb’aal reheb’ li Kok’al nak’amok b’e re xtikib’ankil li ch’utam.

A’an a’in xtusulal li ch’utam:

Xraqal li ch’utam	Xnajtil
Xraqal li ch’utam Xtiklajik (tij, jun raqal sa’eb’ li loq’laj hu malaj jun xraqalil li paab’aal, jun discurso—chixjunil b’aanunb’il xb’aaneb’ li kok’al)	Xnajtil 5 k’asal
Xraqal li ch’utam Li hoonal re b’ichank	Xnajtil 20 k’asal
Xraqal li ch’utam Li xik sa’eb’ li tzoleb’aal	Xnajtil 5 k’asal
Xraqal li ch’utam Eb’ li tzoleb’aal, ut li tij sa’ xraqik	Xnajtil 20 k’asal

Li na’ajej choq’ reheb’ li kok’eb’, wankeb’ wi’ li kok’al aj 18 po toj 3 chihab’ xyu’ameb’, nab’ay 50 k’asal. Li hu Mirad a vuestros pequeñitos naxye chan ru naru taa’oksimanq li hoonal.

Li k’anjel reheb’ li kok’al sa’ li ch’utam re li loq’laj wa’ak. Rajlal chihab’ eb’ li kok’al neke’xb’aanu jun ch’utam re b’ichank sa’ li ch’utam re li loq’laj wa’ak, sa’eb’ li po sa’ xraqik li chihab’.

Li awa’b’ejil re li Tzoleb’aal reheb’ li Kok’al, rochb’een laj b’eresinel b’ich, neke’xk’uub’ li k’anjel rik’in tijok. Li obiispil neke’xk’eheb’ xna’leb’ chirix. Eb’ li kok’al naru neke’b’ichan, naru neke’xk’e xdiscurso, ut naru neke’xwotzeb’ li seraq’, li raqal sa’eb’ li loq’laj hu, ut lix nawomeb’ xch’ool.

Li ch’utam re kawresink-ib’ choq’ re li santil ochoch ut li tijonelil. Li awa’b’ejil re li Tzoleb’aal reheb’ li Kok’al neke’xk’uub’ jun ch’utam re kawresink-ib’ choq’ re li santil ochoch ut li tijonelil rajlal chihab’. Li obiispil neke’xk’eheb’ xna’leb’ chirix. Li ch’utam a’in wan choq’ reheb’ li kok’al wankeb’ 10 chihab’ re. Neke’b’oqman li na’b’ej yuwa’b’ej.

12.2.1.3

Li k’anjelak chiru as iitz’inb’ej ut li kok’ k’anjel

Sa’ li enero sa’ li chihab’ te’xket wi’ 8 chihab’, eb’ li kok’al naru neke’ok chi tz’aqonk sa’eb’ li kok’ k’anjel re li Tzoleb’aal reheb’ li Kok’al.

Eb’ li kok’ k’anjel re li Tzoleb’aal reheb’ li Kok’al ink’a’ neke’baanuman sa’ li domingo malaj sa’ lunes ewu.

• Eb’ li kok’ k’anjel re li Tzoleb’aal reheb’ li Kok’al neke’b’aanuman wiib’ sut chiru li jun po wi naru.

• Eb’ li teelom ut eb’ li ixqa’al neke’ch’utla chi jachjookeb’ ru. A’ut naru ajwi’ neke’ch’utla sa’ komonil choq’ re junjunqeb’ li kok’ k’anjel, malaj sa’eb’ li na’ajej b’ar wi’ moko k’iheb’ ta li kok’al.

Li obiispil tento te’xk’e reetal naq tz’aqalaq li tumin choq’ reheb’ li teelom ut li ixqa’al sa’ li Tzoleb’aal reheb’ li Kok’al, ut naq taak’eemanq sa’ juntaq’eetalil.

12.2.1.4

Xchaab’ilob’resinkil rib’ li junjunq

Rik’in naq yookeb’ chixyalb’al xq’e chi wank jo’ chanru li Kolonel—chalen chaq sa’ li chihab’ te’xket wi’ 8 chihab’—napatz’man reheb’ li kok’al naq te’xk’e xmeta re nimank sa’ musiq’ej, sa’ komonil, sa’ tz’ejwalej, ut sa’ k’a’uxlej (chi’ilmanq Lukas 2:52).

