17.

Xk’utb’al li evangelio

Naqak’ut li evangelio re xtenq’ankileb’ li qas qiitz’in chixnimob’resinkil lix paab’aaleb’ chirix li qaChoxahil Yuwa’ ut li Jesukristo.

17.1

Eb’ li na’leb’ chirix li k’utuk jo’ li Kristo

Naq neke’xk’ut li evangelio, eb’ li na’b’ej yuwa’b’ej, eb’ laj k’utunel, ut eb’ laj jolominel neke’xb’aanu jo’ kixb’aanu li Jesukristo, a’an laj K’utunel li tz’aqal re ru.

Eb’ laj jolominel neke’xwotz li na’leb’ a’in chirix li k’utuk jo’ li Kristo rik’ineb’ laj k’utunel sa’eb’ lix k’anjenel ch’uut. Eb’ li na’leb’ a’in ch’olob’anb’ileb’ chi us sa’ li hu Li K’utuk jo’ li Kolonel.

17.1.1

Xraab’aleb’ li tzolb’ileb’ aab’aan

Chixjunil li naxb’aanu li Kolonel naxk’ut lix rahom (chi’ilmanq 2 Nefi 26:24).

17.1.2

K’utuk rik’in li Musiq’ej

Eb’ laj k’utunel neke’xsik’ naq li Musiq’ej tixk’ameb’ xb’e naq yookeb’ chixkawresinkil rib’ ut chi k’utuk, ut neke’xyal xq’e chi wank chi k’ulub’ej re te’ruuq chixk’ulb’al lix wankil li Musiq’ej wulaj wulaj.

17.1.3

Xk’utb’al li tzol’leb’

Re xb’aanunkil li kixb’aanu li Kolonel, eb’ laj k’utunel neke’xjayali rib’ rik’ineb’ li na’leb’ re li evangelio li aajeleb’ ru ut li neke’kolok. Neke’roksiheb’ li loq’laj hu, lix k’utumeb’ li profeet re roso’jikeb’ li kutan, ut eb’ li hu k’ulub’anb’il xb’aan li Iglees.

17.1.4

Xb’oqb’aleb’ li komon chi tzolok chi yalb’ileb’ xq’e

Eb’ laj k’utunel neke’xtenq’aheb’ li komon chixnawb’al naq li tzolok a’an xteneb’ankil li junjunq.

17.2

Li tzolok ut li k’utuk chirix li evangelio li jayalinb’il sa’ li ochoch

Eb’ laj jolominel ut eb’ laj k’utunel neke’waklesin ch’oolej ut neke’tenq’an re naq taa’uxq li tzolok ut li k’utuk chirix li evangelio sa’ li ochoch.

Eb’ laj jolominel ut eb’ laj k’utunel neke’xwaklesi xch’ooleb’ li komon re te’xsik’ xmusiq’ankileb’ re te’xnaw chan ru xtzolb’al ut xk’utb’al li evangelio. Sa’ xb’aanunkil, tento te’roksiheb’ li loq’laj hu ut li aatin neke’yeeman sa’eb’ li jolomil ch’utub’aj-ib’.

17.3

Lix teneb’ankileb’ laj jolominel

• Te’xk’ut rik’in xb’aanuhom li k’a’ru tento taa’uxq, rik’in xtzolb’al li evangelio ut xk’utb’al a’an jo’ kixb’aanu li Kolonel.

• Te’xk’e reetal naq li k’utuk nab’aanuman sa’ lix k’anjenel ch’uuteb’ naxwaklesi li paab’aal ut a’an tz’aqal yaal.

• Rajlal te’xtenq’aheb’ laj k’utunel sa’ lix k’anjenel ch’uuteb’.

17.4

Eb’ li ch’utam reheb’ laj k’utunel

Sa’eb’ li ch’utam reheb’ laj k’utunel, eb’ laj k’utunel neke’aatinak sa’ komonil chirix li k’utuk jo’ li Kristo. Neke’xtz’il ajwi’ rix chan ru te’xchaab’ilob’resi li tzolok ut li k’utuk chirix li evangelio. Neke’roksi li hu Li K’utuk jo’ li Kolonel jo’ k’anjeleb’aal.

Neke’ux li ch’utam reheb’ laj k’utunel rajlal oxib’ po, ut nab’aanuman chiru li 50 k’asal na’ux wi’ li tzoleb’aal sa’ domingo.