15.

Dagiti Seminary ken Institute ti Relihion

15.0

Pakauna

Dagiti Seminary ken Institute ti Relihion (S&I) tulonganna dagiti nagannak ken lider ti Simbaan iti panangtulong kadagiti agtutubo ken young adult a mangpapigsa iti pammatida ken ni Jesucristo ken iti naisubli nga ebangheliona.

Ti S&I representative ket maidutok iti tunggal stake a tumulong a mangimaton kadagiti programa ti S&I.

15.1

Seminary

Ti seminary ket uppat a tawen a programa a pagadalan dagiti agtutubo ti ebanghelio ni Jesucristo kas masarakan kadagiti nasantuan a kasuratan ken pannursuro dagiti propeta iti ud-udina nga aldaw. Gagangay nga agtawen iti 14–18 dagiti estudiante iti seminary.

Allukoyen ti bishopric, dagiti lider dagiti agtutubo, ken dagiti panguluen ti korum ken klase ti tunggal agtutubo a makiraman a naan-anay iti seminary.

15.1.1

Dagiti Mannursuro

Dagiti mannursuro iti seminary nasken a miembroda ti Simbaan nga addaan pammati ken ni Apo Jesucristo ken pammaneknek iti naisubli nga ebangheliona. Nasken nga agbiagda kadagiti pagbatayan nga isursuroda ken makipagtrabahoda a nasayaat kadagiti agtutubo. No mabalin, nasken nga addaan dagiti mannursuro iti agdama a temple recommend.

Ti maysa a miembro ti panguluen ti stake wenno maysa a nadutokan a nangato a konsehal ti mangawag, mang-set apart, ken mangi-release kadagiti mannursuro iti seminary iti stake ken dagiti supervisor iti stake.

Tapno masalakniban dagiti mannursuro ken estudiante, nasken nga adda dua a nataengan iti pasdek wenno pagtaengan a pangisuruan iti klase ti seminary.

15.1.2

Dagiti Opsion iti Seminary

Makatulong unay ti seminary no makipagkita dagiti estudiante iti maysa a mannursuro iti tunggal aldaw ti lawas. Nupay kasta, mabalin a saan a posible daytoy gapu kadagiti isyu ti kinatalged, distansia ti panagbiahe, ken dadduma pay a banag.

Makiuman dagiti lider ti Simbaan iti S&I representative-da tapno mangikeddeng no anianto nga opsion ti:

• Kasayaatan a mangtulong kadagiti estudiante a mangsursuro iti ebanghelio ken dumur-as a naespirituan.

• Mangpatalinaed a natalged dagiti estudiante.

• Saan a mangpadagsen kadagiti pamilia a di kasapulan.

Nasken a saan a maangay dagiti klase iti Domingo.

15.1.3

Dagiti Pasdek, Alikamen, ken Material

Siguraduen dagiti lider ti stake ken ward a dagiti lokasion kas kadagiti meetinghouse wenno pagtaengan dagiti miembro ket sidadaan a mausar para kadagiti klase ti seminary.

Ti S&I representative ti mangipaay kadagiti kasapulan [material] para kadagiti mannursuro ken estudiante para iti tunggal klase. Nasken nga itugot dagiti estudiante dagiti bukodda a nasantuan a kasuratan, naiprenta wenno digital.

15.1.5

Pammadayaw ken Panagturpos

Nasamsamay a makasursuro dagiti estudiante iti seminary ken mapaunegda ti kumbersionda no regular a dumar-ayda iti klase, makiraman, ken adalenda dagiti nasantuan a kasuratan iti ruar ti klase. Bayat ti panangaramidda kadagitoy a banag, makagun-odda pay iti pammadayaw iti seminary iti kada tawen ken makaturposda iti seminary.

Tapno makaturpos iti seminary, masapul a makagun-od ti maysa nga estudiante iti uppat a tawen a credit ken umawat iti eclesiastical endorsement manipud iti maysa a miembro ti bishopric.

15.2

Institute

Mangipaay ti institute kadagiti klase ti panagadal iti ebanghelio iti aldaw ti lawas a mangpapigsa iti pammati ken pammaneknek ken ni Jesucristo ken ti naisubli nga ebangheliona. Amin a young single adult nga agtawen iti 18–30 ket nasken a maallukoy a dumar-ay kadagiti klase ti institute, ages-eskuelada man wenno saan.

15.3

Dagiti Pagadalan iti Simbaan ken Church Educational System

Para iti impormasion iti primary ken secondary a pagadalan ti Simbaan, BYU–Pathway Worldwide, ken dagiti institusion ti nangatngato nga edukasion, kitaen iti CES.ChurchofJesusChrist.org. Maipaay pay sadiay ti impormasion maipapan iti panangileppas kadagiti ecclesiastical endorsement para kadagiti estudiante a dumar-ay kadagitoy a pagadalan.

Mainayon pay, ti impormasion maipapan iti ecclesiastical clearance iti panggedan babaen ti CES Ecclesiastical Clearance Office ket masarakan iti help.ChurchofJesusChrist.org.