Naru neke’roksi li hu Li chaab’ilob’resink-ib’: Tenq’anel hu choq’ reheb’ li kok’al re xk’uub’ankileb’ ut xtz’iib’ankileb’ lix meta.

12.3

Li b’eresink sa’ li Tzoleb’aal reheb’ li Kok’al sa’ li teep

12.3.1

Li obiispil

Li xb’een xteneb’ankil li obiisp a’an rilb’aleb’ li tasal tenamit yookeb’ chi k’iik, jo’eb’ ajwi’ li kok’al. Li obiisp naru tixk’e xtaqlankil jun laj tenq’ aj k’ehol na’leb’ re xtenq’ankil rik’in lix teneb’ankil sa’ li Tzoleb’aal reheb’ li Kok’al. Li obiisp malaj jun laj tenq’ aj k’ehol na’leb’ li k’eeb’il xtaqlankil nach’utla chi kok’ aj xsa’ rik’in li awa’b’ej re li Tzoleb’aal reheb’ li Kok’al.

Li obiisp ut eb’ laj tenq’ aj k’ehol na’leb’ neke’wulak sa’ li Tzoleb’aal reheb’ li Kok’al chi kok’ aj xsa’.

12.3.2

Li awa’b’ejil re li Tzoleb’aal reheb’ li Kok’al

Li obiisp naxb’oq ut naxxaqab’ jun ixq re taak’anjelaq jo’ li awa’b’ej re li Tzoleb’aal reheb’ li Kok’al sa’ li teep.

Wi ka’ch’in li teep, naru naq ka’ajwi’ li awa’b’ej re li Tzoleb’aal reheb’ li Kok’al taab’oqe’q. Wi jo’kan wan, a’an nak’anjelak rochb’eeneb’ li na’b’ej yuwa’b’ej re xk’uub’ankil li tzolok, li hoonal re b’ichank, ut eb’ li kok’ k’anjel. Wi nim b’ayaq li teep, naru neke’b’oqe’ chik li komon chi jo’ka’in: xb’een wa eb’ laj tenq’ aj k’ehol na’leb’, chirix a’an aj b’eresinel b’ich, chirix a’an eb’ laj k’utunel ut eb’ laj k’anjenel re li na’ajej choq’ reheb’ li toj kok’eb’, chirix a’an laj tz’iib’anel, ut chirix a’an eb’ laj jolominel reheb’ li kok’ k’anjel.

Li awa’b’ejil re li Tzoleb’aal reheb’ li Kok’al neke’xtenq’aheb’ li na’b’ej yuwa’b’ej chixkawresinkileb’ lix kok’al chi ok sa’ lix b’ehileb’ li sumwank ut chi xik chi uub’ej.

Re xb’aanunkil a’in, li awa’b’ej re li Tzoleb’aal reheb’ li Kok’al naru tixk’e xtaqlankil jun komon re li awa’b’ejil re tixtenq’aheb’ li na’b’ej yuwa’b’ej chixkawresinkileb’ lix kok’al chi kub’eek xha’ ut chi k’ojob’aak jo’ komon. Li awa’b’ej re li Tzoleb’aal reheb’ li Kok’al naru tixk’e xtaqlankil jalan chik komon re li awa’b’ejil re tixtenq’aheb’ li na’b’ej yuwa’b’ej chixkawresinkileb’ lix kok’al chi xik sa’ li santil ochoch ut chixk’ulb’al li tijonelil.

A’aneb’ a’in lix teneb’ankil li awa’b’ej re li Tzoleb’aal reheb’ li Kok’al. Eb’ laj tenq’ aj k’ehol na’leb’ neke’xtenq’a.

• Nak’anjelak sa’ li ch’uut re teep.

• Naxb’aanuheb’ li ch’utam re li awa’b’ejil re li Tzoleb’aal reheb’ li Kok’al chi kok’ aj xsa’, ut nach’utla rik’in li obiisp, malaj rik’in laj tenq’ aj k’ehol na’leb’ li k’eeb’il xtaqlankil.

• Natenq’an chixk’uub’ankileb’ li k’anjel re li kub’iha’ choq’ reheb’ li kok’al li ak wankeb’ sa’ xhuhil li Iglees, wi tz’aamanb’il (chi’ilmanq 18.7.2).

