finemui ʻoku hikinima he kalasí

15.

Seminelí mo e ʻInisititiuti Fakalotú

15.0

Talateu

ʻOku tokoni ʻa e Seminelí mo e ʻInisititiuti Fakalotú (S&I) ki he ngaahi mātuʻá mo e kau taki ʻo e Siasí ʻi hono tokoniʻi ʻo e toʻu tupú mo e kakai lalahi kei talavoú ke fakatupulaki ʻenau tui kia Sīsū Kalaisí mo ʻEne ongoongolelei kuo fakafoki maí.

ʻE vahe ha fakafofonga S&I ki he siteiki takitaha ke tokoni ʻi hono fakahoko ʻo e polokalama S&I.

15.1

Seminelí

Ko e seminelí ko ha polokalama taʻu ʻe fā ʻoku ako ai ʻe he toʻu tupú ʻa e ongoongolelei ʻo Sīsū Kalaisí ʻo hangē ko ia ʻoku hā ʻi he ngaahi folofolá mo e ngaahi akonaki ʻa e kau palōfita ʻo e ngaahi ʻaho kimui ní. Ko e fānau ako seminelí ʻoku meimei ke nau taʻu 14–18.

ʻE poupouʻi ʻe he kau pīsopelikí, kau taki toʻu tupú mo e kau palesitenisī fakakōlomú mo fakakalasí ʻa e toʻu tupu kotoa ke nau kau kakato ʻi he seminelí.

15.1.1

Kau Faiakó

ʻOku totonu ko e kau faiako seminelí ko ha kāingalotu ʻo e Siasí ʻoku tui kia Sīsū Kalaisi mo ʻi ai haʻanau fakamoʻoni ki Heʻene ongoongolelei kuo fakafoki maí. ʻOku totonu ke nau moʻui ʻaki e ngaahi tefitoʻi moʻoni ʻoku nau akoʻí pea fengāueʻaki lelei mo e toʻu tupú. ʻOku totonu ke maʻu ʻe he kau faiakó ha lekomeni temipale ʻoku kei ʻaonga, ʻi he taimi ʻe lava aí.

ʻE ui, vaheʻi, pea mo tukuange ʻe ha mēmipa ʻo e kau palesitenisī fakasiteikí pe ko ha aleaʻanga māʻolunga ne vahe ki ai, ʻa e kau faiako semineli he siteikí mo e kau supavaisa fakasiteikí

Ke maluʻi ʻa e kau faiakó mo e fānau akó, ʻoku totonu ke ʻi ai ha kakai lalahi ʻe toko ua ʻi he fale pe ʻapi ʻoku akoʻi ai ha kalasi semineli.

15.1.2

Ngaahi Meʻa ke Fili Mei Ai ʻi he Seminelí

ʻOku tokoni lahi taha ʻa e seminelí ʻi he taimi ʻe lava ai ʻa e fānau akó ke fakataha mo ha faiako ʻi he ʻaho takitaha ʻo e uiké. Ka neongo ia, mahalo he ʻikai lava ʻeni koeʻuhí ko ha ʻuhinga fekauʻaki mo e tuʻunga malú, mamaʻo ʻo e fefonongaʻakí, mo ha ngaahi ʻuhinga kehe.

ʻE talatalaifale ʻa e kau taki ʻo e Siasí mo ʻenau fakafofonga S&I ke fakapapauʻi pe ko e fē fili ʻe:

• Tokoni lelei taha ke ako ai ʻe he fānau akó ʻa e ongoongoleleí mo tupulaki fakalaumālié.

• Tauhi e tuʻunga malu ʻa e fānau akó.

• ʻIkai ke ne fakamafasiaʻi taʻe-ʻuhinga ʻa e ngaahi fāmilí.

ʻOku ʻikai totonu ke fakahoko ʻa e ngaahi kalasí ʻi he Sāpaté.

15.1.3

Falé, Meʻangāué, mo e Naunaú

ʻE fakapapauʻi ʻe he kau taki ʻo e siteikí mo e ngaahi uōtí ʻoku ʻatā e ngaahi feituʻu hangē ko e ʻū ʻapisiasí pe tukui ʻapi ʻa e kāingalotú, ki he ngaahi kalasi seminelí.

ʻE ʻomi ʻe he fakafofonga S&I ʻa e naunau maʻá e kau faiakó mo e fānau akó ki he kalasi takitaha. ʻOku totonu ke omi e fānau akó mo ʻenau takitaha folofola, ko ha tohi folofola kuo paaki pe fakaʻilekitulōnika.

15.1.5

Maaka mo e Fakaʻosi Ako

ʻE lava ke ako lelei ange ʻa e fānau ako seminelí pea loloto ange ʻenau uluí ʻo kapau te nau maʻuako, kau mai, pea ako maʻu pē e folofolá ʻi tuʻa mei he taimi kalasí. ʻI heʻenau fai ʻení, te nau maʻu foki ai ha ngaahi maaka he seminelí ʻi he taʻu takitaha pea ʻe lava ke nau ʻosi mei he seminelí.

Kuo pau ke maʻu ʻe ha tokotaha ako ha maaka taʻu ʻe fā mo ha tohi fakaongoongolelei fakalotu mei ha mēmipa ʻo e kau pīsopelikí, kae lava ke ne ʻosi mei he seminelí.

15.2

ʻInisititiutí

ʻOku fakahoko ʻe he ʻinisititiutí ha ngaahi kalasi ako ʻo e ongoongoleleí he lolotonga ʻo e ngaahi ʻaho ʻo e uiké, ʻa ia ʻokú ne fakamālohia ai e tui mo e fakamoʻoni kia Sīsū Kalaisí mo ʻEne ongoongolelei kuo fakafoki maí. ʻOku totonu ke poupouʻi ʻa e kau taautaha kei talavou kotoa pē ʻi he taʻu 18–30 ke nau kau ʻi he ngaahi kalasi ʻinisititiutí, tatau ai pē pe ʻoku nau ako pe ʻikai.

15.3

Ngaahi Akoʻanga ʻa e Siasí mo e Potungāue Ako ʻa e Siasí

Ki ha fakamatala ki he ngaahi lautohi siʻi mo e ako māʻolunga ʻa e Siasí, BYU–Pathway Worldwide, mo e ngaahi akoʻanga māʻolunga angé, vakai, CES.ChurchofJesusChrist.org. ʻOku toe ʻoatu foki ai mo e fakamatala ki hono fakakakato ʻa e fakaongoongolelei mei he taki fakalotú ki he kau akó ke nau hū ki he ngaahi akoʻanga ko ʻení.

ʻIkai ngata ai, ko e fakamatala fekauʻaki mo e ngaahi fakaʻatā mei he taki fakalotú ki he ngāueʻangá ʻo fakafou ʻi he CES Ecclesiastical Clearance Office (ʻOfisi Fakangofua ʻa e Taki Fakalotú he CES), ʻe lava ke maʻu ia ʻi he help.ChurchofJesusChrist.org.