17.

Panangisuro iti Ebanghelio

Isurotayo ti ebanghelio tapno mangtulong kadagiti tao a mangpapigsa iti pammatida iti Nailangitan nga Ama ken ni Jesucristo.

17.1

Dagiti Pagbatayan ti Panangisuro a Kas ken ni Cristo

No mangisursuro iti ebanghelio, suroten dagiti nagannak, mannursuro, ken lider ti pagwadan ni Jesucristo, nga isu ti Apo a Mannursuro.

Ibinglay dagiti lider dagiti sumaganad a pagbatayan ti panangisuro kas ken Cristo kadagiti mannursuro kadagiti organisasionda. Mailawlawag dagitoy a pagbatayan a nadetdetalyado iti Panangisuro iti Wagas ti Mangisalakan.

17.1.1

Ayatem dagiti Sursuruam

Amin nga aramiden ti Mangisalakan ket maysa a panangyebkas iti ayatna (kitaen iti 2 Nephi 26:24).

17.1.2

Mangisuro babaen ti Espiritu

Agkalikagum dagiti mannursuro ti pannarabay ti Espiritu bayat ti panagsagana ken panangisuroda, ken ikagkagumaanda ti agbiag a maikari iti impluensiana iti inaldaw.

17.1.3

Isuro ti Doktrina

Iti panangsurotda iti pagwadan ti Mangisalakan, ipamaysa dagiti mannursuro dagiti napapateg, pangisalakan a kinapudno ti ebanghelio. Mangisuroda babaen ti panangusar kadagiti nasantuan a kasuratan, dagiti pannursuro dagiti propeta iti ud-udina nga aldaw, ken dagiti naanamongan a material iti kurikulum.

17.1.4

Mangyawis iti Napasnek a Panagsursuro

Allukoyen dagiti mannursuro dagiti miembro nga agbalin a responsable iti bukodda a panagsursuro.

17.2

Panagsursuro ken Panangisuro iti Ebanghelio a Naisentro iti Pagtaengan

Paregtaen ken suportaran dagiti lider ken mannursuro ti Simbaan ti panagsursuro ken panangisuro iti ebanghelio a naisentro iti pagtaengan.

Paregtaen dagiti lider ken mannursuro dagiti miembro nga agkalikagum a maaddaan iti bukodda nga inspirasion maipapan iti no kasano nga adalen ken isuro ti ebanghelio. Nasken a kangrunaan a resources-da dagiti nasantuan a kasuratan ken mensahe ti sapasap a komperensia.

17.3

Dagiti Pagrebbengan dagiti Lider

• Mangipakita iti pagwadan babaen ti panagsursuro iti ebanghelio ken panangisuro iti daytoy iti wagas ti Mangisalakan.

• Mangsigurado a ti panangisuro kadagiti organisasionda ket mangbangon iti pammati ken umisu iti doktrina.

• Mangted iti agtultuloy a suporta kadagiti mannursuro kadagiti organisasionda.

17.4

Dagiti Miting ti Konseho ti Mannursuro

Kadagiti miting ti konseho ti mannursuro, agiinnuman dagiti mannursuro maipapan kadagiti pagbatayan ti panangisuro a kas ken ni Cristo. Agiinnumanda pay maipapan no kasano a mapasayaat ti panagsursuro ken panangisuro iti ebanghelio. Usarenda ti Panangisuro iti Wagas ti Mangisalakan kas maysa a resource.

Maangay dagiti miting ti konseho ti mannursuro iti tunggal tallo a bulan kabayatan ti 50-minuto nga oras ti klase iti Domingo.