• Naxk’uub’eb’ li ch’utam re li Tzoleb’aal reheb’ li Kok’al, ut nak’amok b’e sa’ xtiklajikeb’ li ch’utam.

• Nak’anjelak sa’ junesal chiruheb’ li kok’al, eb’ laj k’utunel, ut eb’ laj jolominel sa’ li Tzoleb’aal reheb’ li Kok’al.

• Naxtzoleb’ laj jolominel ut eb’ laj k’utunel sa’ li Tzoleb’aal reheb’ li Kok’al chirix lix teneb’ankileb’, ut naxtenq’aheb’ sa’ li teneb’ank a’an rik’in xk’eeb’aleb’ xna’leb’ chirix lix b’oqb’aleb’ (chi’ilmanq Li K’utuk jo’ li Kolonel [2016], 38).

• Naxb’eresi li tz’iib’ank hu, li taqlanb’il esil, li presupuesto, ut li tumin re li Tzoleb’aal reheb’ li Kok’al.

12.3.4

Laj b’eresinel b’ich ut laj ch’e’ol piano

Laj b’eresinel b’ich ut laj ch’e’ol piano neke’xk’ut li evangelio chiruheb’ li kok’al rik’ineb’ li b’ich sa’ li hoonal re b’ichank.

Wi maak’a’ jun piano malaj jun aj ch’e’ol piano, eb’ laj jolominel neke’ru chiroksinkil li chapb’il son.

12.3.5

Eb’ laj k’utunel ut eb’ laj jolominel re li na’ajej choq’ reheb’ li toj kok’eb’

Li awa’b’ejil re li Tzoleb’aal reheb’ li kok’al neke’xk’e re li obiispil lix k’ab’a’eb’ li winq ut li ixq li te’raj naq te’k’anjelaq jo’ aj k’utunel sa’ li Tzoleb’aal reheb’ li Kok’al ut jo’ aj jolominel re li na’ajej choq’ reheb’ li toj kok’eb’. Eb’ li komon a’in neke’b’oqe’ re xtzolb’aleb’ li kok’al li wankeb’ sa’ jun tzoleb’aal choq’ re xchihab’eb’.

Eb’ laj k’utunel sa’ li Tzoleb’aal reheb’ li Kok’al ut eb’ laj jolominel re li na’ajej choq’ reheb’ li toj kok’eb’ neke’xk’ut li na’leb’ wan sa’ Kim, Taaqehin—Choq’ re li Tzoleb’aal reheb’ li Kok’al (wi 3–11 chihab’ xyu’ameb’) malaj sa’ Mirad a vuestros pequeñitos (wi wankeb’ sa’ li na’ajej choq’ reheb’ li toj kok’eb’).

12.3.6

Eb’ laj jolominel re kok’ k’anjel

Eb’ laj jolominel re kok’ k’anjel sa’ li Tzoleb’aal reheb’ li Kok’al neke’k’anjelak chiruheb’ li kok’al naq neke’xk’uub’ li k’anjelak chiru as iitz’inb’ej ut li kok’ k’anjel sa’ xtiklajik li enero re li chihab’ neke’xket wi’ 8 chihab’ (chi’ilmanq 12.2.1.3). Li k’anjel a’in jayalinb’il rik’in li k’anjel re li kolb’a-ib’ ut li taqenaqil loq’al. Tento naq sahaq xb’aanunkil, ut taarajsiheb’ ru li kok’al.

12.5

Xkomon chik li b’eresink ut li chaq’rab’ink

12.5.1

Xkolb’aleb’ rix li kok’al

Naq eb’ li ninqi komon wankeb’ rik’ineb’ li kok’al sa’ li Iglees, aajel ru naq junelik te’wanq wiib’ li komon ninq li chaab’ileb’ xch’ool.

Chixjunileb’ li komon ninqeb’ li neke’k’anjelak rik’ineb’ li kok’al tento te’xb’aanu li tzolok re xkolb’aleb’ rix li kok’al ut li saaj naq maji’ nanume’ jun po chirix naq xaqab’anb’ileb’ sa’ xk’anjel (ProtectingChildren.ChurchofJesusChrist.org).