14.

Eb’ li komon li ink’a’ sumsuukeb’

14.0

Xtikibʼankil

Sa’ xyanqeb’ li komon sa’ li Iglees, wankeb’ naab’al li winq ut ixq li ink’a’ sumsuukeb’ malaj li xe’xjach rib’ rik’in xsum aatin. A’an aajel ru naq chixjunileb’ te’xtaw xyo’onihom rik’in lix tojb’al rix li maak xb’aan li Jesukristo (chi’ilmanq Eter 12:4). Eb’ li junelikil na’leb’ a’in naru neke’xkawresi li yo’onink a’an:

• Eb’ li loq’laj hu ut eb’ li profeet sa’ roso’jikeb’ li kutan neke’xch’olob’ naq chixjunileb’ li tiikeb’ chixpaab’ankileb’ li sumwank re li evangelio te’ruuq chixtawb’al li taqenaqil loq’al.

• Moko k’utb’il ta jo’q’e ut chan ru tz’aqal te’k’eemanq chixjunileb’ li rosob’tesihom li taqenaqil loq’al. A’b’an yaal naq te’k’ehe’q li osob’tesihom a’an (chi’ilmanq Mosiah 2:41).

• Li oyb’enink rik’in li Qaawa’ naraj naq junelik too’ab’inq chiru ut toochaab’ilo’q sa’ musiq’ej rik’in a’an (chi’ilmanq Isaias 64:4).

• Li Dios naxyeechi’i li junelik yu’am reheb’ chixjunil li ralal xk’ajol. Chixjunileb’ li k’ulub’ejeb’ chixk’ulb’al li maatan re li jalb’a-k’a’uxlej naxk’e li Kolonel ut neke’xyu’ami li taqlahom te’xk’ul li junelik yu’am. (Chi’ilmanq Mosiah 26:30; Moroni 6:8.)

• Li nawom chirixeb’ li na’leb’ a’in naxtaw xxe’ rik’in li paab’aal chirix li Jesukristo. Sa’ xk’ab’a’ li rusilal a’an, chixjunil sa’ li yu’am a’in taatiikob’resiiq ru (chi’ilmanq Alma 7:11–13).

Li Qaawa’ naraj naq chixjunileb’ li komon te’tenq’anq sa’ li k’anjel re li kolb’a-ib’ sa’eb’ lix teep ut oqech (chi’ilmanq 1 Korintios 12:12–27). Jo’ b’eresinb’il xb’aan li Musiq’ej, eb’ li komon li ink’a’ sumsuukeb’ neke’b’oqe’ jo’ aj jolominel ut aj k’utunel.

Sa’ li ch’ol a’in:

• “Eb’ li komon li ink’a’ sumsuukeb’” naraj naxye chixjunileb’ li komon ak ninqeb’ re li Iglees li moko sumsuukeb’ ta sa’ li hoonal a’in.

• “Eb’ li saaj li maji’ neke’sumla” naraj naxye eb’ li wankeb’ 18–30 chihab’ reheb’.

• “Eb’ li komon li moko sumsuukeb’ ta” naraj naxye eb’ li numenaq 31 chihab’ xyu’ameb’.

14.1

Eb’ li komon li ink’a’ sumsuukeb’ sa’eb’ li teep ut oqech wankeb’ wi’

14.1.1

Li b’eresink sa’ li oqech

14.1.1.2

Li ch’uut reheb’ li saaj li maji neke’sumla sa’ li oqech

Li awa’b’ejil re oqech neke’xk’uub’ jun ch’uut reheb’ li saaj li maji’ neke’sumla.

Li awa’b’ejil re oqech naru ajwi’ neke’xk’uub’ jun ch’uut reheb’ li komon li moko sumsuukeb’ ta.

Eb’ li ch’uut a’in neke’xsik’ xtenq’ankileb’ li komon rik’in li amiiwuk-ib’ ut li tz’aqonk sa’ li k’anjel re li kolb’a-ib’ ut li taqenaqil loq’al (chi’ilmanq 14.2).

14.1.2

Li b’eresink sa’ li teep

14.1.2.1

Li obiispil

Nim lix k’anjel li obiispil sa’ reek’asinkileb’ li komon li ink’a’ sumsuukeb’ chi tz’aqonk sa’ li k’anjel re li kolb’a-ib’ ut li taqenaqil loq’al. Neke’k’anjelak rochb’een li ch’utam re teep re xtawb’aleb’ li chaab’il b’oqok ut k’anjel choq’ reheb’ li komon li ink’a’ sumsuukeb’. Neke’xk’e reetal ut neke’xyal xq’e chixtenq’ankileb’ li na’b’ej yuwa’b’ej maak’a’eb’ xsum aatin.

• Jun komon sa’ li obiispil naxb’aanu jun tz’ilok-ix rik’in li junjunq chi saaj li maji’ nasumla jun sut chiru li jun chihab’.

• Li obiispil naru neke’xk’uub’ jun ch’uut reheb’ li saaj li maji’ neke’sumla sa’ li teep.

14.1.2.2

Laj tenq’ aj k’ehol na’leb’ sa’ li awa’b’ejil re lix molameb’ li xb’eenil ut li Komonil re Tenq’ank li k’eeb’ileb’ xtaqlankil rik’ineb’ li saaj komon li maji’ sumsuukeb’

Li awa’b’ej re lix molameb’ li xb’eenil ut re li Komonil re Tenq’ank naru neke’xk’e xtaqlankil jun reheb’ laj tenq’ aj k’ehol na’leb’ re tixjayali rib’ rik’in rilb’aleb’ li saaj li maji’ neke’sumla. Eb’ laj tenq’ aj k’ehol na’leb’ a’in neke’xk’e reetal lix kawilaleb’ li saaj li maji’ neke’sumla ut neke’xtenq’aheb’.

Eb’ li awa’b’ej re lix molameb’ li xb’eenil ut re li Komonil re Tenq’ank naru neke’xk’am resil li k’anjel a’in naq nawan li ch’utam re teep.

14.1.2.3

Eb’ laj jolominel reheb’ li saaj komon li maji’ neke’sumla

Sa’ jun teep b’ar wi’ wankeb’ naab’al li saaj komon li maji’ neke’sumla, li obiispil naru neke’xb’oq jun saaj komon winq ut ixq li maji’ sumsuukeb’, re te’k’anjelaq choq’ aj jolominel reheb’ li saaj komon li maji’ neke’sumla. A’aneb’ a’in lix teneb’ankil:

• Xtenq’ankileb’ li komon li moko sumsuukeb’ ta chi tz’aqonk sa’ li k’anjel re li kolb’a-ib’ ut li taqenaqil lo’qal (chi’ilmanq 14.2).

• K’anjelak sa’ li ch’uut choq’ reheb’ li saaj li maji’ neke’sumla sa’ li oqech.

• Xb’eresinkil li ch’uut reheb’ li saaj li maji’ neke’sumla sa’ li teep wi wan junaq.

• Ch’utlaak chi kok’ aj xsa’ rik’in li awa’b’ejil re lix molameb’ li xb’eenil ut li awa’b’ejil re li Komonil re Tenq’ank. Sa’eb’ li ch’utam a’in, neke’aatinak chirix lix kawilaleb’ li saaj li maji’ neke’sumla ut chan ru te’xtenq’aheb’. Neke’aatinak ajwi’ chirix rilb’aleb’ li saaj li maji’ neke’sumla.

14.2

Li tz’aqonk sa’ li k’anjel re li kolb’a-ib’ ut li taqenaqil loq’al

14.2.1

Xyu’aminkil lix evangelio li Jesukristo

14.2.1.1

Li q’ojyin re junkab’al, ut xtzolb’al li evangelio

Eb’ laj jolominel malaj komon li neke’raj tz’aqonk naru te’xkuub’ jun malaj wiib’ oxib’ li ch’uut re xb’aanunkil li q’oyin re junkab’al choq’ reheb’ li komon li moko sumsuukeb’ ta ut jalaneb’ chik ch’uut choq’ reheb’ li saaj li maji’ neke’sumla.

14.2.1.3

Eb’ li kok’ k’anjel

Chi b’eresinb’il xb’aaneb’ laj jolominel sa’ li teep malaj oqech, eb’ li saaj li maji’ neke’sumla naru neke’xkuub’ ut neke’tz’aqon sa’eb’ li kok’ k’anjel tz’aqal choq’ reheb’ a’an. Naru:

• Te’rula’ani li santil ochoch.

• Te’tz’aqonq sa’ li k’anjel re li resilal li junkab’al.

• Te’xwotz li evangelio.

• Te’k’anjelaq chiru as iitz’inb’ej sa’ li tenamit.

• Te’xik sa’eb’ li k’anjel re son ut xninq’ehinkil li tenamit.

• Te’b’atz’unq.

Chi b’eresinb’il xb’aaneb’ laj jolominel sa’ li oqech, eb’ li komon li moko sumsuukeb’ ta naru ajwi’ neke’xk’uub’ li kok’ k’anjel choq’ reheb’ li komon li moko sumsuukeb’ ta sa’ chixjunil li oqech.